Hiligaynon News: Dugang nga AFP medical team nag abot sa Bacolod City

From the Philippine Information Agency (Oct 7, 2020): Hiligaynon News: Dugang nga AFP medical team nag abot sa Bacolod City (By Lorenzo O. Lambatin, Jr.)

NEGROS OCCIDENTAL, Oktubre 7 (PIA6) -- Nag-abot sining karon lang ang tatlo ka hubon sang medical team nga maga bulig sa syudad sang Bacolod sa pag pakig bato sini sa coronavirus disease 2019 (COVID-19), suno kay 303rd Infantry Brigade (IB), Civil Military Officer Captain Kelvin Bayaban.

Ginbaton sila ni Colonel Michael Samson nga Deputy Brigade Commander sang 303rd IB sa Bacolod-Silay Airport, kon diin sila gin abi-abi kag ginpahibalo sang ila hilikuton kag kon sa diin sila ipahamtang.

Suno kay Bayaban, ang nasambit nga medical team gin padala man sang una sa Cebu sang nagsaka ang kaso sang COVID-19 didto.

Ang dugang nga AFP medical team gin pangunahan ni Captain Romuel Rabara.

Paga buslan nila ang nahauna nga duha ka AFP Medical Team nga gina pamunoan ni Captain Liza Dorao sang Medical Corps bangud natapos na ang ila tour of duty sang bulan sang Septyembre.

Sila magadugang sa mga katapo sang frontline medical workers sa syudad sang Bacolod agud mapanubo ang mga kaso sang COVID-19.

Igapadala ang duha ka hubon sa at Riverside Hospital kag ang isa naman sa Queen of Mercy Hospital.

Samtang, si Colonel Samson nagpahayag sang iya pagpasalamat sa Commander sang Central Command AFP sa amo nga programa nga may tuyo magbulig sa mga masakiton kag mag luwas sa kabuhi sang madamo nga pumoluyo. (JSC/Lljr/PIA6 Negros Occidental)

https://pia.gov.ph/news/articles/1055354