Cebuano News: Pres Digong mitunol og P65,000 hinabang sa KR

From the Philippine Information Agency (Dec 24): Cebuano News: Pres Digong mitunol og P65,000 hinabang sa KR

TAGBILARAN CITY, Bohol—Gitunol mismo ni President Rodrigo Roa Duterte sa iyang pagbisita sa Bohol niadtong Nobyembre 27 ang tag P65,000 nga tagsatagsa nga hinabang sa mga kanhi rebelde, nga karon kauban na sa reporma (KR).

Didto sa una nga kalihukan sa Presidente sa pagbisita sa Bohol ug kini didto sa Camp Rajah Sukatuna sa Carmen, Bohol, gitunol pinaagi sa ceremonial nga turn-over ngadto sa mga kanhi rebelde ang P50,000 isip abag sa kapanginabuhi-an ug lain nga P15,000 nga dinali-an nga tabang sa mga rebelde nga karon mipili na nga manginabuhi nga malinawon.

Mikabat sa 30 ka mga KR ang midawat sa hinabang sa kagamhanan nga gitunol mismo sa commander in chief sa Armadiong Kusog sa Pilipinas, si Presidente Duterte.

Ang 30 nga midawat sa hinabang, gikan sa Sevilla ug Antequera clusters, segun pa sa Office of the Provincial Social Welfare and Development.

Gani, alang sa mga kanhi sakop sa kalihukan nga walhon apan mitahan dala ang ilang armas, may dugang pa nga programa ang Armandong Kusog sa Nasud.

Kadtong may ikabalik nga light machine gun, makadawat og P200,000, samtang ang may dala nga M14 carbine, may P60,000.00 ug kadtong maka-uli og M16 Armalite, may P50,000.

Kini bisan pa man nga padayon pa nga gihangyo sa Bohol ang Office of the Presidential Adviser on the Peace Process (OPAPP) nga ibalik na ang tabang pinansyal aron ikapundo sa kapanginabuhi-an sa nga kanhi rebelde, nga karon giila na nga kauban sa reporma.

Kahinumduman nga ang OPAPP naghatag og hinabang sa mga kanhi rebelde, nga karon kauban na sa reporma.

May gipatukod na gani nga mga kabalayan sa mga kanhi diha sa kalihukan didto sa Danao ug sa Ubay, samtang may gitanyag pa nga mga yuta nga tikaronon aron lamang gayud may saligan na nga kapaninapi-an ang mga kanhi rebelde.

Samtang gipaningkamotan sa kagamhanan nga mahibalik sa paghisgutay sa kalinaw ang mga sakop sa New People’s Army aron undangon na ang kapid-an na ka tuig nga pag-alsa batok sa kagamhanan, padayon pang nagmagahi ang pipila ka siak nga bahan sa kadtong mga rebelde nga buot nang manginabuhi nga malinawon.

Gani, sa mga panahon nga gisuspenso ang mga operasyon dala sa mga gitamud nga panahon sa kalinaw, mao usab kini ang panahon nga gigamit sa mga rebelde aron palig-onon ang ilang opensiba, diin kasagaran, kini mga dugoon nga pag-asdang.

Tungod sa liput nga pamaagi, mimandu na si Presidente Duterte nga lutoson na hinuon ang mga rebelde ug siksikon ang mga lugar nga gilubloban niini, aron hingpit na nga pukanon ang armadong pakigbisug.

Apan, gipasabut sa Presidente, padayon gihapon ang kagamhanan nga mohangop sa mga motahan na kay nabutaan sa hiwi nga ideyolohiya.

https://pia.gov.ph/news/articles/1016410