NDF/NDF-NCMR: Resulta sa gihimong imbestigasyon ug pagsubay sa pagkatawo ni TSgt. Joseph Paredes

Propaganda statement posted to the National Democratic Front Website (May 18): Resulta sa gihimong imbestigasyon ug pagsubay sa pagkatawo ni TSgt. Joseph Paredes

PAMAHAYAG SA MIDYA
Mayo 18, 2017



Human sa gihimong imbestigasyon ug pagsubay sa pagkatawo ni TSgt. Joseph Paredes napamatud-an nga usa siya ka intelligence officer sa 4th ID PA. Nagmentina og mga sibilyan nga asset nga nakatag sa lain-laing dapit sakop sa erya sa NCMR. Aktibong nagapaniktik sa lihok sa mga NPA. Aduna sab siyay grupo nga ginganlan og Magic 7 nga nagsilbeng “guns for hire” ug ginagamit alang sa pagpanulis. Gipangkilkilan sab ang gagmayng negosyante nga naga-quarry sa Brgy. Kahaponan sa Valencia City. Sugarol ug daghan ang gipagohan kay nagsalig nga armado. Daghan pa ang nahimong salaud sa katilingban kini nga sundalo nga motaas na kung usa-usahan pa pagdetalye dinhi.

Apan, tungod sa nagapadayong serye sa panaghisgot sa kalinaw tali sa NDFP ug GRP kung asa naka-iskedyul ang ikalimang hugna karong umaabot Mayo 26 niining tuiga, ug pagpakita sa tibuok pwersa sa North Central Mindanao Region (NCMR) sa hingpit nga pagsuporta alang sa kalampusan niini, abli pagbuhi kaniya human siya mangayo og pasaylo sa publiko sa mga salaud nga iyang nahimo ug mosaad sa dili na pag-usab niini.

Gihangyo na usab namo ang Third Party Facilitator (TPF) pinaagi ni Bishop Felixberto Calang ug Arch Bishop Antonio Ledesma pagpahigayon nga mapadangat ang among demand ngadto sa Local Crisis Committee (LCC) ug ubang ahensya sa GRP nga daku og ikatabang alang sa hapsay ug luwas nga pag-turnover ni TSgt. Paredes. I-demand na usab namo ang paghunong sa mga combat operations sa AFP ug PNP sa mga espesipikong erya nga ang lista ipadala namo sa Third Party Facilitators alang sa kunsiderasyon sa mga hingtungdang.

Ang positibong tubag sa AFP ug PNP niini nga mga demand ang makapapaspas sa pag-release kang TSgt. Joseph Paredes. Pinaagi sa Komite sa Partido sa NCMR, motugbang pagpakanaug og kamandoan sa hunong-buto ang Kumand sa Operasyon niini ngadto sa mga yunit sa NPA nga nagalihok sa nalatid nga mga lugar sa ibabaw human madawat niini ang pag-uyon sa AFP/PNP. Ang aktwal nga lugar, petsa ug oras sa pag-release ipadangat sa NDF-NCMR ngadto sa TPF sa tukmang panahon.

Ka. Cesar Renerio
Tigpamaba, NDF-NCMR

https://www.ndfp.org/resulta-sa-gihimong-imbestigasyon-ug-pagsubay-sa-pagkatawo-ni-tsgt-joseph-paredes/