Hiligaynon News: Pumoluyo nagpakamalaut sa mga kalakasan sang CTG

Posted to the Philippine Information Agency (Mar 31, 2021): Hiligaynon News: Pumoluyo nagpakamalaut sa mga kalakasan sang CTG (By Lorenzo O. Lambatin, Jr.)

NEGROS OCCIDENTAL, Marso 31 (PIA)— May kapin sa 200 tanan ka mga pumoluyo sang banwa sang Calatrava kag Toboso ang nagpakamalaut sa mga kalakasan sang Communist Terrorist Group nga New People's Army sa ginhiwat nga duha ka adlaw nga peace rally sadtong tinalikdan nga Marso 25 tubtob 26, suno sa 79th Infantry (Masaligan) Batallion sang Philippine Army.

May ginhiwat nga film-showing kag naghatag man sang testimoniya si ‘Ka Joross’ sa kabudlay nga iya naagyan sang ara pa siya sa hublag kag kon paano siya gintatap sing maayo sang gobyerno sa iya pagsungka, pahayag ni Civil-Military Operations Officer 1Lt. Dansan Camua.

Ang mga nagpasakop sa amo nga hilikuton lunsay mga pamatan-on kag mga ginikanan sa pagpanguna ni Brgy. Captain Dominador Jubahib sang Brgy. Cambayobo, banwa sang Calatrava kag Brgy. Captain Eulogio Julom sang Brgy. Bandila banwa sang Toboso. Nag sumpa sila nga pamatukan ang mga CPP-NPA sa ila nga komunidad.

Kabahin sang programa ang pagsunog bandera sang CPP-NPA tanda sang ila indi pag-ugyon sa amo nga organisasyon upod ang ila pagpanawagan nga untaton na ang koleksyon sang revolutionary tax, kalakasan, paglimbong kag pagpamahug sa mga pumuluyo labi na sa mga kabukiran.

Nagpanghatag man sang mga balasahon bahin sa Enhanced Comprehensive Local Integration Progran (E-CLIP) agud magbalik ang mga katapu sang CTG sa sabak sang gobyerno.

Si Lieutenant Colonel Gerard Alvaran, 79th IB Commanding Officer, nagpahayag nga ang armadong hublag hindi yabi sa pag-angkon sang katawhayan kundi sablag sa kalinong kag pag uswag.

“Bilang inyo nga tagpangapin, magapaninguha ang ‘Masaligan’ troopers nga proteheran kamo batuk sa mga terorista. Buligi kami hayluhon ang mga nadulman naton nga mga kauturan kag untaton ang peke kag wala kasayuran nga kalakasan,” pahayag ni Alvaran. (79th IB-PA/JSC/LOL/PIA6 Negros Occidental)

https://pia.gov.ph/news/articles/1071150