Tuesday, August 22, 2017

CPP/NPA-NEM: Paggamit sa BHB og Command Detonated Explosive o CDX wala Mahisupak sa mga Internasyunal nga Balaod Sama sa 1997 Ottawa Treaty

NPA-Northeasterm Mindanao propaganda statement posted to the Communist Party of the Philippines Website (Aug 18): Paggamit sa BHB og Command Detonated Explosive o CDX wala Mahisupak sa mga Internasyunal nga Balaod Sama sa 1997 Ottawa Treaty

Ka Ariel Montero, Spokesperson
NPA-Northeastern Mindanao

18 August 2017

Daghan nang gipagawas nga mga pamahayag ang rebolusyonaryong kalihukan agi’g pagpatin-aw mahitungod sa paggamit sa BHB sa CDX ug pagtubag sa malisyoso ug malinglahong akusasyon sa AFP nga land mine ang CDX.

Sa panahon nga makaangkon ang mga pwersa sa AFP/ PNP og mga kaswalti bunga sa pagkaigo sa CDX sa BHB dihadiha dayong magtagawtaw ang ilang mga tigpamaba ug mga opisyal nga migamit kuno ang mga Pulang manggugubat og landmine. Nahisupak kuno ang BHB sa internasyonal nga kasabutan ug sa CARHRIHL nga nagdili na sa paggamit og landmine.

Sumala sa kahulugan, ang landmine mao ang aktibong explosibo nga gisulod sa kaha nga plastic o puthaw, gilubong sa yuta ug mobuto sa iyang kaugalingon sa higayon nga matumban sa tawo o maagian sa sakyanan. Kaylap kining ginagamit sa mga imperyalistang manunulong panahon sa Una ug Ikaduhang Gubat sa Kalibutan, Vietnam War, gubat sa Cambodia, Africa ug uban pa. Ang landmine kaniadto maoy usa sa mga hinagiban sa gubat sa mga pagpanulong ug pagkontrol sa mga nasud.

Gigamit kini nag-una alang sa pagdepensa sa ilang mga teritoryo aron kun adunay moatake may mobusikad bisan walay pwersa. Tungod sa kadaghang gilubong niini sa yuta ug dagat daghang mga sibilyan ang nabiktima tungod sa pagbuto sa wala na ma-recover nga gipangtaod nga landmine.

Sa pagkusog sa internasyonal nga kampanya batok sa mga imperyalistang pagpanulong, giduso sa daghang nasud ug organisasyon ang pagdili na sa paggamit sa landmine. Niadtong Disyembre 4, 1997 didto sa Ottawa, Ontario, Canada, napirmahan ang Mine Ban Treaty o Ottawa Treaty sa usa ka convention. Ang nag-unang unod sa internasyonal nga kasabutan mao ang pag-imposar sa paglimita sa paggamit sa landmine apan dili absolutong giwala. Wala mopirma niini ang US, Russia, China ug uban pa. Rason sa China nga ginagamit nila ang landmine sa ilang mga boundary isip depensa.

Busa subay sa kinaiya sa landmine nga gigamit sa niagi ug sa gidili sa Ottawa Treaty walay nasupak ang BHB sa paggamit sa CDX. Una, ang CDX usa ka klase sa gamay nga bomba nga gipabuto pinaagi sa operitor, batok sa military target. Dili tinuod nga landmine kini nga mobuto lang sa iyang kaugalingon.

Dili tinuod usab nga naglapas ang BHB sa CARHRIHL sa paggamit niini sa CDX. Ang unod sa CARHRIHL naghisgot sa tawhanong katungod nga angay respetohan. Wala mahilakip dinhi ang pagdili sa paggamit sa CDX batok sa mga military target. Subay sa ikatulong bahin sa CARHRIHL nga mao ang Pagrespeto sa Tawhanong Katungod sa Artikulo 2 – probisyon #15, nagsaysay “Ang katungod nga dili mahiagom ug masugamak sa mga linugsana’y nga pagbakwit, pagbabag sa kan-onon (food blockade) ug uban pang porma sa pang-ekonomiyang pagbabag ug ang pagpaturagas nga pagpamomba, pagpanganyon, pagpaarak, pagpamusil ug paggamit og mga landmine.”

Ang pagtagawtaw karon sa AFP ilabina sa 402nd Bde kabahin sa land mine resulta sa 7 ka patay ug 10 ka samaron nga nahiagoman sa mga pwersa sa 7th SF coy 3rd SFB sa usa ka ambus nga gilunsad sa BHB-Front 19 didto sa Buringon, Marihatag, Surigao del Sur niadtong Agusto 15, 2017. Nakaangkon ang 3rd SFB og ubay-ubay nga kaswalti tungod kay nasabak sila sa gitaod nga mga CDX.

Tukma lang nga mogamit ang BHB-NEMR sa mga CDX isip dugang kusog niini batok sa dakung pwersa sa AFP nga nangatake nga may kusgang armas, may back-up pa nga artileriya ug air force ug may dakung pundo sa rekurso.

Busa, mas angayang panghimarauton ang pinatakang pagpaarak, pagpanganyon ug pagpamomba sa AFP ngadto sa mga komunidad panahon sa ilang mga operisyong militar nga miresulta sa dinaghang pagpamakwit, pagkaguba sa pinuy-anan ug panginabuhian sa mga lumulupyo.

No comments:

Post a Comment

Note: Only a member of this blog may post a comment.