CPP/NDF-EV: NDF-EV ginsuportahan an rali para ha kamurayawan ngan hustisya han 5,000 katawo ha Catbalogan, Samar

NDF-Eastern Visayas propaganda statement posted to the Communist Party of the Philippines Website (Apr 5): NDF-EV ginsuportahan an rali para ha kamurayawan ngan hustisya han 5,000 katawo ha Catbalogan, Samar (NDF-EV supports a rally for peace and justice by 5,000 people in Catbalogan, Samar)

Fr. Santiago “Ka Sanny” Salas, Spokesperson
NDFP Eastern Visayas (Region VIII)

5 April 2017

Nagpahayag yana han pagsuporta an National Democratic Front-Eastern Visayas (NDF-EV) ha Abril 4 nga multisektoral nga rali para ha kamurayawan ngan hustisya han maabot 5,000 katawo ha Catbalogan City, Samar samtang nagpadayon an erestorya pankamurayawan giutan han Gubyerno han Republika han Pilipinas ngan National Democratic Front of the Philippines ha The Netherlands.

“Hul-os kita nga nasuporta ha magkalain-lain nga sektor ha prubinsya han Samar nga nagpahayag han ira mga araba hadin Abril 4 ha usa nga internasyunal nga kumperensya nga gintambungan han panrehiyon nga liga han mga meyor ngan kadungan han pagpadayon han erestorya pankamurayawan han GRP-NDFP,” sering han tagapagyakan han NDF-EV nga hi Fr. Santiago “Ka Sanny” Salas.

“Ini nga mga tag-undong han kamurayawan nga nagtikang ha dirudilain nga bungto ngan syudad — Basey, Calbiga, Pinabacdao, Catbalogan, Calbayog ngan iba pa — mga nakatalwas ha kalamidad ngan mga biktima han panalapas ha tawhanon nga katungod, lakip na adton ha gerra han gerra kontra-druga han gubyerno Duterte. Nag-aalsa hira tungod han ira pagkukuri ngan nagdedemanda han mga batakan nga pankatilingban, pan-ekonomiya ngan pampulitika nga reporma kan GRP President Rodrigo Duterte.”

Ginsering ni Fr. Salas nga an mga nagrali para ha kamurayawan nagtikang ha dirudilain nga sektor kundi nagkaurusa ha mga isyu han kamurayawan ngan hustisya. “Hira ini nga mga nakatalwas ha kalamidad nga Typhoon Ruby nga ha pamumuno han People Surge ginkasuhan han kurapsyon hi Catbalogan City Mayor Stephanie Tan, nga nangutang hin dako para ha relief and rehab, pero nag-aantos la gihapon an mga tawo ha temporaryo nga urukyan. Hira ini nga mga biktima han 87th IB ha Basey, Calbiga, Pinabacdao ngan iba pa nga dapit. Samtang, hira liwat ini nga mga biktima han mabangis nga pulitikal nga panmatay han mga goons han mga meyor ha San Jorge ngan Calbayog City, sugadman mga biktima han waray-kaluoy nga gerra kontra-druga han gubyerno Duterte.”

Gindugang han tagapagyakan han NDF-EV nga an dirudilain nga demanda han katawhan nagduduon han kadagmitan nga panginahanglan para ha mga kasarabutan ha sosyo-ekonomiko nga reporma sugadman han pampulitika ngan konstitusyunal nga reporma nga tatrabahuon han NDFP ngan GRP ha erestorya pankamurayawan. “Nanawagan an katawhan han Samar kan GRP President Duterte nga an iya ginyayakan himuon nga aksyon ngadto ha pagbubug-os ngan pagpatuman han mga makakabulig nga kasarabutan giutan han GRP ngan NDFP yana nga tuig. Gindedemanda nira an tinuod nga rekonstruksyon para ha mga nakatalwas ha kalamidad ha pagpaseguro han disente nga pabalay, pankatilingban nga serbisyo, reporma ha tuna ngan nasyunal nga industriyalisasyon. Gindedemanda nira an pagpatuman han CARHRIHL ngan an pagsirot ha mga natalapas ha tawhanon nga katungod. Gindedemanda nira an pagbungkag han mga pribado nga hukbo ngan pagtangpos han mga pampulitika nga dinastiya ngan warlordismo.”

Gin-aghat ni Fr. Salas an katawhan han Eastern Visayas nga iduso an ira mga demanda para ha makatadungan ngan panmaihaan nga kamurayawan pinaagi ha nasulong nga demokratiko nga kagiusan masa. “Ha tulo kadekada nga pag-obserbar han negosasyon pankamurayawan giutan han GRP ngan NDFP, klaro ha katawhan nga diri la simple nga ihahalad ha ira an kamurayawan. An karukayaknon han kamurayawan aada ha kamot han katawhan tungod kay kinahanglan nira ini ipakigbisugan ha pagdemanda han nasyunal nga soberaniya, reporma ha tuna, nasyunal nga industriyalisasyon, batakan nga mga pankatilingban nga serbisyo ngan iba pa nga batakan nga pagbabag-o.”

https://www.philippinerevolution.info/statements/20170405-ndf-ev-ginsuportahan-an-rali-para-ha-kamurayawan-ngan-hustisya-han-5000-katawo-ha-catbaloga