Spokesperson
NPA-Surigao del Sur
Northeast Mindanao Regional Operational Command
New People's Army
January 27, 2022
Dili aksidental kun dili usa ka tinuyo ang pagkapatay ni CAA Mark Bernard Dawog Maca, 18 anyos, ulitawo, Manobo, bag-ong gradwet sa Caa ug residente sa barangay Pakwan, Lanuza, Surigao del Sur. Usa ka dakong bakak ang gipasiatab sa 75th IBPA nga usa kuno ka aksidental ang pagkamatay ni Maca kaniadtong Enero 23, 2022 sa may alas 5:00 sa hapon didto sa Dreamland Patrol Base, Alba, Tago, Surigao del Sur.
Matod sa pulis report, gibutang kuno ibabaw sa lamesa ang M16 (pinatindog) nga isyo ni Caa Rodel Quillano Maca sulod sa bunker. Gipunit kuno sa biktima ang pusil ug nasabod ang trigger niini sa liston sa military knapsack. Aksidental kuno nga naigo ang iyang tuong bukton ug dughan nga maoy hinungdan sa iyang hinanaling kamatayon.
Dili na kini bag-o nga mga pasumangil sa AFP kun adunay mga mamatay sa ilang han-ay. Wala nila angkuna ang kamatuoran nga adunay lalom nga mga bangiay tali sa han-ay sa kadreman ug mga CAFGU niini sulod mismo sa ilang mga kampo detatsment. Madumduman nga kaniadtong tuig 2019, gipatay sa kadreman sa detatsment sa brgy Pakwan, Lanuza, Sds ang usa ka membro sa CAFGU niini tungod kay gikabit sa kadreman ang asawa niini.
Sa pikas bahin walay tubag si Rico Maca (ang tribal datu sa NCIP-SDS) lambigit niini nga isyo, iya man untang kadugo ang gipatay. Nagpaila lang gyud siya sa iyang pagkaitoy sa 75th IBPA.
Ang pagkapatay ni Maca naghulagway lang sa pagkadunot ug pagkapasista sa AFP/PNP ug rehimeng Duterte. Lutaw kaayo ang mga bangiay sulod sa ilang han-ay. Nasayang lang ang kinabuhi ni Maca sa pag-alagad sa mga mapahimuslanon ug madaugdaogong hut-ong.
Nag-awhag ang NPA-SDS sa mga CAFGU nga moundang na sa ilang trabaho. Gipasabong-sabong lang kamo sa inyong mga kadreman, gamay pa kaayo ang inyong sweldo, walay benipisyong madawat, ginahimo pa kamong mga suloguon ug ginapatay sa dili makatarunganong hinungdan.
https://cpp.ph/statements/caa-maca-tinuyong-gipatay-dili-aksidental/
No comments:
Post a Comment
Note: Only a member of this blog may post a comment.