CPP/NPA-Central Negros: Militarisasyon sa Central Negros Ginakondenar sang NPA

NPA-Central Negros propaganda statement posted to the Communist Party of the Philippines Website (May 30): Militarisasyon sa Central Negros Ginakondenar sang NPA

JB Regalado, Spokesperson
NPA-Central Negros (Leonardo Panaligan Command

30 May 2018
Press Release

Mabaskog nga ginakondenar sang LPC-NPA ang militarisasyon nga ginapatigayon sang 62nd IBPA sa border nga binukid sang Guihulngan kag Moises Padilla nga nagsugod sadtong Mayo 24, 2018 sang gab-i tubtob subong Mayo 30, 2018.

Ginakondenar man sang LPC ang pagtiner sang nasambit nga yunit militar sa mga panimalay sang pumuluyo. Ginhimo nga kampo militar ang mga puluy-an nila Jaime Dayundon sang sityo Tuko, Billy Pitolan sang sityo Nabakalan, Gauden Alibo sang sityo Mantuna kag Anot Ordoñez sang sityo Bungao tanan sang Brgy. Trinidad, Guihulngan, Negros Oriental.

Lubos man ginakondenar sang NPA ang pagdakop kag pagdetinar sang 3 ka oras sang 62nd IBPA kay Jesus Rafols nga isa manug-oling sang sityo Bungao, Brgy. Trinidad, Guihulngan. Alas 3:00 sa kaagahon nga nagpanaug sa ila balay si Jesus Rafols kag nagkadto sa iya olingan sang ginadakop siya sang militar sadtong Mayo 25, 2018. Samtang ginpapauli siya sang militar alas 6:00 na sang aga kay kuno NPA kag basi manugid sa iya mga kaupdanan nga ara ang ini nga yunit militar sa nasambit nga olingan.

Bangud sini, nahadlok kag nakugmat ang mga mangunguma. Halos indi na talunsay makatrabaho sa ila mga uma bangud sang pagsunud-sunod kag pagmonitor sang ila mga hulag. Bisan sa pagpanag-ob, pagpaligo kag iban pa nga personal nga nesisidad sang pumuluyo labi na gid sang kababaihan ginamonitor pa sang militar. Bangud sang pagduda sang militar, ginabantayan ang tanan nila nga paghulag. Labi nga nakugmat ang mga mangunguma sang nagpalupad na ang naga-operasyon nga militar sang indi pa ma-identify nga kinaiya sang drone sa nasambit nga lugar kada alas 8:00 sang aga kag kada alas 5:00 sang hapon sadtong Mayo 26-Mayo 29, 2018. Tuyo sini nga masundan ang tanan nga hulag kag lihok sang pumuluyo sa lugar.

Ang LPC-NPA padayon pa nga mag-imbestigar sa mga pumuluyo sa lugar labi na sa isa ka hitabo nga pag-abuso sekswal sa isa ka pamilya sa sityo Cupad, Brgy. Macagahay, Moises Padilla. Inisyal nga pagpangusisa sang NPA sa pumuluyo, ginhimo ang krimen panahon nga naga-operasyon ang militar.

Ang ini nga operasyon militar nga ginlunsar partikular na sang 62nd IBPA idalum sa 303rd BdePA, maathag nga padayon nagalapas ang AFP sa CARHRIHL kag nagamanipestar sang pagsabotahe sini sa liwat nga pagbukas sang Peacetalks sa tunga sang NDPF kag GRP nga gintalana sa bulan sang Hunyo 2018.

Gani nagapanawagan ang LPC sa bulig sang tanan nga mga human rights advocates labi na gid sa mga katapo sang tri-media sa direkta nga pagpangusisa sa nasambit na nga lugar. Subong man ang pag-expose sang matuod nga panghitabo kag pagdenunsyar sang militarisasyon sa Central Negros.

https://www.philippinerevolution.info/statements/20180530-militarisasyon-sa-central-negros-ginakondenar-sang-npa