CPP/NPA-Negros Island ROC: Ipadayon ang paghimakas ni Papa Isio agud mahilway ang pungsod!

Propaganda article posted to the Communist Party of the Philippines (CPP) Website (Nov 5, 2020): Ipadayon ang paghimakas ni Papa Isio agud mahilway ang pungsod!

JUANITO MAGBANUA

SPOKESPERSON

NEGROS ISLAND REGIONAL OPERATIONAL COMMAND

APOLINARIO GATMAITAN COMMAND

NEW PEOPLE'S ARMY

NOVEMBER 05, 2020

Sa pagsulat sang kasaysayan, wala ginhatagan sang importansya ang kamalahalon nga papel sang mga mangunguma sa ila pagpakig-away kag kon paano napahuyang ang mga kolonyalista nga Espanyol tubtob sa ila pagkalutos.

Ang matuod nga kasaysayan sang aton paghimakas amo ang kasaysayan sang mga mangunguma sa ila paghimakas nga maka-angkon sang kaugalingon nga duta. Wala ini ginpalapnag kag ginpakita sa masunod nga mga henerasyon kon paano ginhimuslan kag ginpigos ang pumuluyo sang mga kolonyalista nga Espanyol. Sa baylo ginturse ini agud ipakita ang maayo nga katuyuan sang sini nga mga mananakop. Halos tanan nga maayo nga hitabu sa kasaysayan ara lang sa kamot kag pagpamuno sang mga agalon may duta. Ang mga pagpaninguha sang mga katipunero kag ni Dionisio Magbuelas o Papa Isio halos ginpanas na ini sa kasaysayan sang Negros. Si Papa Isio isa ka ordinaryo nga anak sang mangunguma nga nangin biktima sang kapintas sang mga kolonyalista nga Espanyol. Nag-organisa sang pareho nga mga mangunguma kag mga tumandok agud mag-alsa batok sa kolonyalista nga Espanyol.

Nangin lapnagon ini paghimakas kontra sa kolonyalista nga Espanyol bangud nagadala sang interes sang mga mangunguma sa duta kag tuyo nga paghilwayon pumuluyong Negrosanon. Gani, nag-angkon ini sang malapad nga suporta sang mga Negrosanon ilabi na sa sentral kag sur nga bahin sang Negros. Bisan pa man nga wala magmadinalag-on ang ini nga paghimakas bangud sa patraidor nga pamaagi sang mga Espanyol, naghatag ini sang malahalon nga leksyon sa pumuluyong Negrosanon nga indi simple nga maangkon ang duta. Ginabuhisan ini sang dugo bangud indi boluntaryo nga ihatag sang mga agalon may duta ang ila gin-agaw nga kadutaan sa simple nga pamaagi. Kabaliskaran ini sa gusto ipakita sang mga agalon may duta nga simple nga kalinong kag batunon nalang ang ginhatag kon ano ang inyo kapalaran.

Ang paghimakas nga ginlunsar sang mga Katipunero sa pagpamuno ni Andres Bonifacio kag ni Papa Isio sa Negros, kabahin sang burgis demokratiko nga rebolusyon. Wala ini magmadinalag-on bangud sa interbensyon sang Estados Unidos kag pag-agaw sang kadalag-an sang pumuluyong Pilipino sa mga kolonyalista nga Espanyol. Nagpabilin ang mga mangunguma nga nag-antus sang tuman nga kapigaduhon sa malawig nga panahon bangud wala ini maangkon ang duta nga madugay na nga ginahandum. Katungdanan sang subong nga mga rebolusyonaryo nga Negrosanon ang pagpadayon sang wala matapos nga rebolusyon nga ginlunsar sadto sang mga Katipunero kag ni Papa Isio agud hilwayon ang mga pumuluyo ilabi na sa mga mangunguma kag mga mamumugon sa Negros.

Palig-unon ang aton hanay paagi sa pag-organisa sang mga mamumugon kag mangunguma. Ilunsar ang Pungsodnon nga Demokratiko nga Rebolusyon paagi sa armado nga paghimakas. Ini lang ang ultimo nga solusyon agud mahatagan sang kasulbaran ang madugay na nga problema sang mga mangunguma sa pag-angkon sang kaugalingon nga duta.###

Mabuhay ang Masang pigos! Isulong ang Armadong Paghimakas tubtob sa kadalag-an!

https://cpp.ph/statements/ipadayon-ang-paghimakas-ni-papa-isio-agud-mahilway-ang-pungsod/