CPP/NDF-EV: NDF-EV nalilipay ha pag-uswag han erestorya pankmurayawan, ginsusukna an pagpuypoy ha rali para ha kamurayawan ngan pag-ebakwet han gatus-gatos ha militarisasyon ha Samar

NDF-Eastern Visayas propaganda statement posted to the Communist Party of the Philippines Website (Apr 8): NDF-EV nalilipay ha pag-uswag han erestorya pankmurayawan, ginsusukna an pagpuypoy ha rali para ha kamurayawan ngan pag-ebakwet han gatus-gatos ha militarisasyon ha Samar

Fr. Santiago “Ka Sanny” Salas, Spokesperson
NDFP Eastern Visayas (Region VIII)

8 April 2017

Iginkalipay yana han National Democratic Front-Eastern Visayas (NDF-EV) an pag-uswag han erestorya pankamurayawan ha kahuhuman pala nga negosasyon han GRP ngan NDFP, kundi ginsukna an AFP ngan iba pa nga pwersa panseguridad tungod han pagpuypoy han usa nga rali para ha kamurayawan ha Catbalogan City ngan pagdurot han ebakwasyon han gatus-gatos tikang ha militarisasyon ha prubinsya han Samar. “Nalilipay an NDF-EV nga naunhan na an GRP-NDFP nga erestorya pankamurayawan ngadto ha pagpinal han mga kasarabutan ha mga reporma nga sosyo-ekonomiko sugadman pampulitika ngan pan-konstitusyon yana nga tuig ngan ha pagplano han duruyog nga temporaryo nga ukoy-bubto (joint interim ceasefire),” sering han tagapagyakan han NDF-EV nga hi Fr. Santiago “Ka Sanny” Salas.

“Kundi, diri kita naabuyon ngan hugot naton nga ginkukundenar an panmuypoy han mga pwersa nga militar ngan pulis ha rali para ha kamurayawan ha Catbalogan hadin Abril 5 sugadman an ebakwasyon han gatus-gatos ha Calbiga ngan Basey durot han militarisasyon han 87th IB. Ini nga mga aksyon han AFP ngan PNP nagpapakita han ira himubo nga pagkulaw ha erestorya pankamurayawan bisan kun hi GRP President Duterte mismo naruruyag gud nga mahuman an usa nga pinal nga kasarabutan para ha kamurayawan.”

Ginsukna han tagapagyakan han NDF-EV an militar ngan pulis ha pagpugong han demokratiko nga asembliya han tubtub 5,000 katawo tikang ha bug-os nga prubinsya han Samar para ha kamurayawan ngan hustisya komo pagtapo ha United Cities and Local Governments Asia-Pacific Conference. “Grabe nga ginmilitarisa han 87th IB an Calbiga, Basey ngan iba pa nga bungto. Mayda liwat mga tsekpoynt an militar ngan pulis kada 10 metros ha mga dalan ngadto Catbalogan ngan damo pa nga iba nga tsekpoynt ha sulod han syudad. Baga-baga nga ada ha gerra an kapitolyo kun diin waray katapusan nga nagpatrulya ha palibot an mga sarakyan han pulis. Bisan paman, nakapursigi an 700 katawo nga maglansar han protesta.

“Ginkundenar han mga nagrali an gubyerno han syudad tungod han kurapsyon ngan pagpasibaya ha mga nakatalwas ha kalamidad ngan ha kablas ha syudad. Nanawagan liwat hira han paghunong han militarisasyon ha 11 nga baryo ha Calbiga sugad man ha Basey. Nagdedemanda hira han hustisya ha mga panmatay nga gawas han balaud nga hinimuan han mga warlord nga hira Mayor Ronald Aquino han Calbayog City, Mayor Jojo Grey han San Jorge ngan an hadto-anay meyor han Matuguinao.”

Ginsering ni Fr. Salas nga an mga isyu nga iginpagawas han katawhan mga karukayaknon han kamurayawan ngan hustisya. “Samtang nag-aatubangay an mga panel ha negosasyon han GRP ngan NDFP, an katawhan sugad han iginpakita ha Catbalogan kinahanglan liwat nga magtirok agud mahibaro ngan mapalandaw an ira mga batakan nga isyu ngan igdemanda an pagresolbar han mga gamot nga hinungdan han gerra sibil. Sanglit, diri poyde karawton an panmuypoy ha mga demokratiko nga asembliya para ha kamurayawan ngan hustisya sugadman an mga atake ha mga sibilyan nga komunidad han AFP ngan iba pa nga pwersa panseguridad han GRP. Sanglit, nananawagan kita kan GRP President Duterte nga pamatian an katawhan ngan batunon an ira panawagan para ha sosyo-ekonomiko ngan pampulitika ngan konstitusyunal nga mga reporma.”

Komo kongklusyon, gindig-unan liwat ni Fr. Salas nga an mga opensiba han New People’s Army ha rehiyon hadi pala mga pagdepensa kontra ha makiawayon nga mga maniobra han AFP. “Ginkaklaro liwat han NDF-EV nga an bag-o pala nga nga mga opensiba han NPA ha rehiyon aktibo nga pagdepensa kontra ha mga armado nga pag-ayat ngan atake han AFP. An AFP mismo nagpapahayag ha publiko para ha pasipikasyon ha pagpanawagan han pagpasurender ngan lokal nga mga erestorya pankamurayawan, ngan naokupar ngan gintatarhug an mga komunidad nga gintatahapan nira nga nasuporta ha NPA.

“Angay dayawon an NPA ha disiplina ngan pagpugong hini ha kalugaringon kay waray bisan usa nga opensiba nga iginlansar ha rehiyon ha ira pagpatuman han unilateral nga ukoy-bubto tikang Agosto 2016 tubtub Pebrero 2017. Kabaliskaran hini, ginlansar han AFP an pagdeploy han mga tropa hini ha unhan ha pareho nga panahon, ngan gindeklara an Oplan Kapayapaan komo bag-o nga ‘kontra-insurhensiya’ nga kampanya ngan ginpadayon an mga operasyon nga kombat, paniktik ngan saywar nga direkta nga nakontra ha pankamurayawan nga proseso. Sanglit, an NPA magpapabilin nga pirme alerto ngan andam ha aktibo nga depensa kontra ha ngatanan nga kaaway han katawhan.

https://www.philippinerevolution.info/statements/20170408-ndf-ev-nalilipay-ha-pag-uswag-han-erestorya-pankmurayawan-ginsusukna-an-pagpuypoy-ha-rali-p