CPP/NDF-Central Negros: Kabutigan sang 62nd IBPA Ginakondenar sang NPA

NDF-Central Negros propaganda statement posted to the Communist Party of the Philippines Website (Mar 8): Kabutigan sang 62nd IBPA Ginakondenar sang NPA

JB Regalado, Spokesperson
NPA-Central Negros (Leonardo Panaligan Command)

7 March 2018
Press Release

Makahuluya ang kaugalingon nga pagdayaw sang AFP sa mga kabutigan nga ginhimo sang 62nd IBPA kaangot sa illegal nga pag-aresto sa 6 tanan ka mga pamatan-on sa Mabinay, Negros Oriental. Nagabura gid ang baba ni Col. Eliezer Losañez sang 303rd BdePA sang tikal kag pila pa ka mga manugtaghol sang AFP ang kuno pagkadakop, pagsurender kag pagkakuha sang 6 tanan ka mga matag-as nga kalibre sang armas gikan sa 6 kuno ka mga NPA. Dugang pa sa ila ginakupal nga sadtong Marso 3, 2018 mga 2:30 sang kaagahon, may natabo kuno nga engkwentro, halos 45 minutos nga linukpanay sa tunga sang tropa sang NPA kag 62nd IBPA antis pa ang pagsurender kag pagkadakop sa 6 ka biktima diin may 2 pa ka mga NPA nga mga minor de edad (17 anyos).

Sandig sa pagpangusisa sang NPA sa lugar, saksi ang mga pumuluyo sa lugar nga wala sang may natabo nga engkwentro. Indi man matuod nga mga NPA ang 6 ka mga pamatan-on lakip na ang isa ka UP-Cebu Masscom Graduate nga babaye nga si a certain “Miles” nga ila ginpresentar sa media kag sa publiko. Kundi ang mga ini, mga pamatan-on nga nagapangusisa sa mga mangunguma sa lugar agud madalom nga hibaluon ang mga problema kag matuod nga kahimtangan sang mga pumuluyo sa nasambit nga lugar. Dalayawon ang mga lamharon nga mga pamatan-on nga may kasubong sini nga mga paminsaron kag pursigido sa pagtuon agud sa paghibalo sang matuod nga sitwasyon sang mga mangunguma kag mga pumuluyo sa kaumahan, kumparar sa mga gong-an kag tradisyunal nga mga politico kag iban pa nga ara sa burukrasya sang reaksyunaryong gobyerno nga mga bulag kag bungol sa mga reklamo kag mga pag-antus sang mga mangunguma sa kawad-on sang duta, palangabuhian kag pagkaon bunga sang korapsyon kag kulang sang serbisyo sosyal.

Ang NPA istrikto nga nagapatuman sang mga patakaran angot sa rekrutment sang tropa. Pwede lang magpatapo sa NPA ang bisan sin-o man nga may himsog nga panglawason kag may ikasarang sa pagpakig-away, istrikto sa edad nga 18 anyos pasaka, husto nga paminsaron, may maayo nga political record sa ila lugar kag kolektibo nga ginarekomendar sang teritoryo. Subong man bukas kag tampad nga magbaton kag magsunod sang mga pagsulundan, linya kag programa sang Demokratiko nga Rebolusyon sang Banwa paagi sa pangmalawigon nga inaway banwa.

Handa man magbaton sang Sentral nga katungdanan sang NPA, hugot nga mag-uyat kag magsunod sa 3 ka disiplina kag 8 ka punto kag iban pa nga mga sandigan nga prinsipyo bilang Bag-ong Hangaway sang Banwa dira sa lubos nga pag-alagad sa masa kag rebolusyon.

Gani wala gid sa bokabularyo sang NPA ang magbaton sang tropa naga-edad sang 17 anyos kag istrikto man ini nga magpa-armas lamang sa mga elemento matapos ang pulitiko-militar nga mga pagtuon kag paghanas.

Wala man sang kamatuoran nga ang 6 ka mga armas kag mga gin-alegar nga eksplosibo ara mismo nakuha sa poder sining mga pamatan-on kundi gintanom ini sang militar kag pilit nga ginpaako sa ila.

Paglapak sang tawhanon nga kinamatarung sang 6 ka mga pamatan-on bilang mga suspek ang ginhimo sang AFP ang pag-intoregar sa ila nga wala ang ila mga abogado. Malisyuso man ang akto sang AFP sa pagpresentar sining mga kabataan sa media nga wala man ang mga ini ginpahambal sang ila mga opinyon kag komento.

Mabaskog nga ginakondenar sang LPC-BHB ang illegal nga pag-aresto kag pagpasibangud nga mga katapo sang NPA sa 6 tanan ka mga pamatan-on sang 62nd IBPA sa banwa sang Mabinay, Negros Oriental. Lubos man ginakondenar sang NPA ang padayon nga serye sang pagpamatay sa mga inosenteng sibilyan sa Guihulngan ilabe na ang pagtiro-patay kay Toto De Asis sang mga ginapatihan nga mga katapo sang state security forces sadtong nagligad lang nga bulan sang Pebrero 2018.

Ginamanduan man ang mga yunit sang Bag-ong Hangaway sang Banwa idalum sa LPC nga arestohon ang mga perpetrators nga katapo sang pasista kag berdugong 62nd IBPA, PNP kag mga ahente sini. Arestuhon man ang ginahuptan nga kriminal sang AFP nga sila Leonel Librado kag Pedro Rafols. Ipa-atubang kag bistahon sa Rebolusyonaryong Korte sang Pumuluyo kag ipatuman ang nagakaigo nga silot sa ila sandig sa pamatbat sang korte angot sa kabug-aton sang kaso nga ila nakomiter.
https://www.philippinerevolution.info/statements/20180307-kabutigan-sang-62nd-ibpa-ginakondenar-sang-npa