Cebuano News: Army nag-awhag sa CPP-NPA nga tahuron ang gipirmahan sa CARHRIHL

From the Philippine Information Agency (Jan 25): Cebuano News: Army nag-awhag sa CPP-NPA nga tahuron ang gipirmahan sa CARHRIHL

Gi-awhag ni 403rd Brigade Commander Col. Edgardo Y. De Leon ang CPP-NPA-NDF nga tahuron ang gipirmahan niini nga kasabutan nga naa sa Comprehensive Agreement on Respect for Human Rights and International Humanitarian Law kon “CARHRIHL.”

Kini tungod sa padayon nga pagpanghadlok ug pagpatay sa mga sibilyan nga gihimo sa teroristang CPP-NPA.

“Mipirma ang CPP-NPA-NDF sa CARHRIHL nga kasabutan nga ginadili ang pagpatay, pagpanghadlok, ug pagpanakit sa mga sibilyan nga walay labot sa armadong kagubot. Mipirma usab sila nga dili manghilabot sa mga kabtangan nga gipanag-iya sa mga sibilyan. Pero gikasubo nato tungod kay ang mga NPA wala gayod mituman niini nga kasabutan tungod kay padayon sila sa pagpamatay ug paghulga sa mga sibilyan,” sulti ni De Leon.

Kining CARHRIHL nga kasabutan wala kaayo mahibaw-i sa katawhan. Ang NPA ug ang Philippine Army dapat pareho nga mosunod ug motuman niini nga kasabutan, dugang niya.

Tungod niini, gihangyo sa 403rd Brigade Commander ang 22 ka mga Mayor sa Bukidnon, mga trabahante sa lokal nga kagamhanan—ubos sa pag-abag sa media—nga unta tabangan ang kasundalohan sa pagpakaylap niini nga ‘Agreement’ aron masigurado ang proteksyon sa mga sibilyan batok sa mga pagpatay ug pagpanghulga sa teroristang CPP-NPA.

“Para sa mga rebeldeng CPP-NPA nga hangtud karon wala pa misurender ug naa gatago-tago sa kabukiran, tahuron nato ang mga sibilyan pinaagi sa pagtuman sa inyong gipirmahan nga kasabutan sa CARHRIHL,” matud ni Col. De Leon.

https://pia.gov.ph/news/articles/1017594