CPP/NPA-EV: Dudrungan nga opensiba han NPA ginsirutan an abusado, maki-gerrahon nga AFP

NPA-EV propaganda statement posted to the Communist Party of the Philippines Website (Apr 5): Dudrungan nga opensiba han NPA ginsirutan an abusado, maki-gerrahon nga AFP



NPA-Eastern Visayas (Region VIII) (Efren Martires Command)

5 April 2017

Gindayaw yana han Efren Martires Command ha Eastern Visayas an mga Pula nga mangaraway han Bagong Hukbong Bayan ha malinampuson nga paglansar han upat nga taktikal nga opensiba ha rehiyon hadin Marso 30. “Ginpapasidunggan naton an mga Pula nga mangaraway para ha ira magdinaugon nga opensiba ha Silvino Lobos, Northern Samar; Paranas ngan Motiong ha Samar; ngan ha Burauen, Leyte,” sering han panrehiyon nga kumand ha operasyon han BHB. “Ginkukumpirma naton nga kahuman han balyuay han buto, nakontrol han mga Pula nga mangaraway han Efren Martires Command an CAA nga paramilitar nga kampo ha Barangay Geparayan, Silvino Lobos, ngan nakumpiska an usa nga M60 nga masinggan, usa nga R4 nga riple, lima nga M1 Garand nga riple, upat nga karbin ngan usa nga handheld radio.

“Waray kahibaruan an BHB kabahin han anuman nga sibilyan nga kaswalti tungod kay ginpatuman an opensiba nga mayda kaangayan nga pagtagad ha kalibrihan han mga sibilyan. Ha proseso han pag-atras, malinampuson liwat nga nagdepensa an BHB ha kontra-atake han kaaway ngan umatras nga kumpleto an pwersa. Kundi, ginkukundenar han BHB an nalanat nga pasista nga militar tungod han ginpirit nga ebakwasyon han masa nga parag-uma ha karaknit nga bungto han Lope de Vega.”

“Ha pareho nga adlaw, madinaugon nga ginharas han mga Pula nga mangaraway han Northeastern-Central Samar Subregional Command han BHB an duha nga kampo han 52nd Infantry Battalion CAA ha Motiong, kun diin nasamaran an usa nga sundalo, ngan ha Barangay Pequit, Paranas. Ini nga mga sundalo ngan paramilitar mayda na hilaba nga mga rekord han pangabuso ha mga sibilyan ngan pagdabi ha iligal nga druga ngan panikas hiton nga erya.”

Ginsukna liwat han Efren Martires Command an AFP ha pamomostura nga para ha kamurayawan samtang naglalansar han magbangis nga operasyon militar nga natalapas ha tawhanon nga katungod ngan naprotehir ha pagmimina, panlulupot han tuna ngan panhibang ha kalibungan han mga imperyalista ngan oligarkiya nga kumprador-agaron maytuna. “Ginsisirutan hini nga mga taktikal nga opensiba an AFP tungod han nagpapadayon hini nga kawaray baratunon para han mga panalapas ha tawhanon nga katungod ngan pananabotahe ha erestorya pankamurayawan giutan han GRP ngan NDFP.

“Gin-iinsulto han AFP an erestorya pankamurayawan pinaagi han bag-o hini nga kontra-insurhensiya nga programa, Oplan Kapayapaan, nga usa la nga pag-uutro ha iba nga ngaran han kombat, paniktik ngan saywar nga mga atake kontra ha rebolusyunaryo nga pakig-away han katawhan. Samtang nagpapadayon an erestorya pankamurayawan, pirmi andam an BHB nga depensahan an katawhan kontra ha AFP ngan iba pa nga nanriringgal kontra ha kamurayawan ha ira pagdiri ha mga batakan nga reporma ngan mas pagkaruyag nga pagrabihon pa an pananalumpigos ngan paniniyupi ha katawhan Pilipino.”

https://www.philippinerevolution.info/statements/20170405-dudrungan-nga-opensiba-han-npa-ginsirutan-an-abusado-maki-gerrahon-nga-afp