CPP/NPA-Central Negros: US-Duterte kag Pasistang AFP ang Matuod nga mga Terorista

NDF-Negros Island propaganda statement posted to the Communist Party of the Philippines Website (Mar 10): US-Duterte kag Pasistang AFP ang Matuod nga mga Terorista



JB Regalado, Spokesperson
NPA-Central Negros (Leonardo Panaligan Command)

10 March 2018
Press Release

Mabaskog nga ginakondenar sang LPC-BHB upod sa bug-os nga rebolusyonaryong hublag dira sa pagpamuno sang PKP sa Central Negros ang wala sang basehan nga pagpagwa sang Department of Justice (DOJ) sang listahan sang mga ginakabig nga mga “terorista” sa pungsod labi na sang mga Negrosanon. Halos 600 ka mga pangalan sang mga indibidwal sa bug-os nga pungsod kag kapin man sa 50 ang gikan sa isla sang Negros. Makakulugmat tungod kay ang mga naapid sa sini nga listahan sang ginakabig nga mga “terorista” sang mapintas nga estado sa pagpanguna sang pasistang US-Duterte, amo ang mga demokratiko kag progresibong pwersa nga aktibo nga nagahimakas kag nagasulong sang interes sang sahing anakbalhas kag malapad nga pumuluyo lamang sa pagdepensa sang tawhanon nga kinamatarung. Determinado man nga nagasulong sa pagpatuman sang matuod nga reporma sa duta, pungsodnon nga industrialisasyon, matarung nga sweldo, benepisyo, nagademanda sang mga nagakaigo nga serbisyo gikan sa reaksyunaryong gobyerno kag nagaduso sang tunay nga pagbag-o sosyal. Nagakahulugan nga mga progresibo kag tampad nga mga rebolusyonaryo ang nagaduso sang katumanan sang tunay, makatarunganon kag malawigon nga kalinong dira sa balayon sang Comprehensive Agreements on Socio and Economic Reforms kag Comprehensive Agreements on Political and Constitutional Reforms diin ginakilala sini nga pinaka-esensya sang ginapanawagan nga pagpadayon sang Peacetalks sa tunga sang NDFP kag GRP.

Kabaliskaran kag desperado ini nga tikang sang pasistang AFP kag diktaduryang US-Duterte bangud gusto lamang sini nga punggan ang paghimakas sang malapad nga pumuluyong Pilipino para sa tunay nga demokrasya kag pungsodnon nga kahilwayan. Gusto man sang mapintas nga estado sa pagpanguna ni Digong Duterte nga busalan ang mga baba sang mga kritiko sini kaangot sa mga kontra-pumuluyo kag maki-dumuluong nga kinaiya sang pagpadalagan kag pang-gobyerno sa pungsod.

Ang matuod si Duterte upod sa AFP ang “tunay nga terorista” bangud sang lapnagon nga kahalitan kag pagpamatay sa iyang kampanya kontra-druga, kontra-terorismo kag kontra-insurhensiya idalum sa Oplan Kapayapaan. Ang serye sang pagpamatay, extra-judicial killings kag pagpaluntad sang culture of impunity nga nagapadayon pa tubtob subong sa Guihulngan, Negros Oriental lakip na sa iban pa nga mga lugar sa isla, isa ka kongkreto nga akto kag basehan sang terorismo sang mapintas nga estado. Nagresulta ini sang kapin na sa 15 tanan ka mga inosenteng sibilyan, aktibista kag progresibong pwersa ang nagkalamatay sa Guihulngan gikan sadtong Hulyo 23, 2017 tubtob Pebrero 2018.

Sa tanan nga mga biktima sang kapintas, pasismo sang estado kag sang pasistang diktador US-Duterte, ginabukas sang LPC ang bilog nga sonang gerilya, baseng gerilya kag bug-os nga larangan gerilya sa inyo pagsakop sa NPA, lamang mapreserbar ang aton gintingob nga kusog dira sa matuod kag tampad nga pag-alagad sa katawhan. Aton pundaron ang organong gahum pampulitika sa kaumahan. Isulong ang agraryong rebolusyon kag armadong paghimakas kag i-angat ang inaway banwa sa mas mataas pa nga halintang tubtob sa lubos nga kadalag-an.

[Ang Bayan is the official newspaper of the Communist Party of the Philippines. It is published fortnightly by the Central Committee of the Communist Party of the Philippines.]

https://www.philippinerevolution.info/statements/20180310-us-duterte-kag-pasistang-afp-ang-matuod-nga-mga-terorista