CPP/NPA Central Front Panay: 12IB nga naga-sabwag sang terorismo sa mga tumandok nga mangunguma ginsilutan

Propaganda article posted to the Communist Party of the Philippines (CPP) Website (Nov 5, 2020): 12IB nga naga-sabwag sang terorismo sa mga tumandok nga mangunguma ginsilutan

ROJA PANAY

PUBLIC INFORMATION OFFICER

NPA-CENTRAL FRONT PANAY

MT. BALOY COMMAND

PANAY REGIONAL OPERATIONAL COMMAND

NEW PEOPLE'S ARMY

NOVEMBER 05, 2020

Ginapanginbulahan kag gina-abi-abi sang mga pumuluyo ang madinalag-on nga opensiba sang isa ka yunit sang Mt. Baloy Command-New People’s Army, Central Panay batok sa tropang RCSP sang 12th Infantry Battalion sadtong Oktubre 22, sa Brgy. Nayawan, Tapaz, Capiz. Isa (1) ang patay kag apat (4) ang pilason sa kaaway samtang wala sang kaswalidad sa bahin sang mga pulang hangaway.

Alas-kwatro sang hapon sang ginpalukpan ang nagalakat nga tropa sang 12IB sang command-detonated nga eksplosibo sang nakaposisyon nga mga pulang hangaway. Ulihi na nakabalos ang mga pasista nga tropa kag patarasak nga nagpinalupok ang mga ini asta sang alas singko sang hapon.

Bag-o lamang gin-reconstitute sadtong Hunyo sang 3ID-PA ang 12IB para mag-operate sa mga banwa sang Maasin, Lambunao, Janiuay, kag Calinog sa Iloilo kag sa banwa sang Tapaz, Capiz. Ang mga tropang kombat kag RCSP sang 12IB ang responsable sa pagsabwag sang kakugmat kag terorismo sa mga mangunguma sang Sentral Panay bisan pa man sa tunga sang pagduging sang Covid-19 pandemya sa mga nasambit nga banwa.

Terorismo ang dala sang mga tropang kombat kag mga RCSP tim sang 12IB sa mga baryo sang Tapaz kag Calinog. Pila sa mga ginareklamo sang mga pumuluyo ang masunod nga krimen:

1. Pagpamalay-balay para pahugon nga mag-surrender ang mga sibilyan.
2. Pagpatipon sa mga pumuluyo para pahugon sang pagkapriso sang 12 ka tuig sa bayolasyon sang Anti-Terror Law ni Duterte kon mahibal-an nga nagahatag suporta sa NPA. Ang ginapalapta nila nga mabal-an lang nga nagpainom sang bisan tubig lang sa NPA, ila dakpon kag prisohon.
3. Pagpwersa sa mga opisyal sang baranggay nga i-deklarar ang CPP, NPA, kag NDFP nga persona non grata.
4. Pagpwersa sa mga pumuluyo nga mag-pirma sang kasulatan batok sa NPA.
5. Pagpaggwa sang mga listahan sang sibilyan nga kuno katapo sang NPA kag pag-pahug sa ila mga suod kag pamilya.
6. Pagkampo sa sentro sang baryo kag pagbase sa mga multi-purpose kag barangay hall.
7. Pagkumpiska sa mga mangunguma sang ila mga paltik nga pusil nga ginagamit sa pagpangayam kag pangdepensa sa ila panimalay.
8. Pagguba sa mga talamnan sang mais kag palay sang mga mangunguma.
9. Pagbale-wala sa mga pagsulundan kag tikang sa ikaayong-lawas kag pagpatigayon sang mga madamuan nga pagtipon nga nagabutang sa mga mangunguma sa peligro sang Covid-19.

Ang 12IB kag ang 3ID ang matuod nga mga terorista. Katuyuan sang ila mga RCSP tim nga pahugon ang mga mangunguma kag gub-on ang ila mga paghiliusa para depensahan ang panagabuhian kag duta sang kamal-aman kag ginatiplang ang mga mangunguma para sa mga mapanghalit nga proyekto. Kasangkapan ini para sa desperado nga pagpaninungha sang militar nga pierdihon ang NPA sa Panay. Sa baylo, nagabaskog ang rebolusyonaryo nga kahublagan kag naga-lapad ang mga nagasuporta sa NPA.

Nangin madinalag-on ang opensiba bangud sa wala-untat nga suporta sang pumuluyo sa ila hangaway. Amon ginapanawagan sa mga pumuluyo, labi na ang mga biktima sang kalakasan sang militar nga mangisog kag magbato sa inhustisya. Ang pinakamaayo amo nga mag-intra sa NPA. Ma-angkon lamang ang hustisya kag kalinungan paagi sa matarung nga inaway banwa.

https://cpp.ph/statements/12ib-nga-naga-sabwag-sang-terorismo-sa-mga-tumandok-nga-mangunguma-ginsilutan/