CPP/NDF-SM: Nagpabiling sulod sa rebolusyon ang luna sa kababayen-an

NDF-Southern Mindanao propaganda statement posted to the Communist Party of the Philippines Website (Mar 8): Nagpabiling sulod sa rebolusyon ang luna sa kababayen-an

Rubi del Mundo, Spokesperson
NDFP Southern Mindanao

8 March 2018

Ginasaulog sa National Democratic Front of the Philippines sa Southern Mindanao ug tanang rebolusyonaryong pwersa sa rehiyon ang Kalibutanhong Adlaw sa Kababayen-an duyog sa mga kababayen-an sa tanang hut-ong ug sektor sa tibuok nasud ug kalibutan. Hingpit natong ginapasidunggan ang tanang babayeng rebolusyonaryo kinsa nag-alagad sa interes sa katawhang Pilipino pinaagi sa pagpukaw, pag-organisa ug pagpalihok sa ubang kababayen-an sa linya sa nasudnon-demokratikong rebolusyon. Labaw kitang ginapadasig sa mga halangdong kababayen-an
nga namartir sulod sa atong pakigbisog batuk sa imperyalismo, pyudalismo ug burukrata kapitalismo.

Taas na ang giabot sa pakigbisog sa kababayen-an alang sa kalingkawasan sukad sa makasaysayanong mobilisasyon sa Petrograd niadtong 1917 asa pid-an ka libo nga mga babaye ang nagmartsa sa kadalanan, ilalom sa panawagang “Bread and Peace” batuk sa gubat ug kampanya sa pagpanumpo sa Russian Tsar. Wala pa abti og duha ka tuig sa gahum, ginabira-pabalik na ni GRP. Pres. Rodrigo Duterte ang sobra usa ka siglo nga katilingbanong paglambo sa iyang mga atrasadong
panglantaw sa kababayen-an ug sa ilang pakigbisog alang sa kalingkawasan. Gikan sa iyang macho nga mga biay-biay ug bahad hangtud sa iyang mga panggubyerno ug katilingbanong palisiya, gipamatud-an ni Duterte nga siya ang nag-unang kaaway dili lang sa kababayen-an apan sa tibuok katawhang Pilipino.

Sa kasamtangan, mibarog ang kababayen-ang Pilipino diha sa mga militanteng aksyon batuk sa despotikong rehimeng US-Duterte ug mga gyera niini nga mibiktima sa katawhang Pilipino. Sa Southern Mindanao, liboan ka kababayen-an ang nahimong mahinungdanong lumilihok alang sa armadong pakigbisog, agraryong rebolusyon ug pagtukod sa base. Mas mahinungdanon, taliwala sa mga pagpangyubit ug hulga ni Duterte, daghan pang kababayen-an ang misampa sa New People’s Army sa rehiyon. Kadaghanan kanila naglihok isip mga medikal samtang ang uban nahimong mga Pulang kumander o instruktor sa pulitika sa mga yunit sa NPA. Labaw pang makadasig ang ilang markadong pagsalmot sa pagtukod sa mga organo sa pulitikanhong gahum diin daghan kanila nahimong nangulo sa mga rebolusyonaryong konseho sa ang-ang baryo ug munisipyo. Aduna usab mga babayeng kadre sa han-ay sa tanang nangulong yunit sa Partido sa
rehiyon.

Atubangan sa dili malilong nga pagpakaitoy sa rehimeng US-Duterte sa interes sa imperyalista ug oligarkiya, liboan pang kababayen-an ang nagasalmot sa mga kalihukang masa batuk sa pyudal nga pagpahimulos, imperyalistang minahan ug mga plantasyon sulod sa mga gerilyang base. Sa mga syudad ug lungsod, ang kababayen-an ang naglangkob sa sobra katunga sa mga pwersa kinsa militanteng nagkundena ug nagbabag sa pagdumili ni Duterte nga tapuson ang kontraktwalisasyon sa mga mamumuo, sa pagbaligya sa iyang rehimen sa atong ekonomikanhong soberanya, ang iyang kontra-kabus nga balaod nga TRAIN ug uban pang mga isyu.

Ilalom sa sistemang malakolonyal ug malapyudal nga hugtanong ginakonsolida sa rehimeng US-Duterte pinaagi sa diktadurya ug pasismo, gikinabuhi sa kababayen-ang Pilipino ang saktong luna sa ilang pakigbisog alang sa kalingkawasan. Sulod sa rebolusyonaryong kalihukan, sa paggiya sa Partido Komunista ng Pilipinas, nasabtan sa kababayen-an nga aron malingkawas ang ilang kaugalingon, kinahanglan nilang ilambigit ang ilang pakigbisog sa nasudnon-demokratikong
rebolusyon.

Mabuhay ang tanang naghago ug rebolusyonaryong kababayen-an!
Mabuhay ang nasudnon-demokratikong rebolusyon!

https://www.philippinerevolution.info/statements/20180308-nagpabiling-sulod-sa-rebolusyon-ang-luna-sa-kababayen-an