NDFP Bohol
7 May 2017
Press Release
Niadtong Mayo 3, 2017 sa may alas 10 sa gabii, giatake sa yunit sa Francisco Dagohoy Command sa New People’s Army (NPA) sa Bohol ang detachment sa 47th IB Phil. Army ug CAFGU sa Brgy. Datag, Inabanga, Bohol. Mikabat sa pipila ka minutos ang sinukliay sa mga bala nga miresulta sa pagkamatay sa usa ka regular army ug 3 ka sakop sa CAFGU ang nahimong samaron samtang walay casualty sa han-ay sa NPA.
Kining pag-atake gipahamtang isip silot ngadto sa AFP nga mihimo og lainlaing pangabuso sa nakapalibot nga sibilyang komunidad sama sa pagpabuto-buto sa ilang armas kun mangahubog. Midugang niini’ng mga salaod mao ang paturagas nga pagpamomba sa Brgy.Napo, Inabanga niadtong Abril 11 ginamit ang isyung gyera batok sa teroristang Abu Sayyaf Group (ASG) nga miresulta pagkagutad-gutad sa lawas ug pagkamatay sa duha ka inosenteng sibilyan nga pulos senior citizen. Ang maong pagpamomba miresulta og grabeng kahadlok sa
katawhan ilabi na sa mga kabataan ug mibunga sab og dakong kadaot sa kabtangan sa mga sibilyan lakip na niini ang pagkamatay sa 3 ka kabaw, mga baboy ug uban pang hayopan.
Ang magtiayong biktima nga si Constancio ug Crisanta Petalco, parehong nag-edad og kapin 60 anyos, pugos nga gipasanginlan sa militar nga mga sakop sa ASG aron ipatuo sa mga nabalaka kaayong Bol-anon nga gamay na lang ang nahibilin sa 11 kuno ka terorista. Apan
nabulgar ang drama sa dihang pagka Abril 22, nasakpan si Supt. Maria Cristina Nobleza, usa ka colonel sa Philippine National Police, nga buot muluwas sa nahibiling sakop sa bandidong grupo nga bisan sa kagamay na lang gyud, di gihapon mapuo. Hinuon, pinaagi sa pagbutyag ni kanhi Senador Aquilino Pimentel nga amahan karon sa presidente sa senado nga si Koko Pimentel, nahimo nang usa ka publikong kasayoran nga niadtong sayong bahin diay sa
dekada 90 ang ASG girekruta sa Central Intelligence Agency (CIA) ug gibansay mismo sa mga elite nga yunit sa AFP didto sa Sulu ug Tawi-Tawi. Human niini, gipadala ang ASG isip mga mujahideen kun holy warriors sa nagtakuban nga gubat sa US batok sa militar sa Rusya
didto sa Afghanistan.
Ang mga kadaot nga bunga sa paggukod sa ASG dinhi sa Bohol nga kunsabo ra sab diay sa mga pwersang pangseguridad sa gobyerno, simple lang nga gisalikway sa militar nga murag wala silay tulubagon. Kining ilang gihimo, kalapasan sa regulasyon sa kondukta sa gubat nga nagtakda nga nangunang katungdanan sa AFP ang pagpaseguro sa kaluwasan sa mga sibilyan
ug ilang kabtangan.
Ang NDF-Bohol lakip na ang Communist Party of the Philippines ug NPA sa probinsya, miduyog sa kagul-anan sa masa nga nabiktima niining maong gyera. Nag-awhag kini nga angay magmatukion ang katawhan ug dili na magpailad sa pakana sa US ug AFP nga miggamit sa gubat batok terorismo aron gukdon ang makatarunganong rebolusyonaryong pakigbisog sa katawhan ug hatagag rason ang pagpondo ug direktang interbensyon sa US
niining atong nasud isip kabahin sa ilang maniobra dinhi sa Asya batok sa China.
Nanawagan kini sa tanang rebolusyonaryong pwersa nga patas-on ang diwang masukolon batok sa tanang pagpanglingla ug kabangis nga gipatuman sa AFP pinaagi sa bag-ong kontra-insurhensyang kampanyang Oplan Kapayapaan. Gipadayag sab sa NPA ang pagpakusog niini
sa paglunsad og mga taktikal nga opensiba batok sa mga abusadong yunit sa mersenaryong AFP ug batok sa mga patigayong langyaw nga nakadaot sa kinaiyahan ug katawhan.
https://www.philippinerevolution.info/statements/20170507-afpcaa-detachment-sa-datag-inabanga-bohol-giatake-sa-npa
No comments:
Post a Comment
Note: Only a member of this blog may post a comment.