NPA-Zamboanga propaganda statement posted to the Communist Party of the Philippines (CPP) Website (May 2): On April 26 Encounter
Ka Mario J. Jose, Spokesperson
NPA-Zamboanga Peninsula (Region IX)
2 May 2018
Hugtanong gipanghimaraot ug lig-ong gikundena sa New Peoples Army Regional Operations Command ang kaylap ug padayong gilunsad nga combat military operations sa pasistang AFP/PNP ug mga paramilitar ilalom sa 1st Infantry “TABAK” Division, Phil. Army sa mga kabaryohan sa tibuok rehiyon sa Zamboanga Peninsula ilabina sa mga bukirong bahin niini.
Niadtong Abril 26, 2018 sa may alas 2:00-3:00 ang takna sa kahapunon, human sa kapin kun kulang usa ka oras nga panag-engkwentro tali sa mga pulang manggugubat sa New Peoples Army ug mga berdugong militar sa 1st Infantry TABAK Division sa Barangay Saad, Dumingag, Zamboanga del Sur, malampuson ug aktibong nadepensahan sa pulang hukbo ang iyang tibuok pwersa, walay kaswalti ug luwas kini nga nakapatigbabaw sa maong panghitabo.
Dugang pa, mahukmanon ug mapangahasong nailog sa pulang hukbo ang inisyatiba sa panagsangka. Taliwala sa opensibang atake sa kaaway, maisogon kitang nakigsangka kanila, hinungdan nga mas sila pa man ang dunay kaswalti (3-KIA ug ubay-ubay nga angol) ug nangahadlok, nanagan ug nangabulabog.
Kini nga impormasyon nakalap nato gikan mismo sa mga sibilyan sa mga palibot ug kanait nga lugar nga maoy nahimong saksi sa maong panghitabo ug sa ilang naani nga kaswalti, kadaot sa ilang pwersa ug demoralisasyon sa han-ay mismo sa mga berdugo ug pasistang kaaway.
Tungod sa ilang militarista, desperado ug paturagas nga pagpangatake ug tumang kasuko sa maong panghitabo, daghang mga sibilyan ang nahiagom sa ilang kabangis pinaagi sa pagpamomba sa mga populadong komunidad sa Dapiwak ug Sinunoc, kapin kun kulang mga ala-1 ang takna sa kaadlawon. Dugang pa ang nagkadaiyang dagway sa paglapas sa tawhanong katungod sama sa pagpanghasi, pagpanghadlok, pagpanghulga, pagdakop, pinugos nga pagbakwit ug pagpundo sa mga sentrong komunidad. Kini tataw nga kalapasan sa tawhanong katungod ug sa Internasyunal nga Makitawhanong Balaod.
Tumang kahadlok ug kahasi ang gibati ug kasamtangang nasinati sa mga inosenteng sibilyan resulta sa walay puas ug paturagas nga pagpamomba sa mga komunidad ug populadong lugar bisan pa sa kahimtang nga walay panghitabo o panag-engkwentro tali sa New Peoples Army ug AFP/PNP.
Sa pikas bahin, nikaylap ug nagkadaghan karon ang mga bakwit nga naggikan sa lain-laing lugar sa Sinacaban ug Jimenez, Misamis Occidental tungod sa grabeng pagpamomba sa kaaway. Mokabat sa 38 ka bomba ang gipanghulog sa kaaway dinhing mga dapita sa mga oras nga alas 9:00 sa gabii, ala-1 sa kadlawon ug alas-4 sa kadlawong niadtong petsa 27 sa Abril 2018.
Lain pang dagway sa militarisasyon ang nasinati karon sa mga probinsiya sa Zamboanga del Sur, Zamboanga del Norte ug Zamboanga Sibugay tungod sa padayong operasyong militar.
Sa laktud, adunay kaylap nga nagakahitabong larga-todong pagpangatake ug operasyong militar sa 1st Infantry TABAK Division, Phil Army ug PNP sa tibuok rehiyon sa Zamboanga Peninsula.
No comments:
Post a Comment
Note: Only a member of this blog may post a comment.