SPOKESPERSON
NPA-ABRA
NEW PEOPLE'S ARMY
JANUARY 17, 2020
Nainget a kondenaren ti kabaroanan manen a panangliplipit ti AFP-PNP kadagiti umili ti Bgy. Ud-udiao, Bgy. Bazar, ken Bgy. Naguilyan Sallapadan, Abra. Dagiti 17 a sibilyan ket saan a kameng ti NPA-Milisyang Bayan. Isuda ket sibilyan a sigud Bgy. Kapitan, Bgy. Kagawad, tanod, pastor ti relihiyon, ken kameng dagiti tradisyonal nga organisasyon ti mannalon ken kababaihan.
Saan a makatao ti aramid ti 24th IB ken Abra PNP kadagiti sibilyan. Babaen iti Oplan-Kapanatagan – EO70 – NTF-ELCAC gapu ta piliten, allilawen, ken pangtaan da dagiti sibilyan tapno aklonen ti awanan basaran a pammabasol kas NPA inggana iparang isuda kas surenderi. Nayon pay, dakkel a pagkurakotan daytoy dagiti opisyal ti militar ken pulis babaen iti bilyon a pondo ti E-CLIP.
Agarup dinominggo a papaayaban da dagiti sibilyan tapno mainteroga ken kariyan da ti “cash grant” tapno agsurender, sa da awisen nga agisuko ti paltog ken agbalin a CI. Uray dagiti kameng ti LGU ken sibilyan nga ahensya ti gubyerno ket pinagbalin ti militar kas instrumento ti panangiyablat ti ranggas ken kurap nga E-CLIP.
Ti New People’s Army ket nabayagen lumablaban iti narungsot a gubyerno a tengngel dagiti agum nga imperyalista, apo’t daga, ken burukrata-kapitalista. Ti NPA ket mangirusruswat ti armado a pannakidangadang tapno lappedan dagiti gangganaet a kumpanya ti minas, dam, logging ken geothermal. Nainkalintegan ti ilablaban ti NPA!
Apay a kayat ti gubyerno a pasurenderen ti NPA? Ken apay a liplipiten ti gubyerno dagiti umili? Tapno awanen ti mangdillaw iti kurapsyon, tapno makontrol da amin a natural a kinabaknang ti Kordilyera ken intero a Pilipinas, sa da ilako kadagiti amo da nga imperyalista.
Ngarud, ti panawagan ti ABC-NPA-Abra kadagiti umili ken makabayan a pulitiko iti Abra ket reppeten ti panagkaykaysa, irupir ti karbengan-tao, ibutaktak ken supyaten ti pasista a turay ni Duterte!
Ti kinadamsak ti rehimen US-Duterte ken dagiti ramramay na ket nasken laeng a singeren ken dusaen babaen iti rebolusyonaryo nga hustisya!
LABANAN KEN PAAYEN TI OPLAN- KAPANATAGAN!!!
IBAGSAK TI PASISTA A TURAY A US-DUTERTE!!!
IPINGET KEN IYABANTE TI GUBAT TI UMILI, INGGANA’T BALLIGI!!!
TUMIPON ITI ARMADO A DANGADANG!!!
SUMAMPA ITI NEW PEOPLE’S ARMY!!!
https://cpp.ph/statement/sibilyan-iti-sallapadanabra-liplipiten-ken-alallilawen-ti-joint-afp-pnp-oplan-kapanatagan/
No comments:
Post a Comment
Note: Only a member of this blog may post a comment.