Friday, May 4, 2018

CPP/NPA-Zamboanga: Tubag sa Balik-baril program sa Rehimeng US-Duterte: Mas palig-unon ug pakusgon ang New Peple’s Army! Lunsaron ang kaylap ug sunson nga gerilyang pakiggubat!

NPA-Zamboanga propaganda statement posted to the Communist Party of the Philippines (CPP) Website (May 4): Tubag sa Balik-baril program sa Rehimeng US-Duterte: Mas palig-unon ug pakusgon ang New Peple’s Army! Lunsaron ang kaylap ug sunson nga gerilyang pakiggubat!

Ka Mario J. Jose, Spokesperson
NPA-Zamboanga Peninsula (Region IX)

4 May 2018

Tubag sa Balik-baril program sa Rehimeng US-Duterte: Mas palig-unon ug pakusgon ang New Peple’s Army! Lunsaron ang kaylap ug sunson nga gerilyang pakiggubat! Ang gipangusgang programang balik-baril sa rehimeng US-Duterte dili bag-o. Gikan pa sa pasistang rehimeng US-Marcos hangtod sa kasamtangang itoy nga rehimen, ang tanang istratehikong kontra-insurhensyang kampanyang gidesinyo sa US para sa AFP naglakip sa batakang mga sangkap sa combat, intelligence ug civil-military o psywar operations. Managlahi lang ang pangalan apan mao ra kini nga mga oplans: Oplan Katatagan, Oplan Mamamayan (Marcos), Oplan Lambat Bitag (Cory Aquino ug Ramos), Oplan Makabayan (Estrada), Oplan Bantay Laya (Arroyo), Oplan Bayanihan (Benigno Aquino), ug Oplan Kapayapaan (Duterte). Kaparte sa civil-military o psywar operations sa AFP ang balik-baril program. Gigamit kini nga taktika aron ipagawas sa publiko nga nagkaubos na ang moral sa pagpakig-away sa NPA, nagkagamay na ang combat-strength niini ug wala gyuy posibilidad sa rebolusyonaryong kadaugan. Kaluha sa balik-baril program ang paglunsad sa peke nga pasundayag sa mga surrenderees. Sa miagi, may mga baryo sa Baganian Peninsula nga lima-unom ka beses na gipasurender didto sa lungsod isip mga masa sa NPA. Kay panganti ni Duterte nga “ totodasin ko talaga ang NPA” taman 2018, gipangunahan niya ang magasto nga paghakot sa mga peke nga surrenderees didto sa Malacanang. Naglakip sa panon ang karaang mitahan nang mga NPA, mga elementong CAFGU nga kunsabo sa pagpamatay sa mga lider-lumad sa Surigao, ug ordinaryong mga sibilyan. Gipakatap sa peke nga mga tigpamotbot sa Malacanang ug AFP nga 4,000 na ka NPA ang misurender samtang, sa sayo pang upisyal nga pamahayag nila, gipagawas nga 4,500 na lang ang NPA nga nagtikaw-tikaw sa kabukiran. Subay sa panultihon ni Goebbel, hepeng ministro ni impormasyon ni Hitler sa WW 2, “Ang bakak, kun makadaghan balik-balikon, mahimong tinuod”. Ganting premyo sa pasismo sa estado, pagpaunay-unay lang sa mga kabus nga katawhan

