CAMERA READY. Nangandam na ang mga katropa sa 302nd IBde sa ipahigayon nga bansay sa pagkuha og hulagway samtang gisinatyi sa matag usa ang camera. (PIA/Bohol)
CARMEN, Bohol -- Sa kadaghan sa makapaguol nga balita nga nagpasad karon, mituo ang mga tinugyanan sa 302nd Infantry Brigade nga mas maayo nga ilang itampo ang mga maayong balita ngadto sa mga katawhan nga padayon nga naningkamot alang sa maayong kinabuhi.
Tungod niini, mihagyo si Army Captain Khadaffy A. Tawantawan, Civil Military Operations Officer sa 302nd IBde nga hatagan sa bansaybansay sa pagkuha og hulagway ang mga katropa, aron kini magamit sa pagpa-ambit sa maayong balita ngadto sa mga Bol-anon.
Didto sa bansay-bansay, 14 ka sakop sa 302nd Inf Bde ang mitambong ug aktibo nga misalmot sa mga ehersisyo sa paghupot sa camera, pagkuha og hulagway sa mga kalihukan sa mga sundalo ug sa mga units nga ilang gidumala dinhi sa Bohol.
Nagbase sa Camp Rajah Sikatuna sa Katipunan Carmen, Bohol, ang 302nd Infantry Brigade mao’y nagdumala sa tanan nga mga allied units sa kasundalohan nga nia sa Bohol.
Kahinumduman nga human ikadeklara ang Bohol nga insurgency free niadtong 2010, nausab ang gimbuhaton sa mga sundalo nga nahimilin sa Bohol.
NAGPRACTICE SA SHOOTING. Napulo ug upat ka mga sakop sa 302nd IBde ang milampus sa usa ka adlaw nga bansay sa pagkuha og hulagway, nga gilauman usab nga ilang magamit sa pagpakatap sa ilang mga kalampusan ngadto na sa katilingban nga Bol-anon. (PIA/Bohol)
Inay pusil ug mga tanque de guerra, piko, pala, gabas ug martilyo na ang kasagaran nila nga misyon sa pagtabang sa katawhan sa mga komunidad nga kanhi-ay nga gihulga ug gilumluman sa mga rebelde.
Sukad niadto, halos kadaghanan sa mga trabaho sa kasundalohan dinhi sa Bohol, mao ang paghimo og mga pulongpulong, nga pagpatukod sa mga tunghaan, pag-ayo sa mga kadalanan ug pag-ayo sa mga naguba nga barangay halls.
Kasagaran sa ilang mga trabaho, dili na gani mabalita sanglit, kuwang sila sa kahibaw sa paghimo niini ngadto sa mga balita.
Labut pa, may gi-atiman nga social media account ang 302nd IB nga wala pa magamit og maayo, sumpay ni Captain Tawantawan.
Tungod niini, nahitabo ang bansay uban sa Philippine Information Agency.
Milaum ang mga opisyales sa 302nde IB pinangulohan ni Major General Ignacio Madriaga, nga makahatag na og kaugmaran ang 302nd Bde ngadto sa katilingban'g Bol-anon, ilabi na sa ilang mga kalihukan.
No comments:
Post a Comment
Note: Only a member of this blog may post a comment.