NDFP National Democratic Front of the Philippines
Pamahayag sa Media
Desyembre 26, 2015
Atol ning ika-47 nga kasumaran sa pagkatukod pag-usab sa Partido Komunista ng Pilipinas (PKP) niadtong Desembre 26, 1968, ang NDF-Mindanao uban sa katawhan nagpadangat sa among pahalipay ug pagsaludo sa Partido sa tukmang pagpangulo niini nga nagseguro sa mga rebolusyonaryong kadaugan ug padayong pag-asdang sa demokratikong rebolusyon sa katawhan sa atong nasud. Tukmang higayon usab kini nga saludohan ang tanang martir sa rebolusyon nga mihalad sa ilang kinabuhi diha sa pag-alagad sa katawhan ug sa rebolusyong Pilipino.
Ang lig-ong pagpangulo sa Partido sukad sa pagkatukod niini nagseguro nga molahutay ug padayong moasdang ang rebolusyon atubangan sa grabeng ataki sa nangaging mga reaksyonaryong rehimen, apil na ang kasamtangang rehimeng US-Aquino III. Partikular sa Mindanao, pinaagi sa tukmang pagpangulo sa Partido, nakabarug ug dugang mikusog pa ang rebolusyon sa isla bisan pa kun kini ang nag-unang pokus sa halos walay hunong nga bangis nga ataki sa Oplan Bayanihan (OPB) sa rehimeng US-Aquino III aron depensahan ang mga pang-ekonomiyang interes sa mga imperyalista ug lokal nga nagharing hut-ong ug pildihon ang rebolusyonaryong kalihokan.
Apan pakyas ang OPB sa rehimen, maong gidugangan sa rehimen ang tropa sa AFP sa Mindanao nga karon mokabat na sa 60 ka batalyon o kapin 60% sa kinatibuk-ang tropa sa AFP, 60% niini nadeploy sa mga erya sa NPA. Wala pay apil ang mga PNP, CAFGU ug ubang para-militar sama sa BULIF, Alamara, Gantangan, Bagani, Magahat, pundok ni Calpet ug uban pa. Gilunsad niini ang labing bangis ug hugaw nga mga teroristang taktika ug pamaagi aron lang gyud malisang ang katawhan ug moundang sa armado ug dili-armadong pagsukol.
Sulod lang sa termino sa rehimeng US-Aquino III mokabat na sa 377 ang biktima sa masaker ug extra-judicial killings nga mga lider, aktibista ug inosenteng sibilyan sa tibuok nasud, katunga niini nahitabo sa Mindanao. Pipila niini mao ang masaker sa Han-ayan, Lianga, Surigao del Sur ug Pangantucan, Bukidnon ug pagpatay kang Fr. Fausto “Pops” Tentorio sa North Cotabato. Ang mga tropa sa AFP uban sa mga para-militar misunog usab sa mga komunidad ug eskwelahan, mipahamtang sa nagkalain-laing paagi sa terorismo aron lang gyud mapaundang ang pag-asdang sa pakigbisog sa katawhan. Kining terorismo nakapugos sa pagbakwit sa gatusan ka libo sa katawhan sa Mindanao.
Apan ubos sa pagpangulo sa Partido lig-ong nakabarug ang rebolusyonaryong pwersa sa Mindanao ug mas mikusog pa kini ilalom sa rehimeng US-Aquino III.
1. Dugang napalig-on ang MLM nga pang-ideolohiyang pundasyon sa Partido pinaagi sa paglunsad sa tulo ka ang-ang nga kurso sa pang-ideolohiyang pagtuon, nga mao ang Batakan, Intermedya ug Abanteng kurso, ug pagkumbina sa teorya ug praktika diha sa rebolusyonaryong kasinatian sa lima ka rehiyon sa Mindanao. Dugang midaku ngadto sa kapid-an ka libo ang ginsakpan sa Partido sa tibuok Mindanao nga kadaghanan nakagamot ug nangulo sa pakigbisog sa katawhan diha sa mga kabaryohan, komunidad, pabrika, eskwelahan ug mga pangmasang organisasyon, ug sa kinatibuk-an, milig-on ang mga komite sa rehiyon hangtud sa mga lokal nga Sanga sa Partido ug mga yunit sa BHB.
2. Bisan pa sa kahimtang nga kini ang sentrong pokus sa OPB, padayong miabante ang armadong pakigbisog sa Mindanao. Gikan sa 40 ka natarang gerilya sa unang tuig sa rehimen US-Aquino III midaghan kini karon ngadto sa 46 nga nakatag sa 5 ka rehiyon sa Mindanao, ug walay bisan usa nga nabungkag sa bangis nga ataki sa OPB. Sa kapin 200 ka kalungsuran ug syudad nga nalihokan, gikan sa 1,850 lang ka baryo niadtong 2010, miusbaw ngadto sa 2,500 ka baryo ang nalangkob sa atong mga natarang gerilya kun diin ikatulong bahin niini ang nakonsolida samtang ubay-ubay ang natukoran sa Organo sa Pulitikanhong Gahum o gobyerno sa katawhan sa ang-ang baryo, ang uban sa ang-ang lungsod. Padayong nagkalapad ang minilyon nga baseng masa sa BHB kun diin mitubo ngadto sa kapin 200,000 gikan sa 130,000 niadtong 2010 direktang napasulod sa mga pangmasang organisasyon sa tibuok Mindanao. Dakung bentaha kining dugang nagkalapad ug nagkalalom nga base sa pagmaniubra sa mga yunit sa BHB, paglunsad sa mga taktikal nga opensiba (T.O.), pagrekrut sa mga Pulang manggugubat, pagpatuman sa kaylap nga agraryong rebolusyon ug paglunsad sa ubang pangmasang pakigbisog.