Ang pagpaibog-ibog sa ganting premyo (bounty money) aron makadakop, makapatay o makakawat sa pusil sa NPA usa ka makahilo sa tibuok katilingbang Pilipino diin nag-ilaid sa kapobrehon ug kawad-on ang mayoriyang katawhan. Usa kini ka taktika sa reaksyonaryong nanagharing hut-ong nga gihulhogan gidasig sa imperyalismong US sa pagpaaway-away sa mga kabus batok kabus, kaliwatan batok kaliwatan hangtod mahanap ang ilang pana-aw kinsa ang tinuod nga mga higala ug tinuod nga kaaway sa rebolusyon. Si Duterte mimando sa iyang mga goons nga AFP ug PNP nga “Isulod ninyo sa balde nga may yelo (ice) ang matag ulo sa NPA ug makuha ninyo gikan kanako ang ganting P25,000 ngadto sa P100,000 matag ulo”. Ang tawo nga makasulti niana usa ka lahi nga klase sa hayop nga uhaw sa dugo, gahum ug bahandi nga walay giilang pagtahod sa bisan unsang balaod sa tawhanong mga katungod nga gidawat ug gipirmahan sa internasyonal nga komunidad sa kanasoran. Ang paghatag og premyo sa kaylap nga pagpamatay, gikan sa mga mga suspetsado sa pagpayuhot sa gidiling drugas matigulang man o bata ngadto na sa mga lider-aktibista ug mga human rights advocates, nagasukol nga katawhang Moro ug lumad, ug legal nga demokratikong kalihokan sa kasyudaran nagapakita lamang sa pagka-inutil ug kawalay-kakayahan sa rehimeng US-Duterte nga seryosong sulbaron ang mga gamut-hinungdan sa ekonomikanhon ug pulitikanhong krisis sa tibuok katilingban Pilipino. Ang ganting salapi alang sa kaylap nga pagpamatay, pagpanglutos ug pagpangyatak sa tawhanong katungod usa ka short-cut nga kasulbaran sa krisis sa katilingbang semikolonyal ug semipyudal. Sigurado isuka ug suklan kini halapad nga katawhang Pilipino. Ang katawhan nagsinggit sa hingpit nga katilingbanong kalingkawasan gikan sa pangdaugdaog ug pagpahimulos. Gisakyan lamang ni Duterte ang kapobrehon sa mayoriyang katawhan sa pagtraydor sa isigka-kabus aron patilawon sa ganti sa dugong inutang. Tinuod man, naay pipila ka mga pobreng isigka-ingon sa kabukiran nga nangandoy makasapi ug midangop sa kinabuhing anti-sosyal: pagpangawat, panulis, panglapa sa hayupan, pagsilbing binayrang mga tirador o hired killers, ug uban pa. Ang bounty money epektibo lamang alang sa mga mersenaryong reaksyonaryong kasundalohan, paramilitary ug pulisyaa , nga gangster nga nagademanda sa kabayaran sa matag lampos nga krimen ug ubang mga elementong lumpen nga nanginabuhi sa kontra-masa nga binuhatan..

Pagsurender sa pipila ka pusil sa NPA bunga sa pipila ka kahuyangang pangsulod

Tinuod man usab nga may pipila ka pusil sa NPA nga nawala sa miaging mga panahon tungod sa pipila ka pangsulod nga kasaypanan nga natul-id na ug padayong gipakigbisogan. Nag-una niini mao ang mga kasaypanan ug epekto sa adbenturismo-militar sa dekada ‘80s. Milanat kini og dugay apan naaresto na kini nga sakit sa dekada ‘90s hangtod sa kasamtangan. Niining milabayng walo ka tuig, kapin 100% ang pagtubo sa pusil ug personnel sa NPA sa Zamboanga Peninsula Region. Igo na kini makapakita nga anam-anam nga nagatubo ang rebolusyonaryong armadong kusog sa katawhan nga sukwahi sa pabalik-balik nga pasiatab sa AFP. Sa pikas bahin, adunay panagsang mga kaso sa pagsibat sa pusil bunga sa paglugak sa istriktong mga sukdanan sa pagdawat sa bag-ong mga rekrut. Sa miaging tulo ka tuig, ang pagsurender sa pipila ka pusil sa NPA binuhatan sa mga elemento nga sinugo ug gitahasan sa AFP nga mangawat og pusil bugti sa ganting salapi. Adunay natigbasan nga NPA sa kabukiran sa Midsalip nga binuhatan sa mga bandido ug panatiko nga direktang gigunitan sa AFP. Nahitabo ang maong mga katraydoran bunga usab sa pagkumpyansa ug pagluag sa lagda sa siguridad. Sa pikas bahin, mayoriya sa ginsakpan sa NPA mga maayong elemento. Pinakamaayong anak sila sa masang mamumuo ug mag-uuma. Bisan walay sweldo, sukwahi sa mersenaryong tradisyon sa AFP, boluntaryo sila nga nagpasakop ug boluntaryo usab nga mihangop sa disiplina sa hukbong bayan. Dakong mayoriya sa NPA kinsa miundang sa serbisyo, tungod sa lain-laing mga hinungdan, nagpabiling maayo hangtod nga sila mibiya sa rebolusyonaryong han-ay. Wala sila magdala og bisan unsang butang nga gitugyan sa NPA alang sa ilang pag-amping.

Giampingan ug gipaka-bililhon sa matag NPA ang iyang gunit nga armas sama sa kinabuhi

