MARAMAG, Bukidnon, Agosto 20 (PIA)-- Dose (12) ka mga kanhing miyembro sa New People's Army kon NPA ang boluntaryong misurender sa 88th Infantry "Maringal" Battalion Headquarters South Poblacion, Maramag, Bukidnon sa may alas 10 sa kagabhion niadtong Agosto 24.
Ang nasangpit nga kanhing mga rebelde na-ila nga mga myembro sa Malayag 1, Guerilla Front Malayag, SRC2, NCMRC ubos sa ‘command’ ni alyas ‘Ricky’ nga nag-operate sa Cabanglasan, Bukidnon.
Uban sa gi-surender sa mga kanhing rebelde ang usa ka M16A1, duha ka Garand Rifle, tulo ka Carbine M1 Rifle, upat ka binuhat nga Shotgun, ug usa ka kalibre 45.
Sumala pa ni alyas Rolen usa ka babayeng Squad Supply Officer nga “Gutom ug kalisud ang among natagamtaman, nahadlok sad mi tungod sa pagkamatay sa among kauban atol sa engkwentro. Basin unya ug mapareha mi sa ila. Dili pa ko gusto nga mamatay tungod kay daghan pa ko’g gustong himuon sa akong kinabuhi kauban akong anak ug pamilya.”
Mahinumduman nga dunay nahitabong sunod-sunod nga engkwentro tali sa grupong Guerilla Front Malayag ug tropa sa kasundalohan sa lungsod sa San Fernando ug Cabanglasan sugod sa bulan sa Mayo hangtod sa katapusang adlaw sa Hulyo ning tuig nga miresulta sa pagkamatay ug pagkasamdan sa mga NPA, ug pagbungkag sa hideout sa teroristang grupo, nakuha ang daghang mga armas, mga materyales pang giyera, ug mga dokumento sa nahisgotang grupo sa mga terorista.
Gidayeg ni Lt Col. Franklin Fabic, Commanding Officer sa 88IB, ang boluntaryong pagsurender sa mga miyembro sa Guerilla Front Malayag. Matud niya nga unta mosurender nasad ang mga miyembro ni alyas ‘Migs’ ug iyang mga kauban.
“Alang sa tanang nagpabilin isip hulga sa kalinaw sa katawhan, dili kami mohunong sa pag-gukod sa mga komunista’ng terorista. Padayon ang pag-gukod sa kagamhanan niadtong mga naghimo ug kagubot. Dili kami mohunong hangtud dili makab-ot ug maangkon ang kalinaw sa Southern Bukidnon,” mipahimangno si Lt Col. Fabic. (CMO, 88IB, 4ID, PA/PIA Bukidnon)
https://pia.gov.ph/news/articles/1050883
No comments:
Post a Comment
Note: Only a member of this blog may post a comment.