Cebuano News: Kapin libo ka tawo mitambong sa mga pulong-pulong nga gipasiugdahan sa TOG-10/PAF

From the Philippine Information Agency (Jul 27): Cebuano News: Kapin libo ka tawo mitambong sa mga pulong-pulong nga gipasiugdahan sa TOG-10/PAF

Kapin usa-ka libo (1,222) ka mga residente ug estudyante ang mitambong sa mga pulong-pulong ug dayalog alang sa kalinaw nga gipasiugdahan sa Tactical Operations Group, Northern Mindanao (TOG-10), Philippine Air Force (PAF), nga nakabase  sa Lumbia, ning siudad, sa milabay nga tuig.

Gituki sulod sa mga pulong-pulong ang mga isyu sa seguridad sa nasud, terorismo, insurhensiya ug ang dili maayong epekto sa illegal nga druga, si Lt. Col. Leo A. Fontanilla, TOG-10 Group Commander, miingon.

Matud pa usab ni Fontanilla, ang mga nasangpit nga kalihokan gipahigayon sa TOG-10, sa pagtabang sa 8TH ARCEN, 710TH SPOW, 300TH AISG, Philippine Drug Enforcement Agency (PDEA), 4TH Infantry Division, Philippine Army (PA),  58TH Infantry Battalion (58IB), PA, ug nila ni 2Lt. Edio RJ V. Cabigun, PA, Ret., Sharlito Dinganon, rebel returnee ug  Minandro J. Aque, isip mga dinapit nga mga mamumulong.

Samtang si Fontanilla miingon nga ang mga pulong-pulog didto gipahigayon sa mga halayong barangay sa bukid sa utlanan sa probinsiya sa Misamis Oriental ug Bukidnon, partikular sa Tuburan, Dansolihon, Pualas, Pigsag-an, Lingating, Bayanga ug Cagayan De Oro City.

“Sa laing bahin, ang katawhan sa mga nasangpit nga mga barangay ang gipasabut kabahin sa mga gihimo sa gobyerno diha sa mga barangay, partikular sa PAF,  sa kampanya alang sa kahusay ug kalinaw sa nasud,” si Fontanilla midugang pag-ingon.

http://news.pia.gov.ph/article/view/1451437973711/cebuano-news-kapin-libo-ka-tawo-mitambong-sa-mga-pulong-pulong-nga-gipasiugdahan-sa-tog-10-paf