Unang kaso batok NPA tungod sa paglapas sa IHL pormal nga giduso sa korte

Posted to the Philippine Information Agency (Dec 1, 2019): Cebuano News: Unang kaso batok NPA tungod sa paglapas sa IHL pormal nga giduso sa korte (By Bernadith G. Epan)

MALAYBALAY CITY, Bukidnon, Nov. 22 (PIA) --Unang kaso batok sa New People’s Army kon NPA tungod sa paglapas niini sa International Humanitarian Law kon IHL pormal nga gi-file niadtong Miyerkules, Nobyembre 20, 2019, sa Regional Trial Court Branch 25, ang korte nga gitudlo aron mo-atiman sa mga kaso nga may kalabutan sa IHL dinhi sa rehiyon.

Gibutyag ni Bukidnon Provincial Prosecutor Rommel Alonto nga ang kaso may kalabutan sa pag-atake nga gihimo sa mga myembro sa NPA sa Sitio Aurora, Barangay Santo Niño sa Manolo Fortich, Bukidnon niadtong Mayo 28, 2019.

Matud ni Alonto nga ang mga akusado mao sila ni Omben alyas “Ronron, alyas Jhon”; Lino Namatidong alyas “Dahun”; Mylen Colita alyas “Maymay”; ug Toto Taquin alyas “Jepoy” nga tanan ubos sa Sub Regional Command (SRC) 1 ug 2 ug Guerrilla Front 89 sa North Central Mindanao Regional Committee (NCMRC).

Sumala niya, ang nasangpit nga mga akusado nakalapas sa dili makatarungan ug dili-tawhanong pagtratar kang Ramiro Melgo Restauro, usa ka barangay tanod sa Santo Niño nga usa ka sibilyan.

Si BrigGen. Edgardo De Leon, 403rd Infantry Brigade commander, miingon nga ang insidente giangkon sa tigpamaba sa NCMRC nga si Pia Paraiso.

Miingon si De Leon nga na-dokumento kini sa mga testigo ug ang biktima makaila sa mga sad-an.

“Hindi pinapayagan ng IHL na idamay ang mga sibilyan. Sa ilalim ng IHL, ang mga biktima ng karahasan ay ‘entitled’ na magkaroon ng ‘indemnification’. Aside from that, yung mga gumawa ng karahasan ay dapat mabigyan ng sentensyang kriminal,” dugang pa niya.

Sumala ni De Leon nga nangandam sila sa mga kaso sa paglapas sa IHL batok sa NPA ubos sa NCMRC aron mapahunong ang ilang padayon nga pag pangataki batok sa mga sibilyan.

“Ang tanan namong gihimo nahi-uyon sa IHL ug among gi-seguro nga ang tanan namong operasyon wala nakalapas sa mga probisyon sa IHL. Mao sad unta ang angay buhaton sa mga NPA, tanan nga mga aksyon kinahanglan nga nahisubay ug motuman sa mga probisyon sa IHL,” dugang niya.

Samtang, si Regional State Prosecutor Merlyn Uy miingon nga panahon na alang sa gobyerno nga i-‘file’ ang kaso sa IHL aron ang pamunuan sa NPA ug mga miyembro nga responsable dunay tulubagon ubos sa balaod.

"Kami, nga mga mag-uusig sa Department of Justice, nia aron usisa-on ang tanan nga mga taho ug reklamo sa posible nga mga paglapas sa balaod. Sa panahon nga kita maghusay sa usa ka kaso alang sa imbestigasyon, wala kami'y dapigan tungod kay kinahanglan nato mahibal-an kung dunay posibilidad nga suportahan ang usa ka kaso nga gisang-at sa korte. Sa higayon nga makit-an namo ang posible nga hinungdan, uban kami sa gobyerno ug nag presentar sa gobyerno sa pagpahamtang sa tanan nga mga nakasala sa balaod, matud ni Uy. (BGEpan/PIA Bukidnon)

https://pia.gov.ph/news/articles/1030999