Hiligaynon News: Army, Foundation nagpanagtag medical supplies sa mga ospital

From the Philippine Information Agency (Oct 21, 2020): Hiligaynon News: Army, Foundation nagpanagtag medical supplies sa mga ospital (By Lorenzo O. Lambatin, Jr.)

NEGROS OCCIDENTAL, Oktubre 21 (PIA) — Nagpatigayon ang mga katapo sang 79th Infantry (Masaligan) Battalion sa pagpanagtag sining karon lang sang mga medical supplies hatag sang isa ka organisasyon gikan sa pribado nga sektor sang media nga GMA Kapuso Foundation sa nagkalainlain nga mga ospital diri sa probinsya sang Negros Occidental, pahayag ni Civil-Military Operations Officer 1Lt. Norman Sorila

Nalakip sa mga supplies ang mga personal protective equipment (PPEs); 9,000 ka pares sang rubber gloves; 600 ka bilog nga Hazmat Suit; 600 face shields; 600 face masks; 600 ka bilog nga alcohol, kag 720 food packs para sa mga frontline health workers sang tatlo ka mga pang-publiko nga mga ospital sa probinsya.

Sa gilayon naman ini ginpangdul-ong sang mga soldado sa Corazon Locsin Montelibano Memorial Regional Hospital (CLMMRH), Teresita Lopez Jalandoni Provincial Hospital kag Cadiz District Hospital.

Nagpahayag sang pagpasalamat ang mga opisyales sang nasambit nga mga ospital sa Foundation kag sa mga katapo sang 79IB sa ila nabaton nga mga donasyon.

Ginkalipay naman ni 79IB Commanding Officer Lieutenant Colonel Gerard Alvaran ang pagpakig-bahin sa amo nga hilikuton nga may tuyo mapahagan-hagan ang mga kabudlay tuga sang pandemic.

“Bug-os ang suporta sang mga katapo sang 79IB sa mga programa sang Non-Government Organizations, Local government Units kag iban pa nga mga stakeholders bangud kinahanglan gid sang aton mga frontliners ang amo nga ayuda,” pahayag ni Alvaran. (JSC/Lljr/PIA6 Negros Occidental )

https://pia.gov.ph/news/articles/1056459