CPP/NPA-North Eastern Mindanao: Mga Tropa sa 30th IBPA desperadong nag-unay, usa patay ug usa samaron

New People's Army propaganda statement posted to the Communist Party of the Philippines Website (Mar 10): Mga Tropa sa 30th IBPA desperadong nag-unay, usa patay ug usa samaron

Ka Ariel Montero, Spokesperson
NPA-Northeastern Mindanao
10 March 2017

Dakung bakak ang gipamahayag ni Lt. Col. Amaro, CO sa 30th IB PA, nga adunay nahitabong enkwentro tali sa iyang mga tropa ug sa BHB-Front 16 didto sa Budlingin, Alegria, Surigao del Norte niadtong Marso 8, 2017 sa alas 8:30 sa gabii. Walay bisan usa ka pwersa sa BHB sa maong lugar niining panahona. Ang binuthanay naggikan lang sa iyang mga tropa. Sa ato pa, tataw nga desperadong nagka-unay ang mga nag-COPD nga tropa sa 30th IB atol sa ilang pagpatrolya niining gabhiona nga miresulta sa pagkapatay ni Pfc. Jhon Francis Rivera ug pagkasamad ni Pfc. Windyl Daayata.

Daw nalisang sa ilang kaugalingong anino ang mga tropa sa 30th IBPA sa mga nanggawas nga istorya-istorya nga sulungon sa BHB ang ilang kampo nga anaa sa Multi-Purpose Barangay Hall sa Budlingin. Nagpatrolya gilayon sa palibot ang kaaway apan 20 metros pa lang gikan sa ilang gikampohan nagkabinuthanay na. Ang maong panghitabo nagpakita nga pakyas ang ilang civil military operation pinaagi sa COPD/PDOP sa maong baryo kay dili man sila kampante sa ilang kaugalingon. Ang mga pang-abuso ug paglapas sa tawhanong katungod nga ilang hinimoan ngadto sa mga lumulupyo misumbalik ra usab kanila.

Tungod kay tulubagon ni Lt. Col. Amaro ang maong kapalpakan, naggamagama dayon kini og mga bakak aron tabunan ang iyang kaulawon. Sagad na kining ginahimo niya ug sa AFP aron dauton ang BHB ug ang tibuok rebolusyonaryong kalihukan. Gani nagsabwag pa sila karon og mga sinulat nga mga bakak didto sa mga kabaryohan sa Malimono, Surigao del Norte nga nagdaut sa mga rebolusyonaryo. Kabahin kini sa ilang saywar ug desperadong lakang aron pugngan ang padayong pag-asdang sa rebolusyonaryong kalihukan sa Surigao del Norte, sa rehiyon ug sa tibuok Pilipinas.

Mao nga, dili kayang pugngan sa kaaway ang pag-asdang sa pakigbisog sa katawhan alang sa ilang katungod ug interes, samtang magapadayong magtunhay ang mapahimuslanon ug madaugdaugon sistema sa Pilipinas nga nagdulot sa halapad nga kapobrehon ug pag-antos sa katawhang Pilipino. Bugtong ang linya lamang sa nasudnon demokratikong rebolusyon pinaagi sa gubat sa katawhan ang maghatag og katumanan sa nasudnon ug katilingbanong kagawasan gikan sa pagdomina sa imperyalismo, pyudalismo ug burukrata kapitalismo. Apan sa pikas bahin gihatagan og luna ang panaghisgot pangkalinaw aron ugkaton ang gamot hinungdan sa gubat sibil sa Pilipinas ug makamugna og kasabutan alang sa kaayuhan sa katawhan.

Busa, walay hunong nga ipanghingusog sa katawhan ang pakigbisog alang sa ilang makihut-ong nga pangayo sama sa tinuod nga reporma sa yuta, taas nga suhulan, kaseguruhan sa panginabuhian, libre ug maayong katilingbanong serbisyo ug uban pa. Padayong ibutyag ang mga bakak, pagpanglingla ug kabangis sa AFP/PNP ug sa reaksyonaryong rehimen ngadto kanila.

https://www.philippinerevolution.info/statements/20170310-mga-tropa-sa-30th-ibpa-desperadong-nag-unay-usa-patay-ug-usa-samaron