Sakup nga kaprobinsyahanan sang 3ID matawhay na

From the Philippine Information Agency (Jun 17): Sakup nga kaprobinsyahanan sang 3ID matawhay na
Siyam ka mga probinsya nga sakup sang Area of Responsibility sang 3rd Infantry Division (3ID) sang Philippine Army ang gindeklara nga malinong na kag handa para sa lubos nga pagsanyog.

Nahibaluan nga nangin pinakaulihi ang probinsya sang Negros Occidental nga maka-deklara nga malinong kag matawhay pinaagi sa resolusyon nga aprobado sang Provincial Peace and Order Council sang Negros Occidental san g Hunyo 10.

Samtang ang nauna nga walo ka kaprobinsyahanan nga naka-deklara sang malinong kag matawhay nga estado amo ang Iloilo, Aklan, Capiz, Antique, Negros Oriental, Guimaras, Cebu kag Siquijor.

Ginpahayag ni Maj. Gen. Rey Leonardo Guerrero nga commanding general sang 3ID nga ang kadalag-an sa seguridad ang nagakadat nga mangin tayuyon pinaagi sa pagbinuligan sang tanan.

Ang pagdeklara sang isa ka probinsya ukon lugar nga malinong ang indikasyon nga may daku nga pagsanyog sa seguridad, aktibo kag nagahulag ang Provincial Peace and Order Council kag iban pa nga mga tikang para sa katawhayan kag ang mga pumuluyo ang nagasuporta sa kampanya para kalinong kag kasulhay sang komunidad.

Sa iya nga bahin, ginpahayag ni Lt. Gen. Hernando Iriberri nga commanding general sang Philippine Army sa ginpatigayon nga programa para sa anibersaryo sang pagkatukod sang 3ID sang nagligad nga Mayo nga indi na gid sang talalupangdon ang pamahog sa seguridad kag insurhensya sa ti-on nga madeklara ang lugar nga “peaceful and ready for development.”

http://news.pia.gov.ph/article/view/1001434415124/hiligaynon-news-sakup-nga-kaprobinsyahanan-sang-3id-matawhay-na