Ka Ariel Magbanua, Spokesperson
NPA-South Central Bukidnon
8 May 2017
Gisaluduhan sa NPA-South Central Bukidnon Subregional Command ang mga mapangahasong aksyong militar sa mga Pulang manggugubat sa malampuson niining pagreyd sa DASIA Security Agency sa mismong Brgy. Poblacion, Valencia City, Bukidnon pasado alas 6 sa gabii sa Mayo 5, 2017. Walo ka armas nga gilakipan sa 1 AK47, 1 ka .45 nga pistola, 3 ka shotgun ug 4 ka .38 nga pistola ang nasakmit dinhi.
Sa national highway sa Valencia City, nagmontar og checkpoint sa mao gihapong higayona ang lain pang yunit sa NPA-SCB. Nasakmit sa NPA ang usa ka 9mm Glock nga pistola gikan sa usa ka membro sa Maramag-PNP nga mopadulong sa Valencia City.
Aduna pay laing yunit sa NPA-SCB ang nagcheckpoint duol sa security agency. Nadakop dinhi si TSgt. Joseph Paredes sa 8th Infantry Batallion diin nakuha kaniya ang usa ka.45 nga pistola. Human sa maong mga aksyon, luwas nga nakawidro ang mga operatiba sa NPA.
Ang maong pag-atake sa NPA sa sentrong bahin sa Valencia City nagpahimakak sa ginapagarpar sa 8th Infantry Batallion ug 403rd Brigade nga nagkagamay ug nagkahuyang ang suportang masa sa NPA kay mismong ang sentro sa syudad na man ang giatake nga nagpakita sa lapad nga suportang masa aron masulod ug makalunsad og pinakilab nga aksyong militar ug luwas nga nakawidro ang NPA sa kabukiran.
Nahimong kasangkapan ang mga security agencies aron depensahan ang interes sa mga bangko, negosyante ug kompanya busa nahimo silang lehitimong target sa opensiba sa NPA ilabina karon nga nahimong init ang isyu sa kontraktwalisasyon ug Endo sa mga mamumuo. Gigamit sila aron pig-otan ang mga mamumuo sa pagpanghingusog sa ilang mga lehitimong demanda ug katungod.
Ang kaylap nga mga taktikal opensiba sa NPA sa rehiyon ug bisan sa tibuok nasud pagpakita lang sa hugot nga pagsuporta niini sa peace talks kay pinaagi niini mahatagan og katarungan ang paglunsad sa peace negotiations aron masalom gyud ang gamut hinungdan sa armadong panagbangi, ug sa ingon, makab-ot na ang makatarunganon ug malahutayong kalinaw.
Ug samtang wala pay napirmahang kasabutan alang sa sispyr o hunong-buto magpadayon ang NPA sa paglunsad og mga aksyong militar subay sa nagkalapad ug nagkalalom nga baseng masa aron mapanghingusog ang pagpatuman sa tinuod nga reporma sa yuta ug paglunsad sa nasudnong industriyalisasyon.
No comments:
Post a Comment
Note: Only a member of this blog may post a comment.