Gindeklarar sang Gubyerno sang Pilipinas (GRP) paagi kay Pres. Duterte ang ila walay taning nga unilateral ceasefire sa CPP-NPA umpisa sadtong Agosto 21. Nagdeklarar man sang unilateral ceasefire ang CPP-NPA umpisa sadtong Agosto 28, kag epektibo pa ini subong.
 
Ang katuyuan sang ceasefire nga separado kag unilateral nga gindeklarar sang GRP kag CPP-NPA amo ang paghatag sang paborable nga klima para sa ginapatigayon subong nga peacetalks sa tunga sang National Democratic Front-Philippines (NDFP) kag GRP.
 
Ginakalipay kag ginasuportahan sang mga pumuluyo ang deklarasyon sang ceasefire kag ang nagaluntad nga peacetalks. Handum sang mga pumuluyo nga makaabot sa isa ka kasugtanan ang NDFP kag GRP sa importante nga mga sosyo-ekonomiko kag pulitikal nga reporma nga nagatuyo sa paglubad sa mga ugat sang armado nga inaway.
 
Ang rebolusyonaryong pwersa sa lakip ang NPA sa Sentral Panay hugot gid nga nagapatuman sang unilateral nga deklarasyon sa ceasefire sang CPP kag National Operational Command sang NPA. Nagalikaw kag nagamaniobra ang mga yunit sang NPA sa Sentral Panay agud lang indi magluntad ang mga engkwentro batuk sa tropa sang 61stIB/PA nga padayon sa ila armado nga operasyon sa mga komunidad sa kaumhan nga ginahulagan sang mga yunit sang NPA.
 
Imbes nga magbalik sa ila baraks kag mayor nga mga kampo militar, ang mga yunit sang 61st IB nagmentinar sang ila mga deployment sa mga ditatsment kag padayon ang ila mga pagpatrolya kag operasyon sa pagpaniktik kag pang-saywar paagi sa ila mga yunit nga “peace and development teams”ukon PDT nga ginapatuman sa idalom sang mas tuso nga Oplan Bayanihan.
 
Ang mga paglapas sang AFP sa unilateral ceasefire ginapakita sang masunod:
  1. Mentinado ang patrol base sang 61st IB sa Brgy. Katipunan kag Acuna halin pa sang gindeklarar ang unilateral ceasefire sang GRP asta sa subong. May mga pwersa pa sang AFP-CAA sa interior nga lugar sang Brgy. Daan Sur, Brgy. Roxas (Otso), Brgy. Cahigon, kag sa intermidya nga barangay sang Abangay, tanan sa Tapaz. Mentinado man ang ispesyal nga yunit sang PNP sa kuno pagbantay sang proyektong megadam sa Suba Jalaur sa Calinog, Iloilo.
  2. Septyembre 7-12, masobra 26 ka pwersa sang 61stIB kag mga elemento sang pulis ang nag-operasyon sa Brgy. Cabatangan, Lambunao, Iloilo. Ginapaggwa nila nga istorya nga may dalakpon nga wanted. Apang, sa daku nga panahon nagtener sa barangay hall, kag nagsinugal.
  3. Septyembre 8-9, naglunsar sang civil-military operations ang masobra 60 ka pwersa sang militar sa Brgy. Tacayan, Tapaz, Capiz.
  4. Septyembre 21, naglunsar sang operasyon militar ang AFP sa Cahigon, Calinog.
  5. Septyembre 22, nagsulod man ang tropa militar sa Binulusan Pequino, Calinog.
  6. Oktubre 22-31, mga 32 ka tropa sang 61stIB/PA, nagbalik naman sa Cabatangan, Lambunao.
  7. Oktubre 22, may 14 ka tropa sang AFP ang nagmartsa pakadto sa Brgy. Anhawan, Janiuay, Iloilo.
  8. Oktubre 26-30 ginlusar sang mga 60-70 ka pwersa sang Philippine Army kag pulis ang civil-military operations sa mga barangay sang Buri, Siya, Nawayan, kag Daan sur.
  9. Oktubre 31 asta Nobyembre 10, mga 32 ka katapu sang 61st IB/PA, nagtener sa barangay hall sang Brgy. Bagongbong, Lambunao.
  10. Nobyembre 1, may pito (7) ka militar ang nagkadto sa Brgy. Panuran, Janiuay, Iloilo.
  11. Nobyembre 11 asta subong, masobra 30 ka katapu sang 61stIB/PA ang nagatener sa Brgy. Cabatangan, Lambunao, Iloilo.
Maathag nga ining mga paghulag sang 61stIB/PA bayolasyon sa gindeklarar nga unilateral ceasefire sang GRP bangud ginatampalas sini ang diwa/ispiritu sang maayong kabubut-on sang ceasefire kag peacetalks. Paagi sa mga medical mission, kag iban pa nga palusot, ila ginatabunan ang katuyuan nga pagpadayon sang civil-military operations (CMO) ukon pangsaywar, kag operasyon sa pagpaniktik sa ila ginakabig nga baseng masa sang NPA — tanan sa idalom sang padihut nga Oplan Bayanihan.
Ang mga medical mission trabaho sang sibilyan nga ahensya nga ginagamit sang AFP nga hapin sa ila operasyon. Sa ila CMO nga operasyon aktibo ang ila indoktrinasyon sa pumuluyo nga nagapakalain sa rebolusyonaryong kahublagan. Ang presensya nila sa kaumhan nagapakita sang ila antagonismo sa rebolusyonaryong pwersa kag sa NPA.
 
Ang armado nga presensya sang AFP sa sibilyan nga populasyon, ang pagtenir sa mga barangay hall kag iban pa nga mga sibilyan nga istruktura maathag nga bayolasyon man sa Comprehensive Agreement on Respect for Human Rights and International Humanitarian Law (CARHRIHL) nga una na nakasugtan sang NDFP kag GRP.
 
Gani, kami, ang NPA sa idalom sang Jose Percival Estocada, Jr. Command, mabaskog nga nagakondenar sining mga bayolasyon sang 61stIB kag imbolbado nga katapu sang PNP. Ginademanda namon nga palayason ang mga tropa paggwa sa sibilyan nga populasyon sa kaumhan kag magbalik sa ila mayor nga mga kampo kag baraks. Ini para may tunay nga kahulugan gid ang ceasefire, maibanan ang armado nga tensyon sa kaumhan kag mapaluntad ang maayo nga klima sa peacetalks.
 
Nagapanawagan kami sa pumuluyo nga padayon nga mag-aligmat kag ibuyagyag ang bayolasyon sang 61st IB sa ila ceasefire, sa CARHRIHL, kag mga paglapas sa Tawhanon nga mga Kinamatarung. Kabahin ini sang aton handum nga maagum ang matarung nga kalinungan sa aton paghimakas para sa tunay nga kahilwayan kag demokrasya.
 
https://www.cpp.ph/61st-ibpa-sa-sentral-panay-nagabayolar-sang-ila-kaugalingon-nga-unilateral-ceasefire/