CPP/NPA-Surigao del Sur: Mas gipaigting nga militarisasyon sa AFP ug PNP sa kabanikanhan, mipasamot sa grabeng pag-antus ug panglupig sa katawhang Lumad

Propaganda article posted to the Communist Party of the Philippines (CPP) Website (Oct 27, 2020): Mas gipaigting nga militarisasyon sa AFP ug PNP sa kabanikanhan, mipasamot sa grabeng pag-antus ug panglupig sa katawhang Lumad

SANDARA SIDLAKAN | SPOKESPERSON

NPA-SURIGAO DEL SUR

NORTHEAST MINDANAO REGIONAL OPERATIONAL COMMAND

NEW PEOPLE'S ARMY

OCTOBER 27, 2020

Ang gipaigting nga militarisasyon sa mga mersenaryong AFP ug PNP sa kabanikanhan nagbunga og mas grabeng pag-antus ug pagpanglupig sa katawhang Lumad. Pinaagi sa pugsanong pagpundo sa tropa sa AFP/PNP ilalom sa malinglahong Community Support Program (CSP) sa mga komunidad sa Lumad, kalisod ug pagpamig-ot sa panginabuhian ug pagpanglapas sa tawhanong katungod ang adlaw-adlaw nilang nasinati. Dugangan pa sa mas gipasubsob nga mga dagkong operisyong kombat sa mga berdugong AFP/PNP dinha sa kabukiran.

Dinhi sa Surigao del Sur, sukad kaniadtong Mayo 2020 hangtud sa kasamtangan, walay puas ang mga operisyong kombat sa AFP ug PNP sa mga Lumad nga komunidad. Partikular niini nga mga munisipyo mao ang San Miguel, Lianga, Marihatag, Tago, San Agustin, Cagwait, Lanuza ug Carmen. Lakip usab niini ang lungsod sa Prosperidad sakop sa probinsya sa Agusan del Sur. Gimobilisa niini ang mga tropa sa AFP sa 401st ug 901st brigade partikular ang 3rd SFB, 75th IBPA ug 36th IBPA ug mga myembro sa PNP mobile battalion.

Gawas sa mga sustinidong operisyong kombat, aduna usab pito ka mga komunidad ang wala nay nagpuyo, samtang onse ka komunidad sa Surigao del Sur ang kasamtangang giyak-an sa mga CSP. Kini nga mga komunidad plano usab nga tukoran og mga kampo detatsment sa CAFGU.

Ang mga pinatakang pagpamomba sa AFP ngadto sa mga gidudahan nilang kampo sa NPA nagresulta og dislokasyon sa pamuyo sa gatusan ka pamilyang Lumad. Nanugdang kining ilang mga bomba duol sa mga komunidad, kabalayan ug mga umahan sa mga lumulupyo, gamit ang ilang mga haytek nga pwersang pangkahanginan ug kanyon.

Ang daang abunda ug produktibong kahinguhaan sa komunidad sa Lumad nawala. Gatusan ka mag-uuma ang napugngan sa pagpalambo sa ilang mga umahan. Ginapig-utan sila sa AFP/PNP nga moadto sa ilang mga umahan, duha hangtud tulo ka oras lang ang ginatugot sa ilaha nga mag-uma matag adlaw. Ang molapas sa oras pasumanginlang nakigkita sa NPA. Gilimitahan sila sa kaaway ngadto sa upat ka kilong bugas ug pipila ka panud-an ang pwede lang paliton sa matag pamilya. Ginadaot usab sa nag-operisyong tropa sa AFP ang mga pananom sa ilang mga umahan.

Kaluha niining pagpamig-ot sa panginabuhian sa katawhang Lumad, ang walay puas nga pagpanglapas sa AFP/PNP sa ilang mga tawhanong katungod. Mas midaghan ang ihap sa mga sibilyan, lider Lumad ug mag-uuma ang gikasuhan ug mga tinumo-tumong kasong kriminal, gidakop ug gipreso. Adunay pipila ka mga kabalayan ang gitamnan og mga bomba ug armas aron ipatuong mga myembro sila sa milisyang bayan ug NPA. illegal nga ginasaka ang ilang mga kabalayan ug ginahilabtan ang ilang mga kabtangan nga walay mandamyento. Pugsanong ginapasurender ang mga lumulupyo lakip ang mga menor de edad gikan sa 13 anyos hangtud 16 anyos nga kuno mga myembro sa NPA. Pinugos usab silang ginarekrut pagka-CAFGU. Dugang pa, tigpasiugda ang AFP ug PNP sa mga kriminal ug anti-sosyal nga gimbuhaton sama sa pagpakaylap og ilegal nga druga, sugal, inom, pornograpiya, pagpanapaw, kawat, penile implant (pag-inject og baby oil sa kinatawo sa lalaki) ug pagpamatay.

Lain pa ang malisyosong pagpasirado sa AFP/PNP gamit ang DepEd sa mga eskwelahan nga gipundar sa katawhang Lumad. Nagtunhay kini nga tulunghaan kapin 20 ka tuig na ang milabay.

Aron mas labaw pang pahimuslan ug daugdaugon ang katawhang Lumad, gigamit nga instrumento sa AFP ug PNP ang mga aristokratang lider Lumad sama nila ni Marcos Bocales, Rico Maca, Jimmy Guinsod ug uban pa. Wala kini sila gituboy sa katawhang Lumad aron nga mamahimong Datu sa mga tribo. Gigamit kini sila isip hinagiban aron paludhon ug babagan ang katawhang mibarug ug misukol batok sa mga makadaot nga programa ug palisiya sa rehimeng US-Duterte. Ug aron bungkagon ang nagtunhay nga panaghiusa sa katawhang Lumad.

Taliwala sa ginatagawtaw sa rehimeng US-Duterte nga hugot subayon ang mga health protocols aron makalikay sa COVID- 19, nagpasiugda na hinuon ang AFP/PNP ug CAFGU og mga panagtapok, pulong-pulong ug mga salida sa komunidad. Kanunay nga moadto ug mopuyo kuyog sa mga sibilyan nga walay face masks ug social distancing.

Tumong niining magun-ubong gera nga gilunsad sa pahoy nga rehimeng US-Duterte, AFP ug PNP mao ang paghawan sa hanoy nga pagpasulod sa langyaw ug lokal nga minahan ug plantasyon nga anaa sa mga yutang kabilin sa katawhang Lumad. Nabutang sa bung-aw sa kamatayon ang ilang kinabuhi ug panginabuhian tungod sa padayong sustinidong operisyong kombat, paniktik ug saykolohikal sa ilang mga komunidad. Lauman ang mas labaw pang pagpahimulos ug pagpangdaogdaog sa estado ngadto sa ilang han-ay.

Atol niining bulan sa Nasudnong Minorya, angayang ipasibaw ug ipabarug sa katawhang Lumad ang ilang mga demokratikong katungod ug pangandoy. Pinaagi lamang sa paglunsad og armadong pagsukol tukmang mapanalipdan ang ilang katungod sa yutang kabilin, katungod sa kaugalingong paghukom ug mga demokratikong katungod sa katawhan

Depensahan ug panalipdan ang yutang kabilin ug katungod s kaugalingong paghukom sa Katawhang Lumad!

Suklan ang pagpangatake sa AFP ug PNP!

Palagputon ang paghari sa pasistang rehimeng US-Duterte!

Iasdang ang gubat sa katawhan!

https://cpp.ph/statements/mas-gipaigting-nga-militarisasyon-sa-afp-ug-pnp-sa-kabanikanhan-mipasamot-sa-grabeng-pag-antus-ug-panglupig-sa-katawhang-lumad/