Tuesday, May 7, 2019

Hiligaynon News: 3ID ginpanginbulahan sang hepe sang Philippine Army

From the Philippine Information Agency (May 7, 2019): Hiligaynon News: 3ID ginpanginbulahan sang hepe sang Philippine Army

SYUDAD SANG ROXAS, Capiz – Ginpanginbulahan sang tagpamuno sang Philippine Army ang mga katapo sang 3rd Infantry (Spearhead) Division sa ila pagtinguha para sa pag-angkon sang katawhayan kag progreso sa komunidad.

Sa ginhiwat nga selebrasyon sang ika-45 nga anibersaryo sa pagtukod sang 3ID, ginpahayag ni Philippine Army Commanding General Lt. General Macairog Alberto nga nangin dako nga instrumento ang amo nga Army Division sa kampanya sang gobyerno para sa kalinong kag progreso.


Si Alberto ang nangin dinapit nga bisita kag taghambal sa amo nga selebrasyon sang Mayo 1 sa Camp Gen. Macario Peralta sa Jamindan, Capiz.

Ginpanginbulahan kag ginpasalamatan man sini ang hugot nga kooperasyon kag suporta sang mga pumoluyo agod malab-ot ang amo nga handom sang gobyerno ilabi na sa pagbulig sini sa Army.

Kabahin sa amo nga okasyon ang pagkilala sa mga opisyal, empleyado kag soldado sang 3ID nga nagpangibabaw sa performance sang ila hanay.

Ginkilala man diri ang anom ka mga persona, organisasyon kag grupo gikan sa Central kag Western Visayas nga naghatag sang ila dako nga bulig para malab-ot ang misyon sang 3ID.

Tema sa sini nga selebrasyon ang “3ID: Bayani at Kaisa ng Mamamayan para sa Mapayapa at Maunlad na Kabisayaan.” (JBG/PIA6-Capiz)

No comments:

Post a Comment

Note: Only a member of this blog may post a comment.