CPP/NPA: 61st IB, apat ka tuig nga paglapas sang tawhanon nga kinamatarung

NPA propaganda statement posted to the CPP Website (Dec 14): 61st IB, apat ka tuig nga paglapas sang tawhanon nga kinamatarung (61st IB, four years of violations of human rights)

Jurie Guerrero
Spokesperson
NPA Central Panay Front Operations Command (Jose Percival Estocada Command)

 

Tuman nga ginpabugal ni Maj. Gen. Vicente Porto, commanding general sang 3rd ID, ang pagsaylo sang ginabansagan nga Hunter Battalion sang Philippine Army sadtong Nobyembre 2010.May ipabugal gid man si Maj. Gen Porto bangud ang 61st IB ang isa man sa mga “pinaka-ali nga batalyon sang armi” – pinaka-ali sa paglapas sang tawhanon nga kinamatarung nga iya ginpamatud-an sa malaba nga listahan sang iya mga kalakasan sa Isla sang Negros halin sang 2002 asta 2010.

Sa pagpatuman sang Peace and Development Operations sa idalom sang Oplan Bayanihan sang Rehimeng Aquino humalin 2011 tubtob 2014 liwat ginpamatud-an sang 61st IB ang iya “pagka-ali” sa Isla sang Panay labina sa probinsya sang Capiz kag bahin sang Iloilo paagi sa mga masunod nga pinakatampok nga kalakasan:

1. Enero 11, 2011 – pagpamahog paagi sa pagtaya sang pusil sa kay Anabelle Loreno kag sa iya apat ka mga kabataan mga babaye nga naga-edad sang tatlo asta 14 ka tuig. Nagresulta ini sa paglain sang pamensaron sang 14-anyos nga bata.

2. 2011 – 2012 – pagposisyon sang mga PDT units sa mga sentro sang baryo sa Tapaz kag Calinog nga nagbutang sa katalagman sang kabuhi sang mga pumuluyo kag naghatag sang huol sa ila pagsinalayo. Sa amo nga mga panahon nagduging ang kinawatay sang karabaw kag iban pa nga kasapatan sang mangunguma, nagdamo ang kaso sang pagmolestya kag pagpabusong sang mga kababainhan, pagpalapta sang mga malaswa nga talan-awon kag pagdala sang mga bayaran nga babaye sa ila mga detatsment.

3. Marso 11, 2012 – pagpalupok sang M203 grenade launcher sa balay ni Odloy Aguirre sa Tacayan, Tapaz, Capiz nga ginkamatay sang iya 6-tuig nga bata nga si Rodelyn Aguirre kag pagkasamad sang 4-tuig nga manghod sini.

4. Oktubre 7, 2013 –pagpa-arak sang lupok sa balay ni Kagawad Abelardo Diaz sa Nayawan, Tapaz, Capiz nga ginkamatay ni Pastor Mirasol kag pagkapilas ni Rolando Diaz, Sr.

5. Pagpamahog sa mga sibilyan labi na sa mga lideres sang militante nga organisasyon nga nagapamatuk sa padayon nga pagpang-agaw sang duta sang 3rd ID, pagpamatuk sa pagatukuron nga makahalalit nga dam kag nagapatuman sang mga programa sa rehabilitasyon sa mga biktima sang Yolanda kag sa mga ginasuspetsuhan nga taga-suporta sang NPA.

6. Pagsamad sang mga paray sa kaingin kag mga pananom sang mangunguma sa panahon sang mga combat operations labina pagkatapos sang superbagyo Yolanda.

7. 2014 – liwat nga pagposisyon sang mga PDT units sang 61st IB kag mga detatsment sang PNP-SAF kag maneuver platoons sang PNP-Public Safety Company sa mga sentro sang baryo sa mga kabaryuhanan sang Tapaz kag Calinog sa tuyo nga mapunggan ang mga ginabansagan nga programa sang NPA para sa rehabilitasyon sang mga biktima sang superbagyo Yolanda kag matapna ang pagpamatuk sang pumuluyo sa pagatukuron ngamegadam sa Suba Jalaur sa 2015 kag plano nga pagtukod sang megadam sa Suba Pan-ay.

 

Sa pihak sang malaba nga listahan sang mga paglapas sang tawhanon nga kinamatarung wala sang huya nga paliwat-liwat nga ginapabugal sang pamunuan militar sang 3rd ID kag 301st Bde ang kuno zero-human rights violation sang military sa isla.

Sa pagsaulog sang Pangkalibutanon nga Adlaw sang Tawhanon nga Kinamatarung subong nga Disyembre 10, 2014 mabaskog nga ginapakamalaut sang Jose Percival Estocada, Jr. Command sang NPA-Central Panay ang nagatinangkas nga mga pasista nga kalakasan sang 61st IB, 301st Bde kag 3rd ID sa tabon sang mapaniplang nga Peace and Development Operations sang Oplan Bayanihan sang rehimeng US-Aquino.

Sa tuig 2015, sa padayon nga pagpamatuk sang pumuluyo sa umpisa sang pagtukod sang Jalaur Dam, sa pagpanukot sang mga biktima sang superbagyo Yolanda kag sa pagpanawagan sa pagpatalsik sang kurap, butigon kag inutil nga rehimeng Aquino labi nga magabaris ang pasista nga militar kag amo sini sa pagpanglupig sa pumuluyo. Pero pat-ud nga pagasumalangon sini ang mas mabaskog kag mas lapnagon nga pagbato sang pumuluyo kadungan sa nagasigabong nga mga taktikal nga opensiba sang iya tunay nga hangaway.

http://www.philippinerevolution.net/statements/20141214_61st-ib-apat-ka-tuig-nga-paglapas-sang-tawhanon-nga-kinamatarung