CPP/NPA-Central Negros: NPA Nagbuking sang Kabutigan sang 94th IB Philippine Army

Propaganda article posted to the Communist Party of the Philippines (CPP) Website (Aug 7, 2021): NPA Nagbuking sang Kabutigan sang 94th IB Philippine Army

JB REGALADO

SPOKESPERSON

NPA-CENTRAL NEGROS (LEONARDO PANALIGAN COMMAND)

NEGROS ISLAND REGIONAL OPERATIONAL COMMAND (APOLINARIO GATMAITAN COMMAND)

NEW PEOPLE'S ARMY

AUGUST 07, 2021

Lubos nga kabutigan ang palayag sang 94th IBPA nga 4 ka engkwentro ang natabo sa tunga sang New People’s Army kag nasambit nga tropa militar sa Brgy Santol, Binalbagan, Negros Occidental.

Wala sang lehitimo nga engkwentro nga nahitabo sa tunga sang NPA kag 94th IBPA sa Sityo Binigsi-an, Brgy Santol, Binalbagan, Negros Occidental sadtong Agosto 5, 2021 pasado alas 4:00 sang hapon. Ang matuod nga ginpa-arakan sang armas luthang ang 2 ka katapo sang panatiko nga grupo nga sanday Henry Brial kag Junior Pedro sang kombinado nga pwersa sang tropa militar upod sa grupo sang panatiko nga ginapamunuan ni Karem Calpis. Patay si Junior Pedro kag pilason naman si Henry. Sa pagpangusisa sang LPC-NPA, patay man si Brial matapos nga gindala sa district hospital sang Isabela, Negros Occidental. Palabas lamang sang militar kag ni Karem Calpis nga may natabo nga engkwentro sa tunga NPA kag sang nasambit nga pasistang tropa para madugangan ang cash reward nga ginpasalig sang NTF-ELCAC nga kon may makatudlo sa nahamtangan sang NPA kag maka-engkwentro may igahatag nga cash reward.

Naga-inagaway sang cash reward ang mga lider-panatiko nga sanday Karem Calpis, Luis Pedro kag Tikboy Bongaita upod sa tropa sang 94th IBPA sa mga panginto sang NTF-ELCAC.

Bangud sang kasakon kag korap nga mga opisyal sang tropa militar kag lider-panatiko nga si Karem, lipod kay Brial kag Pedro nga tuyo sila nga patyon samtang nagapanglakaton sa mga binukid sang Brgy Santol sa panahon sang ila operasyon agud ang cash reward indi magkadto sa ila nga duha (Henry kag Junior) kundi mismo kay Karem kag mga opisyal sang 94th IB.

Si Brial kag Pedro ang ara man sa idalum sa pagpamuno ni Luis Pedro nga lider-panatiko sa Brgy Santol samtang si Karem ang lider-panatiko sa sityo Irene sakop sang Brgy Ampanangon nga may pinakadamo nga criminal record sa lugar.

Si Brial kag Pedro indi mga katapo sang NPA kundi lunsay mga aktibo nga katapo sang panatiko nga grupo nga ginhimo nga giya sang 94th IBPA sa pagstrafing sang puluy-an sang pamilya Ponsiano kag Enriquez sadtong Agosto 3, 2021 sa Sityo Tibak, Brgy Santol, Binalbagan, Negros Occidental. Bangud nga malapit lamang ang posisyon sang NPA sa balay sang pamilya Ponsiano kag Enriquez nga ginpaarakan-luthang sang mga katapo sang 94th IB kag grupo sang panatiko nga ginapamunuan ni Karem Calpis, napilitan ang NPA nga magpalupok para depensahan ang nasambit nga panimalay sang pamilya Ponsiano kag Enriquez diin natabo ang lehitimo nga engkwentro. Naglawig ang engkwentro sa masobra 10 minutos.

Ang pamilya Ponsiano kag Enriquez ang biktima sang kapintas sang grupo-panatiko nga ginapanguluhan ni Karem Calpis kag Tikboy Bongaita.

Mabaskog nga ginakondenar sang Leonardo Panaligan Command-New People’s Army sa Central Negros ang pag-strafing sa puluy-an sang pamilya Ponsiano kag Enriquez sa sityo Tibak, Brgy Santol subong man ang pagpinalupok nga naghatag sang kakugmat sa pumuluyo sa nasambit man nga barangay.

Lunsay pasismo, patalang, pagpanginto kag kakugmat lamang ang gindulot sang presensya sang Armed Forces of the Philippines sa nagahiusa nga mga mangunguma sa mga binukid sang La Libertad, Jimalalud, Guihulngan sa Oriental nga bahin sang isla kag binukid naman sang Binalbagan, Isabela kag Magallon sa Occidental. Kabaliskaran ini tanan sa ginatikal sang militar nga “Kalinong kag Kauswagan.”

Nagapanawagan man ang LPC-NPA nga hugot nga mag-isa, indi magkahadlok sa pagpalayas sang pasistang AFP sa kaumahan. Bungkagon ang pinakamapintas kag bat-ulan nga panatikong-grupo! Hublasan kag bungkagon ang NTF-ELCAC!

https://cpp.ph/statements/npa-nagbuking-sang-kabutigan-sang-94th-ib-philippine-army/