PRLEC han TF ELCAC nagbisita para tagan ayuda, kalungganayan an mga tay-aw nga barangay

From the Philippine Information Agency (Nov 26, 2020): PRLEC han TF ELCAC nagbisita para tagan ayuda, kalungganayan an mga tay-aw nga barangay (By Ninfa Iluminada B. Quirante)

BORONGAN CITY, Nov. 26 (PIA) -- Narahigos an mga baryuhanon han Brgy. Sta Cruz, Dolores han duungan hira hin duha nga bote sakay in 39 ka tawo nga miembros han Poverty Reduction Livelihood and Employment Cluster nga pinangungunahan han TESDA Representative Sue Balles, han Mierkoles nga adlaw.

Ha nasabi nga katitirok, ginpatuman an minimum health protocol sama han physical distancing ngan pagtaod hin face masks han mga tumambong han katitirok.

Hini nga higayon, gintagan hin 50 nga training scholarhip slots hi Punong Barangay Jonathan Capacite para han ira mga ka barangay.

Mag-aaram an mga taga Sta. Cruz hin bread and pastry making ngan carpentry basi daw makabulig han ira pamilya.

Hi Rosemil Cidro Nicanor, 21 anyos in pursigido daw mag-aram komo magnenegosyo hiya hin tinapay. Damo daw nagkikinahanglan hin tinapay ha ira barangay.

Usa gihap nga trainee hi Ruel Sister, 41 anyos ngan may pamilya in intresado naman pag aram han carpentry. Waray daw hiya mahuman pag-eskoyla salit karuyag niya mayda hiya guti nga kinaadman sugad pagpanday.

"Mahal na yana pagsuhol hin panday, pagpaupay hit balay, kun hibaro ak, maglulugaring nala ak pagupay hit am balay ngan bangin magpaupay pa it akon anyaw, dugang nga akon income," sumat ni Ruel.

An trainees in makakatagamtam hin P160 training allowance kada adlaw, internet allowance nga P500 ngan anti-COVID-19 mask and health kits nga P500 gihapon, sumala kan TESDA Sue Balles.

Iginlansar gihapon an programa han TESDA nga Agrikultura at Kabuhayan Tungo sa Kaunlaran at Pangkapayapaan (AKKAP), ini in mga serbisyo ngan mga ayuda nga igagahin han mga barangay nga aada han Task Force-End Local Communist armed Conflict (TF-ELCAC). Natuod an gobyerno nga kun matatagan ini nga mga barangay han ira mga panguna nga kinahanglan dire na hira mag-giginapil ha mga walhon nga grupo ngan magiging mahimyang na an barangay.

Nagpahamtang gihapon an DTI, DA-OPAS, AFP, PNP, DAR, DENR, NIA, PSWDO, DILG, PNP ngan Phil. Army ngan LGU han ira mga serbisyo.

Naglalaom naman hi PB Capacite nga matutuman an iya mga hingyap para han iya barangay. (nbq/PIA E.Samar)

https://pia.gov.ph/news/articles/1060107