TAGBILARAN CITY, Bohol — Wala na magsubay sa ideyolohiya sa gun-ob na nga komunista ang mga sakop sa armado nga front sa Communist Party of the Philippines (CPP) nga New People’s Army (NPA).
Kini maoy gibutyag nga panahum ni 47th Infantry Battalion Commanding Officer Lieutenant Colonel Eufracio Malig Jr., didto sa labing bag-ong tigum sa Provincial Peace and Order Council (PPOC) sa adlaw mismo nga gisaulog sa ilang ika 50 ka tuig nga kasumaran ang NPAs.
Kini usab samtang gipangutana sa mga sakop sa PPOC nagdto kang Col. Malig kon unsa sa iyang tan-aw ang epekto sa pagpa-undang na sa hisgutay sa kalinaw tali sa kagamhanan ug sa CPP NPA National Democratic Front, segun sa mandu ni Presidente Rodrigo Duterte.
Sa personal nga panahum sa opisyal sa kasundalohan nga nia sa Bohol, dako siya nga uyon ug suporta sa desisyon sa Presidente.
“Sayud kita nga kanunay na nato nga gibugtaw ang hisgutay sa kalinaw sa pipila na kaadminsitrasyon nga minglabay, ug parehas ra gihapon ang resulta, matud ni Malig ngadto sa mga sakop sa PPOC.
Gani, ang pagtanyag sa hisgutay sa kalinaw, matud pa sa opisyal, maoy higayon nga gigamit sa mga rebelde nga makapalig-on pa sa ilang kawsa, pahinumdom sa opisyal.
Niini, matud niya, bisan ang Armado nga Kusog sa Nasud (AFP) misuporta na pagtangtang na sa hisgutay sa kalinaw, tali sa mga kadagku-an sa CPP-NPA-NDF ug sa kagamhanan sa Pilipinas.
Niini, kadtong mga tinugyanan sa CPP-NPA-NDF, mahimo na nga dakpon kon makit-an sila ug wala na silay immunity sa balaod nga mahimong nanalipod kanila kon may peace talks.
Hinuon, matud ni Col Malig, walay kwestyon ang padayon nga hisgutay sa kalinaw sa likal nga mga lugar nga may mga suliran sa rebelyon ug may nanggawas na nga buot nang manginabuhi nga malinawon kay gikapoy na sa pagtagotago sa bukid.
“Kasagaran kanato dinhi nasayud na nga daghan na sa kanila ang gipangkapoy na sa gubat, ug buot na nga magmalinawon, gawas lamang sa mga lider nila nga padayon pang nabulahan sa sakripisyo sa ilang mga mangugubat,” saysay ni Malig.
Ang sitwasyon sa ubos, matud pa sa opisyal, ang ideyolohiya, nahimo na nga negosyo: ang mga NPA maoy nag-agwanta sa pagpanulis samtang ang ilang mga opisyal, nagpahayahay.
https://pia.gov.ph/news/articles/1021116
No comments:
Post a Comment
Note: Only a member of this blog may post a comment.