LINGKAWAS
December 14, 2021
Atol sa ika-73 nga internasyonal nga kasaulogan sa United Nations-Universal Declaration on Human Rights (UN-UDHR) karong Disyembre 10, 2021, angayang hugot nga kondenahon sa tanang katawhang Pilipino ang rehimeng Duterte ug ang AFP-PNP sa dayag ug brutal nga pasistang pagpangatake niini sa mga aktibista, patriyotiko, kritiko ug rebolusyonaryo. Ubos sa kontra-insurhensya kampanyang pagpanumpo gigamit ni Duterte ang “Whole of nation approach” ug National Task Force to End Local Communist Armed Conflict (NTF-ELCAC) nga nagpailalom sa nasud sa dili deklaradong balaod militar nga nagresulta sa niluog nga mga pagpanglapas sa tawhanong katungod.
Kasumpay niining kampanya ang walay puas nga mga kombat operisyon sa AFP ug PNP sa kabukiran, paglunsad og Retooled Community Support Program (RCSP) sa mga kabaryohan ug pagpaniktik sa mga gidudahang myembro sa rebolusyonaryong kalihukan. Kining tanan nagresulta sa kaylap nga pagpamakwit, pinugos nga pekeng pagpasurender, red tagging, pagpamig-ot ug pagpamatay sa mga inosenteng sibilyan.
Dinhi sa CARAGA, nikabat na sa kapin 35 ka inosenteng sibilyan ang nahimong biktima sa extra-hudisyal nga pagpatay. Lakip sa mga biktima mao kadtong gipusil-patay sa mga ahente sa 3rd SFB kaniadtong Hunyo 15, 2021 nga mao sila ni Angel Rivas 12 anyos, Lenie Rivas ug Willy Rodriguez sa Sityo Panokmuan, Diatagon, Lianga Surigao del sur. Niini nga panghitabo gipagawas sa mga militar nga mga armado sila nga namatay sa engkwentro apan sa pagkatinuod sila, mga sibilyang mag-uuma nga kaniadto nanghag-ot og abaka. Lain pa, kaniadtong Hulyo 12, 2021 pinatakang gipusil sa mga elemento sa 30th Infantry Battalion ang upat ka mamumuo sa lubihan nga nagkopras niadtong tungura sa Sitio Pan-ukan, Brgy. Cambuayon, Bacuag. Duha sa mga biktima nga silang Sagloy Destajo ug Richard Lampad ang namatay atol sa panghitabo samtang si Benjie Destajo ug Julieto Madelo ang anaa sa kritikal nga kahimtang gumikan sa mga samad nga ilang naangkon. Nahitabo kini sa susamang hinungdan. Usa ka bakak nga kusganong gipanghimaraot sa mga pamilya sa mga biktima kay lagi mga inosenteng sibilyan ug nailang lumulupyo sa maong mga lugar ang mga biktima. Nahitabo kini atol sa gipahigayong militarisasyon sa kabukiran kundiin, mga mag-uuma ang kasagarang biktima.
Padayong gimilitarisa sa AFP ang daghang kabaryohan sa rehiyon pinaagi sa pagkampo o pagtukod og detatsment sa ilang mga pwersa diha sa tunga sa baryo. Ang mga pwersa sa militar nga naglunsad og RCSP nagpundo sa mga pampublikon lugar sa baryo sama sa mga eskwelahan, hall, gym ug uban pa. Gigamit niining taming ang mga sibilyan ug tataw nga naglapas kini sa mga protocol sa gubat ug CARHRIHL.
Dungan sa dinagku ug sustenidong mga operisyon sa AFP-PNP, gikumbina sa Philippine Airforce ang paggamit sa mga armed drones, attack helicopter, fighter jet, ug uban pa. Kundiin pinatakang nanghulog kini og mga bomba ug nang-istraping sa kalasangan ug sa mga umahan nga duol sa komunidad. Sama sa nahitabong pagpamomba kaniadtong Nobyembre 3, 2021, sa P-16 Damugnay, Los Angeles, Butuan City. Isip resulta adunay usa ka mag-uuma ang namatay bunga sa grabeng kahadlok, temporaryong nibiya usab ang mga residente sa ilang mga panimalay sa kalisang nga maigo ug naundang ang klase sa mga tulunghaan. Kini ang nagpakita sa kawalay respeto sa AFP-PNP-PAF sa Internasyunal nga balaod sa gubat.
Ubay-ubay na usab ang nahimong biktima sa pinugos nga pekeng pagpasurender. Ang E-CLIP nga gipanghambog nilang moabag pinansyal ug mohatag og livelihood(panginabuhian)sa tanang surenderees. Nahimong nag-unang tinubdan sa korapsyon ug promosyon sa mga opisyal. Ang mga biktima walay nadawat kung naa man gamay ra kini kun itandi sa gisaad nilang kantidad. Human nga ma-clear ang pangalan nagkaluha kini og tahas nga kinahanglan papelan sa usa ka surenderee. Sa higayong mapakyas sa pagpapel ang maong biktima mamahimong target na usab kining kasuhan o kaha patyon.
Gawas niini liboan na usab ang biktima sa iligal nga pagpangaresto, pagpamig-ot, pagbakwit, pagpanghulga, red tagging ug daghan pang ubang porma sa pagpanglapas sa tawhanong katungod.
Sa kinatibuk-an, ang dul-an unom katuig nga pasistang paghari sa rehimeng Duterte naghulagway sa terorismo pinaagi sa malukpanong pagpatay ug pagyatak sa tawhanong katungod. Tungod sa tinguha niining hikawan ang katawhan sa ilang katungod nga maghiusa aron molihok ug mosukol batok sa madaug-daugon ug mapahimuslanong sistema. Atubangan niining bangis nga pagpanumpo atong gi-awhag ang tanang katawhan, nga padayong ipanghingusog ang pakigbisog alang sa pagrespeto sa demokratikong katungod. Pinaagi sa paglunsad og dinagkung mga kalihukang masa sa kasyudaran ug mupahigayon sa lain-laing porma sa protesta isip paghandum sa Adlaw sa Tawhanong Katungod . Angayang makigbisog ug dili mahadlok sa pasistang pagpangatake sa Estado. Kay Pinaagi lamang sa pagsalmot sa mga kalihukang masa sa kasyudaran ug armadong pakigbisog sa kabukiran sa umaabot atong makab-ot ang sosyalistang katilingban nga maoy tinuod nga mutubag ug manalipod sa interes sa tanang hut-ong gipahimuslan ug gidaug-daog.
Suklan ang pasistang pagpangatake sa estado!
Ibasura ang kontra katawhang mga balaod nga gipahamtang sa pasistang rehimen!
Batukan ang tanang porma sa pagpanglapas sa tawhanong katungod!
Iasdang ang Demokratikong Rebolusyon sa Katawhan!
https://prwcinfo.wordpress.com/2021/12/14/pasistang-pagpangatake-sa-estado-suklan-demokratikong-katungod-pakigbisogan/
No comments:
Post a Comment
Note: Only a member of this blog may post a comment.