Rebeldeng NPA patay sa engkwentro

From the Philippine Information Agency (Nov 20): Rebeldeng NPA patay sa engkwentro

Usa ka sakop sa rebeldeng New People’s Army (NPA) ang patay sa usa ka engkwentro sa mga tropa sa gobyerno didto sa amihanan-sidlakan nga utlanan sa Bukidnon ug Misamis Oriental sa Sitio Kalha-an, barangay Minalwang, Claveria, Misamis Oriental, niining Martes.

Si Lt. Norman Tagros, ang spokesman sa 8th Infantry Battalion, sa interbyu sa radyo miingon nga ang nasangpit nga mga NPA gituohan nga hiniusa nga mga elemento sa Guerilla Front 4B, North Central Mindanao Regional Committee (NCMRC) ubos sa mando ni Lino Namatidong alyas “Dahon” ug sa Headquarter Force niini ubos sa mando ni Dionisio Micabalo alyas “Muling.”

Nakuha diha sa “battlefield” kon panggubatan ang us aka AK-47 nga armas nga dunay 30 ka rounds nga magasin, bala ug propaganda nga mga dokumento sa Communist Party of the Philippines–New People’s Army-National Democratic Front (CPP-NPA-NDF).

Ang taho sa Philippine Army miingon nga ang mga kauban sa namatay nga NPA nasamdan usab tungod sa daghang tulo sa mga dugo nga nagkatag diha sa ilang mga agianan atol sa ilang pag-eskapo.

Hinuon, walay report nga nasamdan o nakalas sa mga kasundaluhan sa gobyerno.

Ang 4th Infantry "Diamond" Division sa Philippine Army, pinaagi nila ni 403rd Infantry Brigade Commander Col. Jesse A. Alvarez ug 8th Infantry Battalion Commander Lt. Col. Lennon G. Babilonia, miingon nga kamulo sila karon nakig-alayon uban sa local government unit sa lugar aron sa pagtabang sa pamilya sa namatay’ng NPA ug pagtanyag sa tabang ngadto sa ubang mga miyembro sa NPA nga nasamdan panahon sa engkwentro.

Ang patay’ng lawas sa NPA anaa karon sa Hagpa, Impasugong, Bukidnon. Ang mga opisyal sa army ug mga lider sa Indigenous People miingon nga ang mga paryente sa gipatay nga rebelde kinahanglan mopakita ug motambong sa “vigil” tungod kay ang namatay nagkinahanglan usab sa takos ug desente nga paglubong.

http://news.pia.gov.ph/article/view/1501416474104/cebuano-news-rebeldeng-npa-patay-sa-engkwentro