Midaghan ang ginsakpan sa BHB ug midaghan ang mga pormasyong iskwad, platun ug kumpanya ug mga yunit sa Milisyang Bayan. Padayong nag-usbaw ang mga taktikal nga opensiba sa tibuok Mindanao gikan sa 250 ka TO sa pagsugod sa rehimeng US-Aquino III niadtong 2010, ngadto sa 350 niadtong 2011, 400 niadtong 2012, kapin 400 matag tuig niadtong 2013 ug 2014, ug kapin 500 ning tuig sa 2015.
Pipila sa mga malamposong dagko nga aksyong militar mao ang pagreyd sa private army ni Brillantes sa Compostela Valley, reyd sa mga PNP HQ sa lungsod sa Tigbao, Zamboanga del Sur, Don Victoriano, Mis Occidental, ug Alegria, Surigao del Norte, ug reyd sa Earth Savers Security sa Butuan City, reyd sa COPD sa Gingoog City, Tandag City ug San Fernando, Bukidnon, reyd sa Army-CAFGU detatsment sa Binicalan, San Luis, Agusan del Sur, sa Balingasag, Misamis Oriental ug sa Banay-banay , Davao Oriental, pagsilot sa tulo ka higanteng mina sa Taganito, Claver, Surigao del Norte ug pagsilot sa plantasyon sa Del Monte Phils. sa Bukidnon, reyd sa Del Monte sa Quezon, Bukidnon, ambus sa Matan-ao, Davao del Sur, ug uban pa. Karong tuig 2015 lang nakasakmit ang BHB sa ubay-ubay nga tag-as nga kalibre nga armas gikan sa mga armadong pwersa sa estado. Sa pagdaghan sa mga yunit gerilya sa BHB, mas halapad ang nalangkob ug nakonsolida nga mga lugar, ug napanalipdan ang interes sa katawhan ug mga kadaugan sa rebolusyon sama sa repormang agraryo.
3. Sa tuig 2015, sa Mindanao lang, mokapin sa usa ka batalyon, kung iponon, ang namatay sa kaaway sa mga panagsangka tali sa NPA ug mga armadong pwersa sa estado, wala pay labot ang mga samdon, samtang sa bahin sa NPA dunay pipila lang. Sa tibuok termino sa rehimeng US-Aquino III, 61 ang nahimong mga bihag sa gubat o prisoners of war (POW) sa Mindanao gikan sa mga armadong pwersa sa estado. Gitratar sila subay sa nalatid sa CARHRIHL ug mga protocol sa Geneva Convention, nga nagpakita sa pulitikanhon ug militar nga katakus sa rebolusyonaryong pwersa. Halos tanan niini gibuhian subay sa mga rekisitos nga nalatid sa giya sa NDFP ug ubang konsiderasyon, apil ang pagpamatuod sa interes, kaandam ug kamatinud-anon sa rebolusyonaryong pwersa sa pagpadayon sa negosasyong pangkalinaw. Sa pikas bahin walay interes ang rehimen, gani sa makadaghang higayon nagdumili pa kini sa pagkoopera alang sa luwas ug hapsay nga pagbuhi sa mga POW.
4. Luyo sa kawalay matinud-anong reporma sa yuta ubos sa rehimeng US-Aquino III, ang rebolusyonaryong kalihokan sa nasud nagapatuman sa minimum ug maximum nga reporma sa yuta. Sa Mindanao, nagkalapad ang nalunsaran ug gatusan ka libo ang nakabenipisyo sa repormang agraryo o agraryong rebolusyon (agreb) sama sa pagpakunhod sa abangan sa yuta ug himan sa produksyon, pagpakunhod sa usura, pagpataas sa suholan sa mga mamumuong panguma, pagpataas sa presyo sa produktong agrikultural sa mga mag-uuma, ug paglunsad sa mga kampanya sama sa pagpataas sa produksyon, kooperatibisasyon, serbisyong panglawas, kultural, ug uban pa. Kining agreb nakoordina ug nakatabang sa dugang pagpalapad ug pagpalig-on sa atong base ug miani sa halapad nga suporta sa katawhan alang sa armadong pakigbisog.
