CPP/NPA-Panay: Sa Liwat, si Duterte Bilang isa ka Psyho Killer

NPA-Panay propaganda statement posted to the Communist Party of the Philippines Website (Feb 23): Sa Liwat, si Duterte Bilang isa ka Psyho Killer

Ka Julio Montana, Spokesperson
NPA-Panay (Coronacion Chiva “Waling-Waling” Command)

23 February 2018

Pakitang-tao lang ang pagkadto ni Duterte sa Sara, Iloilo sining Pebrero 22, sa kuno pag-unong sa haya ni Joanna Demafelis, ang OFW nga ginpatay sa Kuwait. Mas importante kay Duterte ang pagbuhos panahon sa iya mga tropa sa 301st Bde sa Camp Hernandez, Dingle, Iloilo.

Sa atubang sang iya mga mersenaryo nga tropa ginmandu niya ang labing makangilidlis nga pagpamatay — ang pagpugot sang ulo sang mga NPA, isulod sa balde nga may ice kag dalhon sa iya. Kabaylo sini, magahatag kuno siya sang padya nga P25,000 kon ordinaryo nga NPA ang mapatay kag P50,000 naman kon iskwad lider. Ginpanubo na ini sang nauna nga anunsyo ni Duterte kag sang AFP nga maghatag sang P100,000 sa makapatay sang suspetsado nga NPA. Antes sini, ginmandu man sang macho-pasistang Duterte nga pangluthangon sa ila kinatawo ang mga babae nga suspetsado nga NPA.

Mabaskog namon nga ginakondenar ining ginahimo sang pasistang rehimeng US-Duterte.

Ano nga klase sang presidente ang nagagahum subong sa Pilipinas nga nagamandu sa iya AFP-PNP sa pagpamugot-ulo sa suspetsado nga NPA kag pagpangluthang sa ila kinatawo sa mga babae nga ginasuspetsuhan nga rebelde? Isa siya ka presidente nga psychopath killer.

Ginapakita ni Duterte sa publiko kag sa internasyunal nga komunidad nga ang gubyerno kag AFP-PNP amo ang tunay nga terorista kon sa diin, pinulo-pulo ka libo na ang ginbiktima sa ginlunsar nga gyera-kontra druga, gyera kontra-Moro, kag tudo-gyera kontra sa NPA kag pumuluyo.

Ining pinakaulihi nga mandu sang presidente sang republika sang Pilipinas kag commander in chief sang AFP sa may padya nga pagpamugot-ulo, nagahimo sa pwersa sang AFP kag PNP bilang mga kurap kag kriminal nga mga bounty hunters. Ginagarantiyahan pa gid ni Duterte ang AFP, PNP kag mga paramilitar nga wala sila sang salabton sa dugang nga mga krimen kag malaparan nga paglapas sa tawhanon nga kinamatarung sang pumuluyo kag sa internasyunal nga layi sa gyera.

Ang iya mga ginmandu nagalapas sa kasugtanan sa Comprehensive Agreement on Respect for Human Rights and International Humanitarian Law (CARHRIHL) ilabi na sa isyu sang pagrespeto sa mga bangkay/patay. Ginadumilian sa internasyunal nga layi ang terorista nga pagpamatay kag desecration sa mga bangkay. Pero ginatulod ni Duterte ang terorismong pagpamugot-ulo gamit ang linibo nga padya halin sa buwis sang mga pumuluyo kag hampangan kag makangilidlis nga abusuhan ang mga kababainhan paagi sa paglugos kag pagluthang sa ila kinatawo.

Ginsaad man sa Geneva Convention sadtong 1949 nga ano man nga porma sang kalakasan sekswal ukon ang mga kaangay sini ang isa ka krimen batuk sa katawhan kon sistematiko nga ginahimo kag pasulit-sulit. Ining mandu sang commander-in-chief sang AFP nga luthangon sa ila kinatawo ang mga babae nga NPA isa sa signal sang amo nga krimen kag maathag nga paglapas man sa internasyunal nga layi.

Tuman na gid ka desperado ang rehimeng US-Duterte sa padayon nga pagbaskog sang NPA kag rebolusyonaryong pwersa sa bug-os nga pungsod. Baliskad ini sa ginahandum sang rehimen nga pakupuson sang katunga ang NPA antes magtapos ang 2018. Gani ginahimo sini ang sistema sang bounty-hunting, ang paltik nga mga pasurender, dalagkuan nga pagpang-atake kag gyera sa kaumhan agud kugmaton ang pumuluyo.

Nagaduda kami nga si Duterte wala sa husto nga pamensaron sang ginhimo niya ang amo nga mga mandu nga maathag nagabayolar sang International Humanitarian Law, bangud iya ginapabugal nga isa siya ka maayo nga abugado nga nakaintindi sang layi. Ukon mas tulod pa ini sang iya indi mapunggan nga kauhaw sa dugo kag pagtampalas sang tawhanon nga kinamatarung.

Ang indi matarung nga gyera ni Duterte nagapalubha lang sa pag-antus sang malapad nga pumuluyo. Akig ang mga imol sa una pa lang nga hugnat sa pagpuga sa pagpamuhis paagi sa Tax Reform Acceleration and Inclusion (TRAIN) nga nagpalala sang gutom. Nagtaas ang presyo sang mga balaklon kag nagaiwat ang suplay sang bugas. Nagaupod kami sa handum sang pumuluyo sa tunay nga mga pagbag-o. Nagalapad ang suporta sang pumuluyo para sa armadong paghimakas nga amo ang banas sang tunay nga pagbag-o.

Bisan pa hatagan sang kahigayunan, ang NPA-Panay indi maghingabot sa ulo ni Duterte. Ang ginakalangkagan namon nga buligan nga mabagsak amo ang US-papet kag pasista nga rehimen paagi sa pagpasingki sang inaway sang pumuluyo sa bug-os nga pungsod agod mapatuman ang tunay nga reporma sa lupa kag pungsudnon nga industrialisasyon. Ang tunay nga pagbag-o sa katilingban ang nagakadapat para sa pumuluyo labi na sa nagahimud-os nga masa sangsa mahabok nga malaw-ay nga ulo sang teroristang psycho nga Duterte.

https://www.philippinerevolution.info/statements/20180223-sa-liwat-si-duterte-bilang-isa-ka-psyho-killer