Hiligaynon News: 79IB sang Army naghiwat pulong-pulong sa mga IPs

From the Philippine Information Agency (Mar 20, 2021): Hiligaynon News: 79IB sang Army naghiwat pulong-pulong sa mga IPs (By Lorenzo O. Lambatin, Jr.)

NEGROS OCCIDENTAL, Marso 20 (PIA)— Ang 79th Infantry "Masaligan" Battalion sang Philippine Army sining karon lang naghiwat sang isa ka Pulong-Pulong kag outreach program sa mga Indigenous Peoples (IPs) community sang Sitio Las Piñas, Brgy Minapasuk, banwa sang Calatrava.

Suno kay Civil-Military Operations Officer 1Lt. Dansan Camua, ang hilikuton natigayaon sa pagbuligay sang local nga pamahalaan sang Calatrava, konseho sang Brgy. Minapasuk, 6th Special Action Battalion, Philippine National Police-Special Action Force (PNP-SAF) kag Lady Riders Club-Negros Occidental.

May 85 ka mga residente, kalakip sang mga bata kag mga ginikanan nga lunsay mga katapo sang Negritos Ata kag tribu Bukidnon, ang nagpasakop kag nagbaton sang mga pagkaon, hygiene kits, face shield, face mask kag mga tsinelas.

Sa ginhiwat nga Pulong-Pulong, ang anay rebelde nga si alyas "Ka Joross" naghatag sang iya panugdaon bahin sa malimbungon nga pag haylo sa iya sang mga katapo sang mga Communist Terrorist Group (CTG) kag kon paano siya gin buligan sang gobyerno sa iya pag sungka, suno kay Camua.

Si Executive Assistant Marianne Lumanog sang lokal nga pamahalan sang Calatrava nagpasalig sa mga IPs nga buligan sila sang gobyerno labi na ang bahin sa ila ikaayong lawas.

Nagpasalamat si Pedro Satuquia, pinuno sang Negrito Ata kag tribu Bukidnon, sa programa sang 79IB kag nagpangabay nga magpadayon ang amo nga hilikuton agud makahibalo sila pa gid sila sang mga giho kag lihok sang mga CTG.

Nagpasalamat man si Lieutenant Colonel Gerard T. Alvaran nga amo ang Commanding Officer sang 79IB sa pamunuan sang Calatrava, PNP-SAF kag Lady Riders Club sa paghiwat sang amo nga programa.

"Ang mga IPs sarang nga ma manipular sang mga katapo sang teroristang CPP-NPA. Sa amo nga rason, gin hiwat namon ang ini nga programa agud mapa hibalo sa ila nga ang gobyerno may kabalaka sa ila. Upod sang pribado nga mga organisasyon naga tulok ini sang ila kaayuhan. Luyag namon mag hatag sang pag-laum sa mga IP kag ipabalo sa ila nga tanan himuon sang mga soldado agud ipatigayon ang kalinong kag kauswagan sa ila nga komunidad," pahayag ni Alvaran. (79th IB PA/JSC/LOL/PIA6 Negros Occidental)

https://pia.gov.ph/news/articles/1070095