Hiligaynon News: Katapo sang NPA nagsungka sa gobyerno

From the Philippine Information Agency (Nov 4, 2020): Hiligaynon News: Katapo sang NPA nagsungka sa gobyerno (By Lorenzo O. Lambatin, Jr.) 

NEGROS OCCIDENTAL, Oktubre 5 (PIA) – Isa ka katapo sang New People’s Army ang nagsungka sa mga awtoridad sining karon lang.

Ang nagsungka nga ginahinago sa ngalan nga "Ka Mel" ang nagpadulong sadtong Oktubre 27 sa Headquarters sang 62IB sa Barangay Libas, Isabela, Negros Occidental dala ang isa ka M16 rifle kag isa ka malaba nga magazine nga may 29 rounds sang live ammunition agud ipahayag ang iya tuyo nga bayaan ang hubon kag magbalik sa sabak sang gobyerno.

Si Ka Mel katapo sang Leonardo Panaligan Command (LPC) Central Negros 1, Komiteng Rehiyon-Negros, Cebu, Bohol kag Siquijor (KR-NCBS) sa idalum sang Squad 2, Samahang Yunit Propaganda (SYP) Platoon sang Ka Bedam.

Suno kay Philippine Army Captain Raymond Jamisal Civil-Military Operations Officer sang 62nd Infantry Batallion, nagbiya si Ka Mel sa hublag agud mag-upod sa iya nga pamilya.

Sa pahayag ni Ka Mel, tuman nga kasubo, gutom kag kabudlay ang nagtulod sa iya sa pagsungka. Ang programa sang Enhanced Comprehensive Local Integration Program (E-CLIP) sa Guihulngan City naghatag sa iya sang kaisog sa pagbiya sa hublag.

Suno sa iya, hindi lang sya ang luyag maghalin sa armado nga hubon nga yara sa idalum ni Ka Bedam.

Gindayaw ni 62IB Commanding Officer Lieutenant Colonel Melvin Flores si Ka Mel bangud sang iya kaisog kag kabalaka sa iya pamilya.

“Nagasaludar ako sa imo nga kaisog kag kaayo bangud ginpili mo ang imo pamilya kaysa magpadayon sa hublag,” pahayag ni Col. Flores

Suno kay Col. Flores mangin inspirasyon sa iban nga katapo sang NPA ang ginhimo ni Ka Mel nga pagbalik sa gobyerno kag mangin isa ka huwaran nga Filipino.

Ginsiguro niya nga maka-agum si Ka Mel sang tanan nga benepisyo nga mahatag sang E-CLIP kag sang City Task Force-ELCAC

Ginhangkat ni Col. Flores ang mga kaupod ni Ka Mel nga magpasag-uli man sila sa gobyerno agud maka-upod nila ang ila nga mga pamilya kag kabataan.

“Wala nagasira ang amon ganhaan para sa inyo, apang kon kamo magabato, wala na kami mahimo kundi ipatuman ang laye kaangay sang inyo lideres nga sanday Ka Nona kag Ka Baldo nga yara subong na sa prisuhan bangud sang ila nga mga iligal nga hilikuton,” pahayag ni Flores. (JSC/Lljr/PIA6 Negros)

https://pia.gov.ph/news/articles/1058065