Fr. Santiago “Ka Sanny” Salas, Spokesperson
NDFP Eastern Visayas (Region VIII)
8 April 2017
Nananawagan an National Democratic Front-Eastern Visayas (NDF-EV) kan GRP President Rodrigo Duterte nga igkansela an ehersisyo militar nga Balikatan han mga tropa han US ngan Pilipinas ha Ormoc City, Leyte nga nakatalaan ha Abril ngan Mayo.
“Gin-aaghat han NDF-EV hi GRP President Duterte nga igkansela an Ormoc Balikatan komo patriyotiko nga pagsuporta ha nahitatabo nga proseso pankamurayawan kun diin ginsosolbar han mga Pilipino an ira mga kalugaringon nga problema,” sering ni Fr. Santiago “Ka Sanny” Salas, tagapagyakan han NDF-EV. “Importante para ha Presidente han GRP nga pamatud-an ha aksyon an iya ginyakan mahitungod ha paglulugaring tikang ha US. Kun kikitaon, an nagpapadayon nga diri direkta nga kontrol han US ha Pilipinas amo an nag-ulang ha pag-uswag hini ngan nagbuhag ha mga Pilipino komo usa nga prinsipal nga hinungdan han gerra sibil ha presente.”
“Ginpapatam-is han ginplano nga ‘outreach activities’ han mga tropa han US ha Ormoc City an panginginlabot han kanan US militar – nga amo an pinakadako nga ginpopondohan ha bug-os nga kalibutan nga maabot ha US$ 600 kabilyon kada tuig – pinaagi han mga maitatanding nga mas barato nga panpakalma sugad han mga serbisyo medikal, pagdonar han mga libro, ngan pagtindog ngan pag-ayad han mga bilding han eskoylahan ngan mga sentro han panlawas,” dugang pa ni Fr. Salas.
Ginbalikan han tagapagyakan han NDF-EV an nahiuna nga pagkundenar ni GRP President Duterte ha kabangisan han US ha Mindanao ha pagsakop ha Pilipinas ha pagsulod han naglabay nga siglo. “Sugad kan GRP President Duterte, mayda waray pa mabaton nga makasaysayan nga mga araba an katawhan han Eastern Visayas ha mga krimen han imperyalismo nga US. Maabot ha 50,000 katawo ha Samar pala an ginpatay ha pareho nga panahon nga ginkakangalsan ni Duterte.
“Sanglit, an pagpatuman han ehersisyo militar han mga tropa han Pilipinas ngan US usa nga pagtamay ha pankasaysayan nga pag-antos han rehiyon nga nagpapadayon ha presente, pinaagi han “kontra-insurhensiya” nga kampanya han militar han GRP nga ginpaluyuhan han US, nga ha esenya amo liwat an nagpapadig-on ha gindisenyo han US, kontra-nasyunal ngan kontra-katawhan nga neoliberal nga sosyo-ekonomiko nga kaayusan.”
Gin-aaghat ni Fr. Salas an katawhan han Eastern Visayas nga adman an ira kasaysayan ngan presente nga kamutangan ngan magmartsa kontra ha Ormoc Balikatan ngan panmilitar nga panginginlabot han US. “Kinahanglan igpanawagan han katawhan han Samar ngan Leyte ha gubyerno Duterte nga igkansela an Ormoc Balikatan ngan 256 nga iba pa nga ehersisyo militar han US ha nasud yana nga tuig. Kinahanglan igdemanda kan GRP President Duterte nga pamatud-an an mga ginyakan ngan tapuson an Mutual Defense Treaty, VFA, SOFA, EDCA ngan iba pa nga diri pantay nga panmilitar nga kasarabutan ha US. Kinahanglan aghaton an mga patriyotiko nga sundalo nga Pilipino nga ig-undong an nasyunal nga soberaniya ngan dumiri ha imperyalismo nga US ngan mga tagasunod hini ha Armed Forces of the Philippines. Segurado nga magkakamayda han mas maupay nga hingaradtuan an erestorya pankamurayawan han GRP-NDFP kun mahimumulag ngan mabubuksas an imperyalismo nga US ngan iya mga kaalyado nga kaaway han katawhan.”
No comments:
Post a Comment
Note: Only a member of this blog may post a comment.