Mabaskog nga ginakondenar sang Napoleon Tumagtang Command, New People’s Army – Southern Panay ang mapanglanse, tinuso kag pamintaha nga mga lihok sang AFP kapin sang 82nd IB Phil. Army sa pihak sang deklarasyon sang Gubyerno Republika sang Pilipinas (GRP) nga indefinite unilateral cease fire. Ini kuno sa katuyuan nga mahatag ang paborable nga kondisyon sa estoryahanay pangkalinungan nga ginapatigayon sa tunga sang GRP kag sang National Democratic Front-Philippines.

Nagaka-dismaya gid ang malapad nga masa sang pumuluyo nga nagahandum sang matuod nga katawhay kag kalinong sa athag nga pagpamintaha sang militar sa tampad nga pagpatuman sang NPA nga indefinite unilateral cease fire man nga gindeklarar sang CPP-NDF. Baliskad sa ginalauman nga maga-untat na ang mga operasyon militar sa kaumhan, ang tropa sang 82nd IB wala na gani sang kahangawa kag hilway nga nagatiyog sa teritoryo sang NPA sa ‘payong’ sang mga aktibidad may kaangtanan kuno sa peace and development /civic military operations. Sa kumuplahe sang medical mission, fun-run kag iban pa nga aktibidad padayon sila nga nagapaniktik sa hulag sang NPA kag iban nga rebolusyonaryo kag progresibo nga organisasyon. Sa tabon sang kampanya Tokhang kag kuno pagpamuslo sa pagbaton sang pumuluyo sa gubyernong Duterte gina-harass nila ang mga lider mangunguma para manyutralisa, mapabaliskad kag mangin impormer sa maksimum. Tubtub sini nga inadlaw nagapabilin pa sila sa mga binaryo sang Buloc, Victoria, Mayang kag San Jose- Bundoc sang Tubungan, Iloilo; Cabladan, Sibalom, kag Osorio II, San Remegio, Antique.

Ang tanan nga mga unit sa idalom sang Napoleon Tumagtang Command hugot kag tampad nga nagsunod kag nagasunod sa direktiba sang Partido Komunista sang Pilipinas kag sang mataas nga kumand nga mag-untat sa paglunsar sang opensibang aksyon batuk sa AFP kag mga para-militar nga unit. Ini bilang pagsakdag sa nagapadayon nga peace talk ukon estoryahanay pangkalinungan sa tunga sang National Democratic Front- Philippines (NDFP) kag sang Gubyerno sang Republika sang Pilipinas (GRP). Naga-upod gid kami sa handum sang bug-os nga pumuluyo nga mapaluntad ang katawhay kag kalinong. Katawhay kag kalinong nga nabase sa hustisya kag indi bangud nagapos ang kamot, natapnan ang mata kag nabusalan ang baba sa pagpabutyag sang matuod nga kahimtangan kag problema.

Nagapanawagan man kami sa tanan nga peace loving nga pumuluyo sa maghatag sang mabaskog nga suporta sa Peace Talk. Makigbahin sa nagkalain-lain nga porma sang paghulag nga mapauntat ang anuman nga aktibidad militar kag mapabalik sa ila kampo. Magreport sa mga natungdan nga opisyal kag ahensya sang gubyenong Duterte ang mga paglapas sang AFP sa ila gindeklarar nga Unilateral Cease Fire.

https://www.cpp.ph/afp-tuso-bentahuso-kag-indi-sinsero-sa-cease-fire/