Monday, February 26, 2018

CPP/NPA-Panay: Magbangon, Macho-Pasista nga Rehimeng US-Duterte Pukanon

NPA-Panay (Red Detachment of Women) propaganda statement posted to the Communist Party of the Philippines Website (Feb 21): Magbangon, Macho-Pasista nga Rehimeng US-Duterte Pukanon

Ka Randa Femina, Spokesperson
NPA-Panay (Red Detachment of Women)

21 February 2018

Indi na kinahanglan suliton pa ang istorya ni Joanna Demafelis. Ang iya istorya nabrodkas na sa bug-os nga pungsod sang nagligad nga simana. Istroya ini sang walay kaluoy kag makakulugmat nga tortyur.

Nakibot ang bug-os nga pungsod sa istorya ni Demafelis, bangud pa kay nasapwan siya sa freezer kag indi pa bangud nasapwan siya nga bangkay. Kag diri nakita ang matuod nga kakugmat, ang madinuguon nga lansang nga walay katapusan nga ginapalpag sa lungon sining pungsod. Ang istorya ni Joanna indi bag-o, isa lang ini ka hilo sang hablon sang pang-abuso sa mga Pilipino nga nagaluntad sang pila na ka dekada. May pagbaton kita sing may kaluoy kag nagakabalaka nga pagdayaw sa indi malingkang nga determinasyon sang aton mga kasimanwa nga magsulay sang makamamatay nga brutalidad nga ginakomiter batuk sa ila. Tanan ini, para gid lang nga makapadala sang gamay nga sweldo sa ila mga pamilya.

Ang mga istorya sang pagpanglugos, pagpang-abuso kag pagpang-ulipon nangin kinaandan na nga halos ginabaton na kag ginalauman sang isa ka pungsod nga ginahalinan sang barato nga kusog-pangabudlay kag balagsakan sang imperyalista sang ila mga sobrang produkto, makamamatay nga bakuna kag kagamitan militar. Sa gubyerno nga nagayaob sa dumuluong nga mga interes kag bastos-baba kag bully nga presidente nga nagabaid sang iya bangkil agud magpangsakit, magpamatay kag magpamahug sa iya kaugalingon nga pumuluyo, tanan kita mga biktima sini.

Si Duterte kabug-usan sang macho-pasista nga ang pagtawag sa iya nga baboy, insulto sa tanan nga matuod nga baboy. Ano nga klase sang tawo, lider sang pungsod nga nagayuhom sa pagpanglugos sa mga journalist, nagagarantiya sang pagkawalay-salabton sang iya mga suldado nga manglugos sa kababainhan nga Moro, kag magmandu sa sining mga suldado mismo sa pagluthang sa kinatawo sang mga babaye nga rebelde? Ano nga klase sang tawo ang makahambal sang tuman nga kalakasan sa kababainhan nga babaye man gani ang iya anak, ang iya asawa, iloy, kag ang iya kauturan? Ang iya pagkaugot sa mga imol nga mga pumuluyo nga nagaantus na gani labi niya nga ginapalubha paagi sa tudo pa gid nga pagpangpuga. Ang rehimeng US-Duterte wala nagabalor sang kabuhi kag mga kinamatarung sang mga nagaantus kag ginahimuslan nga imol nga ginalantaw niya nga “problema” sang katilingban.

Apang ang mga kababainhan sini nga pungsod indi biktima ukon problema sang katilingban. May kasaysayan kita sang walay kalingkang kag wala nahadlok sa rebolusyon, sang pagpakig-away sa aton mga kinamatarung kag sang mga kabataan. Indi kita ang problema apang kita mangin solusyon. Ang mga kababainhan sa NPA indi magsugot nga mangin biktima kundi mangin manughilway sang ila kaugalingon kag sang pungsod.

Ang mga tinaga ni Duterte nagaserbi nga hangkat kag nagapabaskog sa aton. Ini nga mga tinaga indi bag-o sa aton palamatin-an, sa matuod ini ang mga rason ngaa nagapakig-away kita, kag kada adlaw ginahatagan kita sang rason sa pagpakig-away asta sa katapusan. Sa macho-pasista nga Duterte, ginademanda namon ang pagrespeto kag kasiguruhan sa amon kinamatarung, sa amon lawas kag sa aton palaabuton. Ipasiguro namon ini paagi sa rebolusyon.

Ini ang panawagan halin sa kababainhan sang rebolusyon para sa aton nga isigka-babae kag pumuluyo nga Pilipino. Dapat kita nga maghulag, kon sa intelektwal kag legal nga paghimakas man ukon sa pagkaput sang armas. Magkambit-braso kag kuom-kamot, aton pukanon kag dugmukon ang US-Duterte nga pasistang rehimen!

(Red Detachment of Women–Panay, is a women’s group participating in the armed struggle, they are the fulltime Red fighters of the NPA, members of local militia units and self-defense corps in the localities.)

No comments:

Post a Comment

Note: Only a member of this blog may post a comment.