Gitisok sa pangpulitikang edukasyon sa NPA ang rebolusyonaryong kahulogan sa buka sa pusil. Gikan sa buka sa pusil mamugna ang tanan butang. Gikan sa buka sa pusil, matukod ang daghang baseng masa, malunsad ang reporma sa yuta ug mapadaghan pa ang pusil pinaagi sa pagpuo sa kaaway diha sa kinabuhi-ug-kamatayon nga pagpakigsangka. Mapalapad ang impluwensya sa rebolusyonaryong kalihokan nga nagakabig aron mapakusog ang nagkahiusang prente batok sa kaaway. Motumaw ang mga kadre ug pulang manggugubat. Mapalutaw ang mga rekursos ug panalapi. Matukod ang demokratikong gubyerno sa armadong katawhan. Mapahigayon ang gikinahanglang mga serbisyo-sosyal. Mapanalipdan ang mga mag-uuma gikan sa mga mangingilog og yuta, mapakgang ang mga dautang elemento ug mga lokal nga kaaway nila. Ang pusil gigunitan sa NPA aron iasdang ug mapanalipdan ang interes sa masa. Busa giampingan ug gipakabililhon sa matag pulang manggugubat ang iyang gunit nga pusil sama sa iyang kinabuhi. Gibuhisan sa dugo ang kasaysayan sa matag pusil sa NPA. Kolektibo, organisado ug planado ang paglunsad sa mga taktikal nga opensiba. Walay ni usa ka tawo ang mahimong moangkon nga iyahang pribadong panag-iya ang iyang gidala nga pusil. Ang pusil hinagiban sa PKP pinaagi sa NPA alang sa pagsilbi sa katawhan ug dili bisan kanus-a man gamiton sa pagdaot sa interes sa masa o pribadong panag-iyahon. Labaw na nga dili kini mahimong balonon o kawaton ni kinsa man nga mohukom sa pagbiya isip myembro sa hukbong bayan. Usa ka bug-at nga salaod sa mga lagda sa NPA ang boluntaryong pagsurender sa pusil ngadto sa kaaway. Usa kini ka kaso sa kalapasan sa disiplina-militar ug pagluib sa kawsa sa katawhan. Ang tanang kaso sa paglayas ug pagsurender sa pusil pagahukman sa kamandoang militar sa rehiyon ug isaka ngadto sa Komite sa Partido sa Rehiyon ang hukom alang sa pagrebyu ayha ipatuman. Amumahon, suportahan ang New People’s Army!

Ang NPA usa ka hukbong mag-uuma nga nagalunsad sa usa ka gubat-mag-uuma sa kasamtangang yugto sa rebolusyong Pilipino. Tahas niini nga bungkagon ug tapuson ang pyudalismo sa kabukiran nga giharian sa mga agalong yutaan ug, sa ingon, matapos usab ang katilingbanong base sa imperyalismong US dinhi sa Pilipinas. Apan tungod kay ang AFP hukbo man sa dagkong burgesyang komprador ug agalong yutaan, nagpasabot nga dili makab-ot ang hingpit nga kalingkawasan sa masang mag-uuma hangtod nga dili mabungkag pinaagi sa armadong pakigbisog ang reaksyonaryong kasundalohan ug ang tibuok makinaryas sa pasistang estado. Labaw na karon kaysa miagi nga gikinahanglan sa mayoriyang masang mag-uuma ang usa ka proletaryadong hukbo sa katawhan. Ang AFP ug PNP nagsilbing armadong goons sa TVI, nanguna sa paglarot ginamit ang pwersa ug kabangis batok sa gagmayng minero ug lumad sa Mount Balabag. Ang mga mag-uuma ug lumad sa plantasyong Consunji sa Cotabato ug Zamboanga del Norte, AFP ug PNP ang anaa sa unahan sa bangis nga pag-ilog sa mga yutang dugay nang gitikad sa mga mag-uuma. Ug kini nga kamatuoran makita sa kaliboang susamang kahimtang sa pagpangilog sa kayutaang mag-uuma bisan asa sa Pilipinas. Gikinahanglan nga mas palig-unon nato ang panaghiusa sa NPA ug katawhan ug atubangon ang rehimeng US-Duterte pinaagi sa demokratikong rebolusyon sa katawhan. Pakusgon nato ang NPA pinaagi sa pagsalmot isip mga pulang manggugubat, isip milisyang bayan ug grupo sa pagpanalipod sa kaugalingon. Salmotan nato ang legal nga demokratikong kalihukang masa sa kasyudaran ug ibandera ang singgit sa katawhan alang sa yuta, panarbaho ug katilingbanong kaayohan. Supakon nato ang tinguha sa rehimeng US-Duterte nga ibale-wala ang peace talks tali sa NDFP-GRP ug himolbolan na lang ang batakang problema sa katilingbang Pilipino isip simpleng problema sa terorismo nga kunohay binuhatan sa mga NPA. Sa matag yugto sa pagtikang sa gubat sa katawhan, atubangan sa gagmay ug dagko nga kadaugan, labaw na kun may mga kapakyasan, gikinahanglang palig-unon kanunay nga paggunit sa batakang rebolusyonaryong mga prinsipyo sa hukbong bayan. Ang NPA angay nga mogunit sa iyang identidad nga siya usa ka hukbo sa masang mamumuo ug mag-uuma nga absolutong gipamunoan sa proletaryong partido.
 

No comments:

Post a Comment

Note: Only a member of this blog may post a comment.