CPP/NPA-NCMR: Binuangan PNP Station, giatake sa NPA

NPA-North Central Mindanao Region propaganda statement posted to the Communist Party of the Philippines Website (Dec 4): Binuangan PNP Station, giatake sa NPA



Ka Malem Mabini, Spokesperson'
NPA-North Central Mindanao

4 December 2017

Giatake sa mga pwersa sa New People’s Army ubos sa Eastern Misamis Oriental-North Eastern Bukidnon (EMONEB) ang PNP station sa Binuangan, Misamis Oriental kaniadtong Desyembre 3, 2017 sa may alas tres sa kaadlawon. Mikabat og duha ka oras kapin ang sinukliay og bala ug luwas nga miatras ang BHB samtang upat ang samaron sa panig sa PNP.

Kini nga aksyong Militar mao ang pagpaningil sa utang dugo sa mga pulis sa Binuangan nga kabahin sa reinforcement force nga nagreyd sa mga sakop sa EMONEB nga naghimo og pagpasabot sa mga lumulupyo sa Brgy. Ampianga, Sugbongcogon, Misamis Oriental kabahin sa kadaut nga idulot kung dili mapugngan ang ekspansyon sa plantasyon sa Del Monte sa maong lugar. Nahitabo kini kaniadtong Agosto 2, 2012 kung asa usa ka kauban ang diha-dihang napatay atol sa pinusilay samtang ang laing usa nga samaron gitiwasan sa mga pulis.

Magsilbi usab nga tubag kini nga aksyong militar sa hinungog nga pagsabotahe sa rehimeng US-Duterte sa Panaghisgot Pangkalinaw. Gipakyas ni Duterte ang pangandoy sa katawhang Pilipino alang sa malahutayon ug makatarunganong kalinaw. Mas grabe pa, gibaharan pa niya ang mga ligal nga progresibong grupo pinaagi sa crackdown ug dinaghang pagpangdakop ug gideklarang “terorista” ang nasudnon-demokratikong rebolusyonaryong kalihukan.

Apan taliwala niini nga postura sa estado, lakip ang pag-angkon nga mas estable ug nagkalig-on karon ang ilang armadong kusog, napamatud-an sa gihapon sa rebolusyonaryong kalihukan nga anaa kini katakus alang sa pagtay-og sa pulitikanhong gahum sa reaksyon. Nagpamatuod usab kini sa labaw pang paglapad sa mga baseng masa sa rebolusyonaryong kalihukan, nga nahimong kaabag alang sa maong operasyon.

Busa, anaa karon sa rebolusyonaryong kalihukan ang pinakapaborable ug pinakatukma nga panahon aron pakyason ang laraw nga diktadurya ni Duterte. Dahumon pa sa estado ang mas subsob nga mga pagsukol sa katawhan, armado man o dili.
https://www.philippinerevolution.info/statements/20171204-binuangan-pnp-station-giatake-sa-npa