6th ID, JTF Central mibida sa kalampusan sa tuig 2023

From Superbalita (Jan 8, 2024): 6th ID, JTF Central mibida sa kalampusan sa tuig 2023 (By Edgar E. Fuerzas) [6th ID, JTF Central starred in success in 2023]

Hulagway gikan sa 6th ID, PA pinaagi ni Edgar Fuerzas.

CENTRAL MINDANAO — Moabot ngadto sa 535 ka mga sakop sa nagkalain-laing Lawless Armed Groups (LAGs) ang napatay sa kasundalohan sa ilang padayon nga pagpaningkamot nga mamentinar ang kahapsay ug kalinaw sa Central ug South-Central Mindanao sa tuig 2023.

Matod ni 6th Infantry Division ug Joint Task Force Central commander Major General Alex Rillera, ang mga napatay mga sakop sa communist groups, BIFF, Daulah Islamiyah, ug uban pang lawless elements.

Giinsister ni Rillera nga ang kalampusan sa ilang mga paningkamot sa kalinaw sa miaging tuig tungod sa tabang sa mga local government units, stakeholders, ug mga sibilyan gikan sa ilang area of responsibilities (AORs).

Lakip sa mga napatay mao ang mga dagkong opisyal sa komunistang grupo nga naglakip nila ni Martin Min Fay alyas Kidlat; Rowe Libot; Algae Dalimbang; alyas Agpol; Arnold Laugo Amad; Joseph Longan alyas Michael; Saliki Matilak alyas Ingkang; Rey Masot Zambrano alyas Dodong ug daghan pang uban.

Napatay usab sa kasundalohan ang mga dagkong opisyal sa lokal nga mga teroristang grupo lakip sila si alyas Boy Jacket (BIFF field commander) ug alyas Abunasria (BIFF – Bungos Faction Sub-leader).

Si Bro Sapal, kinsa Amir sa Dawlah Islamiyah-Philippines, ug second-in-command Nasser Guinaid Saptullah wala usab makaikyas sa mga kamot sa kasundalohan, sila napatay sa usa ka military operation niadtong Disyembre 1, 2023.

Si Nasser maoy lider sa Dawlah Islamiyah group, iyang gihulipan ang namatay nga si alyas Abu Turaifie.

Ang Joint Tasked Force Central mihimo og 38 ka operasyon diin 57 ka indibidwal ang napatay samtang 22 ang samdan.

Miihap sa 262 ka tawo ang ilang napa-surrender ug 194 ang nadakpan sa nagkalain-laing operasyon apil na ang dunay warrant of arrest.

Naimbargo usab sa kasundalohan ang 363 ka mga armas, 207 ka IED/UXO ug lain-laing klase sa eksplosibo.

Adunay kinatibuk-an nga 570 nga mga materyales sa gubat, lakip ang mga armas ug mga eksplosibo, ang nakumpiska sa kasundalohan gikan sa dili awtorisado nga mga indibidwal.

Gibungkag usab sa kasundalohan ang 37 ka kampo sa kaaway gikan sa nagkalain-laing dapit sa Central ug South-Central Mindanao.

Sa padayong paningkamot sa mga field troops sa pagsumpo sa mga malapasong armadong grupo sa ilang hurisdiksyon, si General Rillera nangayo sa kooperasyon sa publiko.

https://www.sunstar.com.ph/davao/superbalita/6th-id-jtf-central-mibida-sa-kalampusan-sa-tuig-2023#google_vignette