TAGBILARAN CITY, Bohol, Feb. 27 (PIA) -- Singkwenta mil nga abag sa kagamhanan alang sa kapanginabuhi-an ang una-una nga nadawat sa lima ka mga kanhi sakop sa kalihukan nga walhon ug karon mingtabok na sa kagamhanan human nila matagamtam ang kawalay kasegurohan sa ilang kinabuhi sa bukid.
Gawas sa tabang salapi alang sa pangkapital sa ila na unya nga pamuhunan isip nagpuyo nga malinawon, may daghan pa nga bugkos sa abag nga gimandu ni Presidente Rodrigo Roa Duterte alang sa programa kanila nga buot na nga mahibalik sa patag aron manginabuhi nga luwas sa kakuyaw.
Ang bugkos sa mga tabang, nahasukip sa gitawag karon nga Enhanced Comprehensive Local Integration Program (E-CLIP) nga naghiusa na sa mga tabang pinansyal gikan sa kagamhanan ug sa Payapa at Masaganang Pamayanan (PAMANA) nga nagtutok usab sa tabang pangkomunidad sa mga lugar nga gisamot sa rebolusyonaryong kalihukan.
Ang 50 mil sa matag usa sa lima ka mga kanhi rebelde, gtunol sa kagamhanan sinaksihan ni Gobernador Arthur Yap didto sa HEART Caravan sa Tabu-an Antequera Bohol, niadtong mi-aging semana.
Ang mga kanhi rebelde, nagagikan sa Antequera, Calape ug Loon, segun pa ni 47IB Civil Military Operations Officer 1Lt Elma Grace Remonde.
Pinaagi ni Yap, nasaksihan sa tanan ang pagpanumpa og balik sa mga rebelde ngadto na sa kinabuhi nga malinawon.
Didto sa pagtugyan sa abag-panginabuhi-an, gibutyag ni Remonde nga niini, hinay na nga napatinuod ang kahiusahan sa paningkamot sa kagamhanan pinaagi sa nagkadaiyang mga programa nga nagasakwat niadtong mga sakop sa katilingban nga nahisalaag.
Ang E-CLIP, usa na niini nga nangandaoy nga sa katapusan, putlon nga ug undangon ang local nga armadong pagpakigbisug o End Local Communist Armed Conflict (ELCAC).
Gawas sa P50 mil nga pangkapital sa negosyo sa matag sakop sa kalihukan nga mibalik sap anon sa kagamhanan, ang ECLIP nagamandu usab sa kasegurohan nga ang mingtahan sa kagamhanan dili dakpon sa kapolisan ug kasundalohan sulod sa tulo ka tuig sa pag-apply niya sa programa sa kagamhanan.
Samtang nagpaabut ug nagproseso ang kanhi rebelde alang sa programa, may P15 mil usab siyang madawat agi og panggasto ug pamilete samtang nag-apply sa programa.
Sa ila usab nga pagtapon balik sa kagamhanan, obligado usab ang local nga Social Welfare and development Officer nga tabangan sila aron mamabaton og identification cards, aron opisyal na nga makabalik sa panon.
Kon pananglit delikado alang kanila ug sa ilang banay nga mobalik og puyo sa ilang balay, may programa usab sila nga madawat alang sa relokasyon ngadto sa lugar nga walay nakaila kanila.
Gawas pa, sa ilang opisyal nga pagkadawat sa ECLIP, magbukas usab kini sa mga tabang nga gikan sa nagkadaiyang ahensya sa kagamhanan sama sa kapanarbaho-an sa Department of labor and Employment, bansay sa katakus manarbaho sa Technical Education and Skills Development Authority, kapanarbaho-an sa Department of Public Works and Highways, mga pabalay sa National Housing Authority, pagpasakop sa kapunungan sa Cooperative Development Authority ug sa bisan asa nga ahensya ngamakapadali sa ilang pagtapon isip malinawon nga molupyo, subay sa probisyon sa ECLIP, panapos ni Remonde. (rahc/PIA-7/Bohol/Grace Remonde)
No comments:
Post a Comment
Note: Only a member of this blog may post a comment.