Cebuano news: LGU, Army gihingusgan ang programang Hatud-Serbisyo samtang adunay ‘ceasefire’

From the Philippine Information Agency (Sep 1): Cebuano news: LGU, Army gihingusgan ang programang Hatud-Serbisyo samtang adunay ‘ceasefire’ (LGU, Army intensifiy programs and referral services, while there is a 'ceasefire')

Kapin sa 300 ka mga residente ang nakabenepisyo sa programang "Hatud Serbisyo" sa Impasugong local government unit (LGU) ug sa kasundalohan sa 8th Infantry "Dependable" Battalion (8IB) diin gihingusgan kini agig pagpahimulos sa kasamtangang gideklara nga ‘unilateral ceasefire.’

Niining miaging Biyernes, ang mga ‘medical team’ sa mipahigayon sa pagpanghatag sa libreng serbisyo ngadto sa hilit nga dapit sa Impasugong nga naglangkob sa libre nga pagpang-ibot sa ngipon, pagtuli, ug libre nga mga serbisyo sa “haircut, pedicure, manicure, massage ug reflexology.”

Si Mayor Anthony A. Uy nga maoy nagdumala sa kalihokan, miingon nga tumong sa programa ang paghatag sa kaayuhan ngadto sa katawhan ilabi na niadtong wala kaayo makatagamtam sa serbisyo sa kagamhanan tungod sa kalayo sa ilang dapit, diin kini usab nahi-uyon sa “peace roadmap” ni President Rodrigo R. Duterte.

"Adunay mga nag-unang panginahanglan dinhi ug naningkamot kita nga ato kining mahatag ngadto kanila,” matud ni mayor Uy.

Ang kasundalohan sa 8IB, ingon man usab, mihatag seguridad aron makadangat ang grupo ngadto sa mga hilit nga dapit sa komunidad—kauban ang 4th Infantry "Diamond" Division ‘medical ug dental team’ nga mitabang sa maong ‘convergence’ nga programa.

Si Lt. Col. Lennon G. Babilonia, ang 8IB Commander, miingon nga kini usa ka naandan nga gimbuhaton sa mga yunit diin aktibo silang mo-apil sa mga programa ug mga kalihokan nga gipasiugdahan sa mga LGUs.

"Ubos sa ‘unilateral ceasefire,’ kini mohatag kanato sa dugang nga mga oportunidad sa pag-alagad sa katawhan pinaagi sa ‘Hatud Serbisyo’. Dili lamang kita taman sa giyera. Kinahanglan motabang kita nga maabot ang layo nga mga komunidad. Isip mga sundalo sa Armed Forces of the Philippines, motabang usab kita sa paghatag sa libreng serbisyo tungod kay kabahin kini sa atong Internal Peace and Security Operations pinaagi sa Bayanihan Team nga kalihokan, "siya miingon.

http://news.pia.gov.ph/article/view/1501472720579/cebuano-news-lgu-army-gihingusgan-ang-programang-hatud-serbisyo-samtang-adunay-ceasefire-