5. Ang antipyudal nga pakigbisog hugot natong nalambigit sa anti-pasista ug anti-imperyalistang pakigbisog ug mibunga kini sa halapad nga panaghiusa ug suporta sa nagkalain-laing sektor sa Mindanao. Ang kalihokang masa sa agreb hugot nga nalambigit diha sa kalihokang masa batok sa pangawkaw sa atong mga kinaiyanhong bahandi sa mga multi-nasyonal nga mga kumpanya sa mga mina, plantasyon, ug ilang grabeng pagguba sa kinaiyahan. Gibutyag ug gibatokan usab sa kalihokang masa ang monopolyo sa yuta sa imperyalista ug mga lokal nga nagharing hut-ong nga mihikaw sa yuta alang sa repormang agraryo ug yutang kabilin sa mga Lumad.
Sulod sa rehimeng US-Aquino III miulbo ang mga susamang kalihokang masa batok sa mga higanteng minahan sa Caraga, sa A. Brown sa Pantucan, ComVal Province, sa Xstrata sa SOCSARGENDS, sa TVI sa Zambaonga del Sur, ug uban pa. Nalunsad usab ang kalihokang masa sa nagkalain-laing bahin sa Mindanao batok sa mga multi-nasyonal nga mga plantasyon sa saging ug pinya, sama sa DolePhil, Sumifru ug Del Monte Phil, ug batok sa mga plantasyon sa oil palm.
Nalunsad usab ang mga kampanya kalambigit sa bagyong Sendong ug Pablo nga nagbutyag sa korapsyon ug walay pagpakabana sa mga burukrata-kapitalista ngadto sa mga biktima ug sa imperyalistang pagdaut sa kinaiyahan. Misalmot usab isip pagsimpatiya ang katawhan sa Mindanao sa mga kalihukan alang sa mga biktima sa bagyong Yolanda.
6. Mibuto ang mga dagkung anti-pasistang kalihokang masa sa panahon sa rehimeng US-Aquino III nga nahimong lanog dili lang sa Mindanao kun di sa tibuok nasud ug internasyonal. Nalunsad ang kampanya batok sa pagpatay kang Fr. “Pops” Tentorio niadtong 2011 sa North Cotabato. Dihang nahimong kaylap ug sobsob na ang militarisasyon sa Mindanao, gilunsad sa nagkalain-laing sektor sa katawhan sa Mindanao ang unang Manilakbayan niadtong 2014 nga mibutyag ug misupak sa grabeng kabangis militar sa tibuok isla.
Karong 2015, mibuto na usab ang mas dakung dayag nga anti-pasistang kalihokan sa Mindanao nga nahimong nasudnon ug gisuportahan sa nagkalain-laing pundok sa ubang kanasuran batok sa grabeng terorismo sa estado sa Mindanao nga gidagkutan sa pagmasaker sa executive director sa ALCADEV ug sa duha ka lider Lumad sa Han-ayan, Lianga, Surigao del Sur, ug mitahi sa uban pang mga mayor nga isyu sa pasismo sa tibuok isla sa Mindanao.
Tungod niini, nalunsad sa katawhan sa Mindanao ang ikaduhang Manilakbayan nga nagkondena sa kabangis militar ug miani sa halapad nga suporta sa mga rehiyon nga naagian ug sa mga sektor sa mag-uuma, mamumuo, kabatanonan-estudyante, mga opisyales sa LGU, mga dagkung unibersidad ug eskwelahan, mga pundok relihiyoso apil CBCP, pundok sa mga artista ug mga atleta sa mga unibersidad, taga-mass media, internasyonal nga mga pundok ug uban pa.
Nagpadayon ang pakigbisog sa katawhang Moro taliwala sa paningkamot sa rehimeng US-Aquino III nga pahilumon ang pagsukol sa Bangsamoro. Ang Moro Resistance and Liberation Organization (MRLO) padayong nagpalapad ug nag-organisa sa han-ay sa katawhang Moro alang sa tinuod nga katungod sa kaugalingong paghukom.
Nakigdugtong ug nakigtinabangay ang rebolusyonaryong kalihukan sa nagkalain-laing pundok sa mga Moro nga armado ug dili armadong nakigbisog batok sa kasamtangang rehimen.
7. Ang tukmang pulitikanhong linya sa Partido diha sa pakigtinabangay sa nagkalain-laing pwersa sa katilingban miani sa mga rebolusyonaryong kadaugan. Ang gikusgon sa batakang alyansa sa mga mag-uuma, apil Lumad, ug mamumuo ug ang pakiglambigitay niini sa mga hatungang hut-ong sa katilingban midani sa suporta sa ubang hut-ong ug sektor nga kanhi wala malangkob sa pulitikanhong pakigbisog. Pinaagi sa isyu-por-isyu nga basehan, nakigtinabangay kita bisan sa han-ay sa mga pulitiko ug institusyon nga kanhi wala madugtongi.
Ang obhetibong pang-ekonomiya ug pangpulitikang kahimtang ug ang paglambo sa mga rebolusyonaryong pwersa sa Mindanao, nagpakita nga paborable nga padayong moasdang ang rebolusyon sa isla. Ang katukma sa pagpangulo sa PKP magseguro sa padayong pag-abante sa demokratikong rebolusyon.
Mabuhay ang PKP!
Mabuhay ang katawhang Pilipino!
Sgd. Ka Oris
Spokesperson
NDFP-Mindanao
No comments:
Post a Comment
Note: Only a member of this blog may post a comment.