CPP/NDF-KM-Negros Island: Kondinahon ang mahigko nga iskema sang kabutigan kag propaganda sang AFP kag rehimen US-Duterte! Ubos-kusog nga paslawon kag batu-an ang terorismo sang estado!

Propaganda article posted to the Communist Party of the Philippines (CPP) Website (Oct 26, 2020): Kondinahon ang mahigko nga iskema sang kabutigan kag propaganda sang AFP kag rehimen US-Duterte! Ubos-kusog nga paslawon kag batu-an ang terorismo sang estado!

KABATAANG MAKABAYAN-NEGROS ISLAND

NDF-NEGROS ISLAND

NATIONAL DEMOCRATIC FRONT OF THE PHILIPPINES

OCTOBER 26, 2020

Sa atubang sang nagasaka nga kaso sang Covid-19 kag naga-usmod nga ekonomiya sa pungsod, todo-larga nga nagaratsada ang mahigko kag madinugu-on nga gyera sang mersenaryo nga AFP-PNP batok sa pumuluyo sa mandu sang tiraniko apang tagumatayon nga rehimen US-Duterte.

Nagapakig-isa ang Kabataang Makabayan (KM-Negros) sa tanan nga mga pamatan-on, lider-estudyantie kag mga kabataan sa mabaskog nga pagkondina sa sistematiko nga atake kag pagsabwag sang mahigko nga eskima sang kabutigan kag maitom nga propaganda sang mga berdugo nga pwersa sang estado sa pagpanguna sang NTF-ELCAC sa mga “lecture” sa eskwelahan paagi sa NSTP nga programa.

Nagapakita sang tuman ka desperado sang AFP-PNP agud hinabunan ang brutal nga krimen sang dugu-an nga rehimen batok sa pumuluyo. Ilabi na nga nagadamu ang isip sang mga pamatan-on, mga artista kag iban pa nga mga personalidad nga kritikal kag muklat sa kabulukan sang pasista nga rehimen Duterte nga ginahari-an sang despotiko nga agalon mayduta, dalagko komprador burgesya kag burukrata kapitalista.

Imbes nga hatagan sang pagtamud ang pagtapna sang pandemya kag magdihon sang mga tikang paano solbaron ang malala nga gutom kag kapigaduhon sang mga pumuluyo, prayoridad sang tiraniko nga rehimen ang pagpatuman sang madinugu-on nga gyera. Nagtigana ini sang P19.1 bilyon nga badget sa NTF-ELCAC-ahensya nga nagapanguna sa pagsabwag sang kalakasan, kakugmat, maitom nga propaganda kag pasismo sa pumuluyo.

Diri sa Negros, wala sang kalinong ang kaumhan, padayon nga naga-ilig ang dugo sang mga pumuluyo kag nagataas ang numero sang biktima sang tawhanon nga kinamatarung tuga sang wala-untat nga militarisasyon, harassment, illegal nga pagpangdakop sa patu-patu nga mga kaso base sa mga peke kag ginpangtanom nga mga ebidensya, intimidasyon kag pagpamatay sa hanay sang mga mangunguma, lider-masa, mga progresibo nga grupo kag mga sibilyan. Sa idalum sang rehimen Duterte kag sang ginpatuman ang MO 32 kag EO 70 diri sa Isla, naglab-ot na sa 93 ang biktima sang ekstra-hudisyal nga pagpamatay kag masobra 120 ang biktima sang patu-patu nga kaso.

Sa pag-apruba sang IRR sang Anti-Terrorism Act of 2020 lauman nga labi pa ang ka bangis kag todo-larga ang terorismo sang estado. Klaro nga kasangkapan ang terror law batok sa mga demokratiko nga progresibo nga hanay nga ang katuyu-an amu nga pukanon ang nagakusog nga paghimakas sang pumuluyo kag pahipuson ang mga kritiko sang administrasyon.

Isa ini sa mga rason nga nagtudlo sa mga rebolusyonaryo nga mga kabataan nga usuyon ang dalan sang armado nga rebolusyon agud bag-uhon ang dunot nga sistema sang malakolonyal kag malapudal. Amu man ini ang isa sa mga kabangdanan kung ngaa padayon nga nagakusog ang armado nga paghimakas sa kaumhan bangod sa nagadamo nga numero sang mga isganan nga mga pamatan-on ang nagapakigbahin agud maangkon ang matuod-tuod nga hustisya.

Padayon nga bulag kag bungol ang AFP-PNP kag ang rehimen Duterte sa kamatuoran nga sila mismo ang rason kung ngaa madamo sang mga pamatan-on ang nagapakigbahin sa armado nga paghimakas kag nagapatapu sa NPA. Gani imbes nga solbaron ang kabangdanan sang armado nga komplikto nga naka-ugat sa kahuwad-on sang duta, kahuwad-on sang trabaho kag malala nga inhustisya, pagpang-redtag, kapintas kag pagpamatay ang sabat sang tiraniko nga rehimen.

Sa panahon nga malapnagon ang kabutigan, pagpaniplang kag pasismo sang estado, nagakadapat nga mag-isa ang hanay sang mga pamatan-on agud ibuyagyag ang pasulit-sulit nga iskema sang kabutigan sang rehimen. Kolektibo nga pamatukan kag ibasura ang NTF-ELCAC kag isaylo ang P19.1 bilyon nga badget sini para sa edukasyon, ikaayong lawas kag iban pa nga serbisyo sosyal.

Upod sa indi-malingkang nga paghimakas sang pumuluyo, determinado ang malapad nga sektor sang mga rebolusyonaryo nga mga pamatan-on nga isulong ang pungsodnon demokratiko nga rebolusyon agud paslawon kag batu-an ang terorismo sang estado. Bitbit ang makasaysayan nga papel bilang paglaum sang pungsod padayon nga magahimakas ang mga pamatan-on tubtob maangkon ang hustisya kag mapasabat ang rehimen US-Duterte sa ila mga krimen batok sa pumuluyo. ###

https://cpp.ph/statements/kondinahon-ang-mahigko-nga-iskema-sang-kabutigan-kag-propaganda-sang-afp-kag-rehimen-us-duterte-ubos-kusog-nga-paslawon-kag-batu-an-ang-terorismo-sang-estado/