Former Rebel nga nagbalik ha Gobyerno nakatagamtam mga hinabang,pamakabuhi

From the Philippine Information Agency (May 18): Former Rebel nga nagbalik ha Gobyerno nakatagamtam mga hinabang,pamakabuhi

Maabot hin 24 nga anay miyembro han kagiusan o kon New People’s Army (NPAs) ha probinsiya han Sinirangan Samar nga nagkabalik ha piud han gobyerno an kinarawat hin ayuda pinansiyal tikang ha Department of the Interior and Local Government (DILG) pinaagi han Comprehensive Livelihood Integration Program o kon CLIP.

An financial assistance nga inabot hin haros P1.6-M in igindistribwir ha usa nga seremonya nga gindumara ha Provincial Governor”s Office, Conferece Hall ha dire pala maiha nga panahon.

Sumala kan Engr. Nida de la Cruz, Municila Local Government Operations Officer-IV han DILG,  Provincial Field Office nga asay nanguna han distribution, an mga former rebel (FR) nga tikang ha magkaiba-iba nga bungto han probinsya nga nagtubyan han ira kalugaringon ha gobyerno han una nga tuig, 2016, pira hini in mag-arag-sawa ngan mga anak na.

Nagdugang pa hi de la Cruz hin pagsering nga an kada FR in kinarawat hin P65,000 ug P5,000 nga immediate assistance, ngan P50,000 nga livelihood assistance. Samtang mayda daman food packs nga nagtikang han Plan Philippines.

Pero sigun kan de la Cruz, nga antes ipatuman an distribution han ayuda , an mga FR in ipinailarom anay hin duha ka adlaw nga orientasyon, values formation ngan livelihood training nga iginhatag han Provincial Social Welfare and Development Office (PSWDO), DILG, Department of Trade and Industry (DTI), ngan Office of the ProvincialAgricultural Services (OPAS).

Sigun kan Engr. De la Cruz nga panuyo daw hini nga makilala hin maupay han FR an kalugaringon, matutduan han tama nga tuhay ngan matadong nga pagkinabuhi, ngan mahag-id ha klase han pakabuhi nga ira ginpili. Pira ha ira in nagpili hin pagmanokan, pagtukod hin piggery, ngan pagtukod hin sari-sari store.

Ini daw nga pitad in para masiguro nga panhihimulosan hin maupay an ayuda han gobyerno ha paglaum nga makakabulig ha pagtikang han ira bag-o nga kinabuhi.

An okasyon in gintambungan liwat nira Dr. Joselito Mutia han Office of the Provincial Governor, Supt. Noelito Getigan han Philippine National Police (PNP)-Eastern Samar Provincial Police Office (ESPPO)  ngan Lt Col Manuel Gador, an Commander han 14th Infantry Batallion han Philippine Army nga mahugot nga kasugbong han DILG ha pagtagad han mga rebelde nga magbalik ha piud han gobyerno.

http://news.pia.gov.ph/article/view/1251494977019/former-rebel-nga-nagbalik-ha-gobyerno-nakatagamtam-mga-hinabang-pamakabuhi